យោងតាមរដ្ឋបាលអាកាសចរណ៍ស៊ីវិលចិន (CAAC) បានឱ្យដឹងថា យន្តហោះមួយគ្រឿងផ្ទុកមនុស្សសរុបចំនួន១៣២នាក់ របស់ក្រុមហ៊ុនអាកាសចរណ៍ចិន China Eastern Airlines បានធ្លាក់នៅតំបន់ភ្នំ ក្នុងតំបន់ក្វាងស៊ី (Guangxi) ភាគខាងត្បូងប្រទេសចិន កាលពីរសៀលថ្ងៃចន្ទ។ នេះបើតាមការចុះផ្សាយដោយសារព័ត៌មាន CNN។
រដ្ឋបាលអាកាសចរណ៍ស៊ីវិលចិន បានបន្តឱ្យដឹងនៅក្នុងសេចក្ដីថ្លែងការណ៍មួយថា យន្តហោះរបស់ក្រុមហ៊ុនដែលជាប្រភេទប៊ូអ៊ីង 737 (Boeing 737) នេះ ត្រូវបានគេដឹងថាមានគោលដៅធ្វើដំណើរចេញពីទីក្រុងឃុនមីង (Kunming) ភាគនិរតី ឆ្ពោះទៅកាន់ទីក្រុងក្វាងចូវ (Guangzhou) និងបានបាត់ការទាក់ទងនៅពេលដែលចូលមកដល់ទីក្រុង វូចូវ (Wuzhou) ដោយនៅលើយន្តហោះនោះមានអ្នកដំណើរសរុបចំនួន១២៣នាក់ រួមនឹងបុគ្គលិកបម្រើការលើយន្តហោះចំនួន៩នាក់ផ្សេងទៀត។
ទាក់ទិននឹងករណីនេះ ក្រុមហ៊ុនអាកាសចរណ៍ China Eastern Airlines បានបញ្ជាក់ថា ខ្លួនបានដំណើរការនីតិវិធីសង្គ្រោះបន្ទាន់នានា រួមទាំងខ្សែបណ្ដាញសម្រាប់សមាជិកគ្រួសាររបស់អ្នកដំណើរទាំងឡាយផងដែរ ខណៈដែលកិច្ចខិតខំប្រឹងប្រែងក្នុងការជួយសង្គ្រោះកំពុងតែដំណើរការនៅកន្លែងកើតហេតុ។
ទោះជាយ៉ាងណា ព័ត៌មានលម្អិតអំពីមូលហេតុដែលបង្កឱ្យមានជាឧបទ្ទវហេតុនេះកើតឡើង និងចំនួនអ្នកស្លាប់និងរបួស មិនទាន់ត្រូវបានបញ្ជាក់ឱ្យដឹងភ្លាមៗនោះទេ។
ជាមួយគ្នានេះ ក្រុមហ៊ុនអាកាសចរណ៍ចិននោះក៏បានចូលរួមរំលែកទុក្ខដល់ជនរងគ្រោះដែលបានស្លាប់ក្នុងឧបទ្ទវហេតុនេះផងដែរ ដោយមិនបានបញ្ជាក់ពីចំនួនអ្នកស្លាប់នោះទេ។
ក្រុមហ៊ុនបានឱ្យដឹងនៅក្នុងសេចក្ដីថ្លែងការណ៍មួយថា៖ «មូលហេតុនៃការធ្លាក់យន្តហោះនេះកំពុងតែស្ថិតនៅក្រោមការស៊ើបអង្កេតនៅឡើយ។ ក្រុមហ៊ុនសូមចូលរួមរំលែកទុក្ខយ៉ាងក្រៀមក្រំចំពោះអ្នកដំណើរនិងបុគ្គលិកបម្រើការលើយន្តហោះដែលបានស្លាប់បាត់បង់ជីវិតក្នុងហេតុការណ៍ធ្លាក់យន្តហោះនេះ»។
ក្រុមហ៊ុនដដែលបន្ថែមថា ខ្លួនក៏កំពុងតែទាក់ទងជាមួយក្រុមប្រឹក្សាសុវត្ថិភាពដឹកជញ្ជូនជាតិរបស់អាមេរិក (NTSB) ខណៈដែលអ្នកជំនាញបច្ចេកទេសនានាត្រៀមខ្លួនរួចជាស្រេច ដើម្បីចូលរួមជាមួយ CAAC ក្នុងកិច្ចការស៊ើបអង្កេត។
យោងតាមប្រព័ន្ធផ្សព្វផ្សាយរដ្ឋចិនមួយបានរាយការណ៍ឱ្យដឹងដែរថា ប្រធានាធិបតីចិន លោក ស៊ី ជីនពីង ក៏បានណែនាំផ្នែកសង្គ្រោះបន្ទាន់របស់ប្រទេសនេះ ឱ្យរៀបចំប្រតិបត្តិការស្វែងរកជួយសង្គ្រោះ និងកំណត់អត្តសញ្ញាណពីមូលហេតុនៃគ្រោះថ្នាក់នេះផងដែរ។
ប្រភពដដែលបន្តថា៖ «បន្ទាប់ពីទទួលបានដំណឹងនៃឧបទ្ទវហេតុនេះ លោកប្រធានាធិបតី ស៊ី ជីនពីង បានធ្វើការណែនាំភ្លាមៗ ឱ្យចាប់ផ្ដើមយន្តការសង្គ្រោះបន្ទាន់ រៀបចំប្រតិបត្តិការរុករក ជួយសង្គ្រោះ និងដោះស្រាយទៅតាមស្ថានការណ៍ជាក់ស្ដែង»៕
