គណៈកម្មាឃុំសង្កាត់រៀបចំការបោះឆ្នោត ប្រចាំខេត្តព្រៃវែង បានផ្ដល់សុពលភាពចំពោះបេក្ខភាពមេឃុំ-ចៅសង្កាត់ដែលឈរឈ្មោះឱ្យ «គណបក្សកម្ពុជានិយម» រួចហើយ បន្ទាប់ពីមានភាពចម្រូងចម្រាសរឿងឈរឈ្មោះជាបេក្ខភាពមេឃុំចៅ-សង្កាត់កន្លងមក។
ប្រធានគណបក្សកម្ពុជានិយម ប្រចាំខេត្តព្រៃវែង លោក ស៊ុំ ជុន ប្រាប់ វីអូឌី នៅថ្ងៃអង្គារនេះថា បេក្ខភាពដែលឈរឈ្មោះជាមេឃុំ-ចៅសង្កាត់ ទាំង៦រូប ត្រូវបានគណៈកម្មការឃុំសង្កាត់រៀបចំការបោះឆ្នោត ខេត្តព្រៃវែង ផ្ដល់សុពលភាពរួចរាល់ហើយ។
ការទទួលស្គាល់ជាបេក្ខភាពមេឃុំ-ចៅសង្កាត់នេះ ត្រូវបានលោក ស៊ុំ ជុន អះអាងថា នៅបន្ទាប់ពីមានការសម្របសម្រួល និងអង្កេតដោយម៉ត់ចត់ ទៅលើបណ្ដឹងជំទាស់ពីតំណាងពលរដ្ឋ ពីគណៈកម្មការឃុំសង្កាត់រៀបចំការបោះឆ្នោត។ ប្រភពដដែលបន្តថា នៅពេលនេះ គណៈកម្មការឃុំសង្កាត់ រៀបចំការបោះឆ្នោត បានចេញបណ្ណដែលជាប្រភេទទម្រង់ ១១០៨ សម្គាល់ជូនបេក្ខភាពដែលឈរឈ្មោះឱ្យគណបក្សកម្ពុជានិយមរួចរាល់ហើយ។
លោកបន្តថា៖ «តាំងពីមានប្រតិកម្មថ្ងៃហ្នឹងមក ឥលូវនេះស្ងាត់ឈឹងហើយ។ អ្នកខ្លះប្រាប់ថា បើខ្ញុំមិនដកម៉េច បើខ្ញុំរកតែដេកមិនលក់ផង! មានគេតេ! ដល់ឥលូវនេះស្ងាត់ឈឹង។ ពេលនេះនៅដូចគោលការណ៍ដើមដដែលទេ។ តម្លាភាពវិញហើយ ស្ងាត់ឈឹង»។
កាលពីថ្ងៃទី៩ ខែមីនា មេឃុំស្ដីទី នៃឃុំកន្សោមអក លោក វ៉ា សារឿន បានចេញលិខិតអញ្ជើញតំណាងគណបក្សកម្ពុជានិយម ប្រចាំខេត្តព្រៃវែង លោក ថោ ចន្ធី និងលោក ស៊ុំ ជុន ឱ្យចូលខ្លួនដោះស្រាយបណ្ដឹងដែលប្រជាពលរដ្ឋប្ដឹងសុំដកឈ្មោះចេញពីបញ្ជីបេក្ខជនឈរឈ្មោះបម្រើឱ្យការបោះឆ្នោតជ្រើសរើសក្រុមប្រឹក្សាឃុំ-សង្កាត់វិញ។
បេក្ខភាពដែលឈរឈ្មោះឱ្យគណបក្សកម្ពុជានិយម ទាំង៦នាក់ ដែលត្រូវរងបណ្ដឹងសុំដកឈ្មោះចេញនោះ រួមមាន លោក ឥត អ៊ាន មកពីភូមិព្រៃអណ្ដូង ឈរលេខរៀងទី៧, លោក ទៀប សាវ៉ុន នៅភូមិតាទាំង ឈរលេខរៀងទី៤, លោក ចាន់ រិទ្ធ ឈរលេខរៀងទី១០, លោក ឈិត ម៉ៅ ឈរលេខរៀងទី១៩, និងលោក សែម សុជា ឈរលេខរៀងទី៥ ដែលអ្នកទាំងបីរូបនេះ មកពីភូមិជ្រួល រួមទាំងលោក ឌុក សេង នៅភូមិត្រពាំងរុន ឈរលេខរៀងទី៣។ បេក្ខជនទាំង៦រូបនេះ រស់នៅក្នុងឃុំកន្សោមអក ស្រុកកំពង់ត្របែក ខេត្តព្រៃវែង៕
