មន្ត្រីនៃនិយ័តករអាកាសចរណ៍ចិនមួយរូប បានថ្លែងប្រាប់អ្នកយកព័ត៌មាននៅថ្ងៃពុធនេះថា ប្រទេសរបស់ខ្លួនបានរកឃើញប្រអប់ខ្មៅមួយក្នុងចំណោមប្រអប់ខ្មៅទាំងពីរ ដែលជាកម្មសិទ្ធិរបស់យន្តហោះក្រុមហ៊ុនអាកាសចរណ៍ China Eastern Airlines ដែលបានធ្លាក់កាលពីដើមសប្ដាហ៍នេះហើយ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ទោះជាយ៉ាងណា មូលហេតុនៃការធ្លាក់យន្តហោះនេះនៅមិនទាន់ត្រូវបានបញ្ជាក់នៅឡើយទេ ខណៈដែលអាជ្ញាធរផ្នែកអាកាសចរណ៍នានាបានលើកឡើងថា ការស៊ើបអង្កេតរបស់ពួកគេអាចនឹងមានការលំបាកខ្លាំង ដោយសារតែយន្តហោះមួយនេះស្ថិតនៅក្នុងការខូចខាតយ៉ាងធ្ងន់ធ្ងរ។
គួរបញ្ជាក់ថា យន្តហោះផ្ទុកមនុស្សសរុបចំនួន១៣២នាក់របស់ក្រុមហ៊ុនអាកាសចរណ៍ចិន China Eastern Airlines ដែលមានគោលដៅធ្វើដំណើរចេញពីទីក្រុងឃុនមីង (Kunming) ភាគនិរតី ឆ្ពោះទៅកាន់ទីក្រុងក្វាងចូវ (Guangzhou) បានធ្លាក់នៅតំបន់ភ្នំ ក្នុងតំបន់ក្វាងស៊ី (Guangxi) ភាគខាងត្បូងប្រទេសចិន កាលពីរសៀលថ្ងៃចន្ទ។
ទាក់ទិននឹងករណីនេះ ប្រធានាធិបតីចិន លោក ស៊ី ជីនពីង ក៏បានណែនាំផ្នែកសង្គ្រោះបន្ទាន់របស់ប្រទេសនេះ ឱ្យរៀបចំប្រតិបត្តិការស្វែងរក ជួយសង្គ្រោះ និងកំណត់អត្តសញ្ញាណពីមូលហេតុនៃឧបទ្ទវហេតុនេះផងដែរ៕
