អង្គការសង្គមស៊ីវិល សមាគម រួមទាំងសហគមន៍មូលដ្ឋាន នាំគ្នាប្រារព្ធទិវាព្រៃឈើពិភពលោក ឆ្នាំ២០២២ ដើម្បីលើកកម្ពស់សិទ្ធិសេរីភាពក្នុងការចូលរួមការពារព្រៃឈើ ធនធានធម្មជាតិ ឱ្យរួចផុតពីការកាប់បំផ្លាញនិងធ្វើអាជីវកម្មដោយខុសច្បាប់ ខណៈព្រៃឈើបច្ចុប្បន្នប្រឈមការបាត់បង់កាន់តែខ្លាំង។
ប្រធានផ្នែកកម្មវិធីស្រាវជ្រាវ និងតស៊ូមតិនៃសមាគមបណ្ដាញយុវជនកម្ពុជា លោក ហេង គឹមហុង បានបង្ហោះសារនៅលើបណ្ដាញសង្គមហ្វេសប៊ុករបស់លោកនៅថ្ងៃនេះថា សមាគម អង្គការសង្គមស៊ីវិល សហគមន៍មូលដ្ឋាន និងសហគមន៍ជនជាតិដើមភាគតិច បាននាំគ្នាប្រារព្ធកម្មវិធីទិវាព្រៃឈើពិភពលោក ឆ្នាំ២០២២ រយៈពេល១៥ថ្ងៃ ចាប់ពីថ្ងៃទី១៥ ដល់ទី៣០ ខែដដែលនេះ ក្រោមប្រធានបទ ស្ដីពី “យើងមានសិទ្ធិចូលរួមការពារព្រៃឈើ ដើម្បីជីវិតនៅលើភពផែនដី”។
លោក គឹមហុង បញ្ជាក់ថា កម្មវិធីនេះធ្វើឡើងដើម្បីលើកកម្ពស់សិទ្ធិសេរីភាពក្នុងចូលរួមព្រៃឈើប្រកបដោយនិរន្តរភាព ការកៀរគរប្រជាសហគមន៍ យុវជន ដើម្បីចូលរួមក្នុងកិច្ចការពារព្រៃឈើ ធនធានធម្មជាតិ ឱ្យរួចផុតពីការកាប់បំផ្លាញ និងការធ្វើអាជីវកម្មខុសច្បាប់។ លើសពីនេះ ស្នើឱ្យក្រសួងបរិស្ថាន និងអាជ្ញាធរមូលដ្ឋាន គោរពសិទ្ធិក្នុងការចូលរួមការពារព្រៃឈើនិងធនធានធម្មជាតិ ដោយបញ្ឈប់ការរារាំងសកម្មភាពប្រជាពលរដ្ឋ យុវជន និងសង្គមស៊ីវិល ដែលមានបំណងចូលរួមការពារធនធានធម្មជាតិ។
ប្រធានផ្នែកកម្មវិធីស្រាវជ្រាវ និងតស៊ូមតិនៃសមាគមបណ្ដាញយុវជនកម្ពុជា លោក ហេង គឹមហុង មានប្រសាសន៍បន្ថែមថា ការប្រារព្ធទិវាព្រៃឈើពិភពលោក ឆ្នាំ២០២២ មាន៣ទម្រង់ រួមមាន ទីមួយ ធ្វើតាមរយៈបណ្ដាញសង្គម ទីពីរ លោកថា មានជួបជុំគ្នាដោយផ្ទាល់នៅតាមសហគមន៍ ដោយមានមនុស្សជាង៤០០នាក់ និងទីបី ស្នើសុំជួបថ្នាក់ដឹកនាំក្រសួងបរិស្ថាន ដើម្បីជជែកពីបញ្ហាប្រឈមរបស់សង្គមស៊ីវិលនិងប្រជាសហគមន៍ជាមួយអាជ្ញាធរ ដោយសារតែធ្វើការងារមិនចុះសម្រុងគ្នា ពាក់ព័ន្ធនឹងការចុះទប់ស្កាត់បទល្មើសព្រៃឈើនិងធនធានធម្មជាតិកន្លងមក។
លោកមានប្រសាសន៍ថា៖ «យើងដឹងហើយ កន្លងមក សង្គមស៊ីវិល សហគមន៍មូលដ្ឋាន មិនអាចចូលរួមសកម្មភាពទប់ស្កាត់បទល្មើសព្រៃឈើនៅក្នុងតំបន់ការពារធម្មជាតិបានទេ»។
លោកបន្ថែមថា៖ «ដូច្នេះ ក្នុងឱកាសទិវាព្រៃឈើពិភពលោកឆ្នាំ២០២២នេះ ពួកយើងស្នើសុំជួបជជែកជាមួយក្រសួងបរិស្ថាន ដើម្បីស្វែងរកមធ្យោបាយរួម ធ្វើយ៉ាងណាដើម្បីកុំឱ្យមានការខ្វែងគំនិតគ្នា។ ហើយយើងចង់ដឹងថា តើហេតុអ្វីក្រសួងបរិស្ថានរឹតត្បិតសេរីភាពសហគមន៍មូលដ្ឋានមិនឱ្យចូលរួមការពារព្រៃឈើ»។
វីអូឌី មិនអាចសុំការបំភ្លឺពីអ្នកនាំពាក្យក្រសួងបរិស្ថាន លោក នេត្រ ភក្ត្រា បានទេ នៅរសៀលថ្ងៃទី១៥ ខែមីនានេះ។
ក្នុងពីធីសន្និបាតបូកសរុបលទ្ធផលការងារឆ្នាំ២០២១ និងលើកទិសដៅបន្តសម្រាប់ឆ្នាំថ្មី របស់រដ្ឋបាលខេត្តបាត់ដំបង កាលពីថ្ងៃទី១០ ខែមីនា ឆ្នាំ២០២២ រដ្ឋមន្រ្តីក្រសួងមហាផ្ទៃ លោក ស ខេង បានថ្លែងដោយរម្លឹកអំពីភាពសម្បូរហូរហៀរនៃព្រៃឈើនៅកម្ពុជាកាលពីអតីតកាល ខណៈបច្ចុប្បន្ន លោកថា ព្រៃឈើនៅសល់តិចតួចប៉ុណ្ណោះ ដោយរកតែព្រៃសម្រាប់បាំងថ្ងៃមិនបានផង។
បើតាមរបាយការណ៍របស់អង្គការលើកលែងទោសអន្តរជាតិ (Amnesty International) ចេញផ្សាយកាលពីថ្ងៃទី២៨ ខែមករា ឆ្នាំ២០២២ បានបង្ហាញថា ក្នុងឆ្នាំ២០២១ ព្រៃឈើលើផ្ទៃដីកម្ពុជាជាង៦ ០០០ហិកតា បានរងនូវការកាប់បំផ្លាញ នៅតំបន់ការពារព្រៃឡង់ និងព្រៃព្រះរការ ដោយមានការទទួលសំណូក និងការប្រព្រឹត្តអំពើពុករលួយរបស់អាជ្ញាធរពាក់ព័ន្ធ។
ជាមួយគ្នានេះ ក្នុងសេចក្ដីថ្លែងការណ៍របស់សមាជិកបណ្ដាញសហគមន៍ព្រៃឡង់ទាំង៤ខេត្ត ក្នុងឱកាស ទិវាព្រៃឈើអន្តរជាតិ ២១ មីនា ឆ្នាំ២០២១ បញ្ជាក់ថា មានមូលហេតុចម្បងមួយដែលធ្វើឱ្យព្រៃឈើនៅតំបន់ដែនជម្រកសត្វព្រៃ «ព្រៃឡង់» រងការវិនាសបន្ថែមទៀត គឺការហាមឃាត់មិនឱ្យប្រជាសហគមន៍ចូលរួមការពារតែម្តង៕