អន្តរក្រសួង បានកំណត់រូបមន្ដសម្រាប់កែសម្រួលថ្លៃលក់រាយប្រេងឥន្ធនៈនៅកម្ពុជាឡើងវិញ ដើម្បីឱ្យថ្លៃលក់រាយប្រេងឥន្ធនៈនៅតាមស្ថានីយប្រេងឥន្ធនៈឡើងចុះតាមតម្លៃនៅលើទីផ្សារអន្ដរជាតិ។
យោងតាមប្រកាសរបស់អន្តរក្រសួង រួមមាន ក្រសួងពាណិជ្ជកម្ម ក្រសួងសេដ្ឋកិច្ចនិងហិរញ្ញវត្ថុ និងក្រសួងរ៉ែនិងថាមពល ចុះថ្ងៃទី២២ ខែមីនា ឆ្នាំ២០២២ បានសម្រេចកែសម្រួលរូបមន្តថ្លៃលក់រាយប្រេងឥន្ធនៈនៅតាមបណ្ដាស្ថានីយ ដោយកំណត់យក «តម្លៃរាយ/លីត្រ = មធ្យមភាគ MOPS + ពន្ធ +PREMIUM + អាករលើតម្លៃបន្ថែម (VAT OUT)»។
ប្រកាសអន្តរក្រសួងបានពន្យល់ថា MOPS ( Mean of Platt Singapore) សំដៅលើតម្លៃមធ្យមភាគនៃផលិតប្រេងឥន្ធនៈលក់ដុំនៅប្រទេសសិង្ហបុរី ដែលចេញផ្សាយដោយក្រុមហ៊ុន Platts ខណៈពាក្យ PREMIUM សំដៅលើចំណាយទូទៅ បូកពន្ធលើប្រាក់ចំណេញ និងប្រាក់ចំណេញ ហើយពន្ធសំដៅលើពន្ធគយ បូកអាករបន្ថែម បូកអាករពិសេស។
ប្រកាសដដែលបន្តថា តម្លៃ PREMIUM កំណត់ថ្មី ត្រូវបានកំណត់ ០,២០ដុល្លារក្នុងមួយលីត្រ សម្រាប់ប្រេងសាំងធម្មតា (EA92)។ ចំណែកតម្លៃ Premium ប្រេងម៉ាស៊ូត កំណត់ត្រឹម ០,២៣ដុល្លារក្នុងមួយលីត្រ ខណៈតម្លៃ Premium សាំងស៊ុបពែ មិនត្រូវបានកំណត់ទេ ដោយអាចលក់តម្លៃប្រកួតប្រជែង ប៉ុន្ដែតម្លៃមួយទាបជាងថ្លៃដែលបានគណនាដោយរូបមន្ដ។
រដ្ឋមន្ត្រីក្រសួងពាណិជ្ជកម្ម អាចចេញសេចក្ដីជូនដំណឹងភ្លាមៗ ដោយកំណត់ឱ្យចេញថ្លៃលក់រាយជូនក្រុមហ៊ុនប្រេងឥន្ធនៈនៅក្នុងរយៈពេល១០ថ្ងៃ ឬ១៥ថ្ងៃម្ដង ដើម្បីឱ្យមានសមាមាត្រគ្នារវាងតម្លៃប្រេងឥន្ធនៈនៅលើទីផ្សារអន្ដរជាតិ និងតម្លៃលក់រាយនៅទីផ្សារកម្ពុជា សម្រាប់រក្សាស្ថិរភាពនៃការផ្គត់ផ្គង់ប្រេងឥន្ធនៈនៅកម្ពុជា។
ប្រកាសដដែលក៏បានកំណត់ឱ្យគ្រប់ស្ថានីយលក់រាយប្រេងឥន្ធនៈទាំងអស់ ត្រូវមានប្រភេទផលិតផលប្រេងសាំងធម្មតា និងប្រេងម៉ាស៊ូត លក់ក្នុងតម្លៃមិនលើសពីថ្លៃដែលបានកំណត់ ដោយមិនអនុញ្ញាតឱ្យលក់តែប្រភេទប្រេងសាំងស៊ុបពែតែមួយមុខបានទេ។ ក្នុងករណីល្មើស ស្ថានីយលក់រាយប្រេងឥន្ធនៈទាំងនោះនឹងត្រូវពិន័យអន្តរការណ៍ជាប្រាក់មិនលើសពី ៤លានរៀល ហើយក្នុងករណីទទួលរងការពិន័យម្ដងរួចមកហើយ តែនៅតែបន្តប្រព្រឹត្តបទល្មើសដដែល ស្ថានីយលក់រាយប្រេងឥន្ធនៈនោះអាចនឹងរងនូវការបិទផ្អាកប្រតិបត្តិការជាបណ្ដោះអាសន្ន។
គួរបញ្ជាក់ថា តម្លៃប្រេងឥន្ធនៈនៅកម្ពុជាបានកើនឡើងជាបន្តបន្ទាប់ នារយៈពេលប៉ុន្មានខែចុងក្រោយនេះ ដោយបច្ចុប្បន្ននេះ តម្លៃប្រេងលក់រាយតាមស្ថានីយដែលកំណត់ដោយក្រសួងពាណិជ្ជកម្ម គឺសាំងធម្មតានិងម៉ាស៊ូត តម្លៃ៥ ៣០០រៀល ដូចគ្នា ខណៈសាំងស៊ុបពែតម្លៃ៥ ៩០០រៀល៕
