មន្ត្រីជាន់ខ្ពស់ក្រសួងសុខាភិបាល ឱ្យដឹងថា អ្នកធ្លាប់ឆ្លងជំងឺកូវីដ-១៩មួយចំនួន អាចនៅមានរោគសញ្ញាដែលនៅសេសសល់បន្តក្នុងរយៈពេលប្រហែល១ឆ្នាំ ក្រោយពីបានជាសះស្បើយពីជំងឺនេះ ដូចជា ឆាប់នឿយហត់ ពិបាកដកដង្ហើម បញ្ហាផ្លូវចិត្ត និងអាការៈមួយចំនួនទៀត ទៅតាមស្ថានភាពសុខភាពរបស់បុគ្គលម្នាក់ៗ។
រដ្ឋលេខាធិការ និងជាអ្នកនាំពាក្យក្រសួងសុខាភិបាល លោកស្រី ឱ វណ្ណឌីន បានលើកឡើងនៅថ្ងៃទី១៧ ខែមីនា ឆ្នាំ២០២២នេះថា តាមការសិក្សារបស់អ្នកវិទ្យាសាស្ត្រវេជ្ជសាស្ត្របរទេសមួយចំនួន លើអ្នកជាសះស្បើយពីជំងឺកូវីដ-១៩មួយចំនួន ដែលគេសង្កេតឃើញប្រហែលជា ២៣ ទៅ២៦% គឺមានបញ្ហាផ្លូវចិត្ត ដូចជា បញ្ហាឆាប់បាក់ទឹកចិត្ត និងឆាប់ព្រួយជាដើម។
ទន្ទឹមនឹងនេះ លោកស្រីថា ភាពឆាប់នឿយហត់ឬមានអារម្មណ៍ថាមិនសូវមានកម្លាំងកំហែង ក៏សង្កេតឃើញមានដែរ និងមួយចំនួនទៀត ក៏មានការឆាប់ទទួលបាននូវការឆ្លងជំងឺកូវីដ-១៩ ឡើងវិញផងដែរ។
លោកស្រី ឱ វណ្ណឌីន បានពន្យល់ថា៖ «ករណីនេះ អាស្រ័យលើសរីរាង្គរបស់បុគ្គលម្នាក់ៗដែលមានការឆ្លើយតប និងការវិវត្តន៍កើតមានមិនដូចគ្នានោះឡើយ ជាពិសេសស្ថានភាពនៃអង់ទីគ័ររបស់បុគ្គលឆ្លើយតបទប់ទល់ទៅនឹងជំងឺនេះ ហើយក៏អាស្រ័យលើស្ថានភាពដែលបុគ្គលបានឆ្លងកាត់សភាពជំងឺស្រាល ឬជំងឺធ្ងន់ធ្ងរផងដែរ»។
បើតាមការសិក្សារបស់អ្នកវិទ្យាសាស្ត្រវេជ្ជសាស្ត្របរទេសមួយចំនួន ដែលលោកស្រី ឱ វណ្ណឌីន លើកយកមកបង្ហាញនេះ អ្នកជាសះស្បើយពីជំងឺកូវីដ-១៩ ក៏អាចនៅមានរោគសញ្ញាដែលនៅសេសសល់បន្តក្រោយជាសះស្បើយដែរ (បុគ្គលខ្លះក៏មិនមានបញ្ហានេះដែរ) ដូចជា មានអារម្មណ៍ថាខ្សោយជាងមុនពេលឈឺ ដកដង្ហើមមិនបានវែងៗឬមានអារម្មណ៍រៀងថប់ៗដង្ហើម បន្តនៅក្អកខ្លះៗ អាចឈឺសន្លាក់ដៃជើង អាចមានឈឺដើមទ្រូងខ្លះៗ មានបញ្ហាការចងចាំ និងបញ្ហាសម្រាន្តមិនលក់ ឈឺសាច់ដុំឬឈឺក្បាល បេះដូងដើរញាប់ជាងមុន និងបញ្ហាបាក់ទឹកចិត្ត អស់សង្ឃឹម ឬមានអារម្មណ៍ព្រួយច្រើនជាដើម។
លោកស្រីបញ្ជាក់បន្ថែមថា៖ «រោគសញ្ញាខាងលើ នឹងប្រហែលជាអាចបាត់ទៅវិញក្នុងរយៈពេល ៦ទៅ១២ខែ ឬអាចខ្លីជាងនេះ ឬក៏អាចកាន់តែធ្ងន់ធ្ងរ ឬមិនបាត់ទៅវិញ អាស្រ័យលើការបន្តថែទាំសុខភាពរបស់បុគ្គលដែលបានជាសះស្បើយពីជំងឺកូវីដ–១៩ និងការធ្វើលំហាត់ប្រាណ ព្រមទាំងការចេះបន្ធូរអារម្មណ៍ និងបរិយាកាសរស់នៅជាដើម ជាពិសេសចាំបាច់ត្រូវចៀសវាងកុំបណ្តោយឱ្យខ្លួនមានការឆ្លងជំងឺនេះឡើងវិញ ដែលវាអាចបន្ថែមភាពប៉ះពាល់មិនល្អដល់សរីរាង្គណាមួយរបស់បុគ្គលដូចជា ប្រព័ន្ធសសៃប្រសាទ បេះដូង ថ្លើម និងតម្រងនោមជាដើម»។
ទោះយ៉ាងណា លោកស្រីថា អ្នកវិទ្យាសាស្រ្ត ក៏មិនទាន់អាចបញ្ជាក់ឱ្យដឹងនៅឡើយថាតើផលប៉ះពាល់សំខាន់ៗអ្វីខ្លះទៀតលើសរីរាង្គបុគ្គលដែលបានជាសះស្បើយពីជំងឺកូវីដ-១៩ នៅក្នុងកម្រិតណា និងរយៈពេលយូរប៉ុណ្ណានោះ ដែលតម្រូវឱ្យមានការសិក្សាច្បាស់លាស់ជាបន្តបន្ទាប់ទៀត។
ជាមួយគ្នានេះដែរ អ្នកនាំពាក្យក្រសួងសុខាភិបាលរូបនេះ ក៏បានអំពាវនាវដល់ប្រជាពលរដ្ឋបន្តការពារខ្លួនកុំឱ្យឆ្លងវីរុសកូវីដ-១៩ និងជំរុញនិងលើកទឹកចិត្តដល់ប្រជាពលរដ្ឋ ទៅចាក់វ៉ាក់សាំងដូសទី៣ ឬដូសជំរុញឱ្យបានគ្រប់ៗគ្នា ដើម្បីបង្កើននូវកងការពារក្នុងសរីរាង្គរបស់បុគ្គល និងចៀសផុតពីផលវិបាកនានា ពីជំងឺកាចសាហាវមួយនេះ។
លោកស្រីឱ វណ្ណឌីន គូសបញ្ជាក់ថា៖ «សូមកុំភ្លេចថា សរីរាង្គកាយយើង ប្រហែលជានឹងអាចមានការប៉ះពាល់សុខភាពទោះតិចក្តី ឬច្រើនក្តី ក្រោយពីបានឆ្លងជំងឺកូវីដ–១៩ ប្រសិនបើយើងមិមានកងការពារខ្លួនយើងរឹងម៉ាំទេនោះ»។
បើតាមក្រសួងសុខាភិបាល គិតត្រឹមព្រឹកថ្ងៃពុធម្សិលមិញ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន ១៣៤ ៤៩២នាក់ ក្នុងនោះអ្នកជំងឺព្យាបាលជាសះស្បើយចំនួន ១៣០ ០២៨នាក់ និងអ្នកស្លាប់ចំនួន ៣ ០៤៩នាក់៕
