ក្រសួងសុខាភិបាលព្រមានជាថ្មីពីការឆ្លងរាលដាលជំងឺកូវីដ-១៩បំប្លែងថ្មីក្នុងទ្រង់ទ្រាយធំឡើងវិញ ប្រសិនបើមិនពង្រឹងវិធានការទប់ស្កាត់ ហើយប្រជាពលរដ្ឋមានការធ្វេសប្រហែស មិនចូលរួមអនុវត្តវិធានការសុខាភិបាលឱ្យបានត្រឹមត្រូវនិងហ្មត់ចត់ទេនោះ។
ការព្រមាននេះធ្វើឡើងនៅក្នុងសេចក្ដីជូនដំណឹងរបស់ក្រសួងសុខាភិបាល នៅថ្ងៃអង្គារនេះ ស្ដីពីយុទ្ធនាការអប់រំសុខភាព រួមគ្នាទប់ស្កាត់ការចម្លងវីរុសកូវីដ-១៩ ក្រោមប្រធានបទ «រួមគ្នាប្រយុទ្ធវីរុសកូវីដ-១៩ បំប្លែងថ្មី អូមីក្រុង ដែលឆ្លងលឿនខ្លាំងជាងមុន អាចបង្កឱ្យមានហានិភ័យធ្ងន់ធ្ងរដល់អ្នកនិងគ្រួសារ»។
ក្រសួងសុខាភិបាល បានលើកឡើងក្នុងសេចក្ដីជូនដំណឹងនោះថា កម្ពុជាបានបើកដំណើរការឡើងវិញនូវសកម្មភាពសេដ្ឋកិច្ចនិងសង្គមនានា កាលពីថ្ងៃទី០១ ខែវិច្ឆិកា ឆ្នាំ២០២២ ប៉ុន្តែតាមការអង្កេតតាមដានរបស់អង្គការសុខភាពពិភពលោក បង្ហាញថា ជំងឺរាតត្បាតកូវីដ-១៩ នៅតែកំពុងបន្តវាយលុកខ្លាំងនៅក្នុងបណ្ដាប្រទេសនៅតំបន់អាស៊ីប៉ាស៊ីហ្វិកនៅឡើយ ក្នុងនោះមានទាំងកម្ពុជាផងដែរ។
ក្រសួងបន្តថា បញ្ហានេះបានបង្កើតជាកង្វល់នៃការដែលអាចមានការរាតត្បាតទ្រង់ទ្រាយធំឡើងវិញ ដោយសារតែការចរាចរយ៉ាងទូលំទូលាយនៃវីរុសបំប្លែងថ្មី អូមីក្រុង ដែលឆ្លងក្នុងល្បឿនមួយលឿនជាងវីរុសបំប្លែងថ្មីប្រភេទមុនៗ គួបផ្សំនឹងការខ្វះចន្លោះនៃការអនុវត្តវិធានការមិនប្រើឱសថ ខណៈពលរដ្ឋមួយចំនួនហាក់នៅធ្វេសប្រហែសភ្លេចខ្លួនក្នុងការអនុវត្តវិធានការសុខាភិបាលត្រឹមត្រូវនិងហ្មត់ចត់។
ក្រសួងសុខាភិបាលបន្តទៀតថា ចាប់តាំងពីវីរុសអូមីក្រុងចូលមកកម្ពុជា កាលពីពាក់កណ្ដាលខែធ្នូ ឆ្នាំ២០២១ មកដល់ថ្ងៃទី២១ ខែមីនា ឆ្នាំ២០២២នេះ ករណីឈឺនិងស្លាប់នៅតែរកឃើញជាបន្តបន្ទាប់ជារៀងរាល់ថ្ងៃ និងអាចស្ថិតក្នុងកម្រិតខ្ពស់នៅក្នុងចំណោមសហគមន៍ ដោយសារតែពលរដ្ឋមួយចំនួនបានធ្វើតេស្ត និងព្យាបាលនៅតាមផ្ទះដោយខ្លួនឯង។
បើតាមក្រសួងសុខាភិបាល គិតចាប់ពីថ្ងៃទី១៤ ខែធ្នូ ដល់ថ្ងៃទី១២ ខែមីនា កម្ពុជាបានរកឃើញអ្នកមានវិជ្ជមានកូវីដ-១៩ អូមីក្រុង ចំនួន១៣ ៥៦១នាក់ និងមានអ្នកស្លាប់ចំនួន៥១នាក់។
ក្រសួងថា៖ «ប្រសិនបើបុគ្គលនៅតែបន្តមានការធ្វេសប្រហែស វីរុសអូមីក្រុងនឹងបន្តរាតត្បាតវាយលុកចូលក្នុងសហគមន៍របស់យើង ដែលទាមទារឱ្យមានវិធានការរួមផ្សំគ្នាជាច្រើន និងទាមទារឱ្យមានការរួបរួមគ្នា ដើម្បីអាចទប់ស្កាត់ការចម្លងនេះបាន»។
រដ្ឋមន្ត្រីក្រសួងសុខាភិបាល លោក ម៉ម ប៊ុនហេង បានអំពាវនាវនៅក្នុងសេចក្ដីជូនដំណឹងនេះដល់ប្រជាពលរដ្ឋទាំងអស់បន្តអនុវត្តវិធានការបង្ការជំងឺ «៣ការពារ ៣កុំ» និងចាក់វ៉ាក់សាំងកូវីដ-១៩ ឱ្យបានគ្រប់ៗគ្នា។
លោកក៏បានអំពាវនាវដល់ស្ថាប័នពាក់ព័ន្ធ រដ្ឋបាលថ្នាក់ក្រោមជាតិ និងអាជ្ញាធរមូលដ្ឋាន វិស័យឯកជន និងអង្គការជាតិ-អន្តរជាតិ ចូលរួមគាំទ្រសកម្មភាពយុទ្ធនាការជាតិនេះ និងបន្តអប់រំផ្សព្វផ្សាយដល់ប្រជាពលរដ្ឋ ក៏ដូចជាបុគ្គលិកក្រោមឱវាទរបស់ខ្លួនពីការបង្ការនិងទប់ស្កាត់ការឆ្លងវីរុសនេះឱ្យមានប្រសិទ្ធភាពខ្ពស់ ដើម្បីរួមចំណែកកាត់ផ្ដាច់ខ្សែចម្លងវីរុសកូវីដ-១៩ និងការចម្លងវីរុសកូវីដ-១៩ពីបុគ្គលម្នាក់ទៅម្នាក់ ជាពិសេសត្រូវចូលរួមបញ្ចៀសនូវការរាតត្បាតជាលក្ខណៈទ្រង់ទ្រាយធំនៅក្នុងសហគមន៍។
គួរបញ្ជាក់ថា ក្រសួងសុខាភិបាលបានចាប់ផ្ដើមយុទ្ធនាការជាតិអប់រំសុខភាព រួមគ្នាទប់ស្កាត់ការចម្លងវីរុសកូវីដ-១៩ នៅថ្ងៃទី២២ ខែមីនា ឆ្នាំ២០២២នេះ ក្នុងក្របខណ្ឌទូទាំងប្រទេស ដើម្បីក្រើនរម្លឹក ពញ្ញាក់ស្មារតី និងបង្កើនជំរុញការចូលរួមរបស់ពលរដ្ឋ ក្រសួងស្ថាប័នពាក់ព័ន្ធ អាជ្ញាធរមូលដ្ឋានគ្រប់លំដាប់ថ្នាក់ អង្គការជាតិ-អន្តរជាតិ និងសេវាឯកជនទាំងអស់ ពួតដៃគ្នាបន្តអនុវត្តវិធានការចាំបាច់នានា ដើម្បីពង្រឹងការអនុវត្តវិធានការប្រយុទ្ធ និងទប់ស្កាត់ការឆ្លងរាលដាលវីរុសកូវីដ-១៩ ក្នុងសហគមន៍៕
