អង្គការសង្គមស៊ីវិល គ្រោងនឹងដាក់ញត្តិទៅក្រសួងបរិស្ថាននៅចុងខែមីនាខាងមុខ ដើម្បីស្នើសុំឱ្យបើកលំហសិទ្ធិសេរីភាពសហគមន៍ រួមទាំងអង្គការសង្គមស៊ីវិល ក្នុងការចុះល្បាតព្រៃនៅតាមតំបន់ការពារធម្មជាតិ និងតំបន់ផ្សេងៗឡើងវិញ។
ប្រធានកម្មវិធីផ្នែកស្រាវជ្រាវ និងតស៊ូមតិនៃសមាគមបណ្ដាញយុវជនកម្ពុជា លោក ហេង គឹមហុង ប្រាប់ វីអូឌី នាថ្ងៃព្រហស្បតិ៍នេះថា ការដាក់ញត្តិទៅកាន់ក្រសួងបរិស្ថាន គ្រោងនឹងធ្វើឡើងនៅថ្ងៃទី២៩ ខែមីនា ឆ្នាំ២០២២ ខាងមុខនេះ ដោយស្នើឱ្យក្រសួងគោរពសិទ្ធិជនជាតិដើមភាគតិច សហគមន៍ និងអង្គការសង្គមស៊ីវិល ក្នុងការចូលរួមការពារធនធានធម្មជាតិ ស្របតាមរដ្ឋធម្មនុញ្ញ និងច្បាប់ការពារតំបន់ការពារធម្មជាតិ។
ជាមួយគ្នានោះ អង្គការទាំងនោះក៏ស្នើទៅរដ្ឋាភិបាល ក៏ដូចជាក្រសួងបរិស្ថាន ឱ្យបង្ហាញការប្ដេជ្ញាចិត្តក្នុងការអនុវត្តកម្មវិធីជាតិដែលរដ្ឋាភិបាលបានដាក់បញ្ចូលក្នុងយុទ្ធសាស្ត្រចតុកោណ ដើម្បីថែរក្សាគម្របព្រៃឈើឱ្យបានចំនួន៦០ភាគរយក្នុងឆ្នាំ២០២៩ខាងមុខ និងបើកលំហសេរីភាពក្នុងការចុះល្បាតព្រៃ ជាដើម។
បើសិនជារដ្ឋាភិបាលនៅតែបិទមិនឱ្យក្រុមសហគមន៍ និងអង្គការសង្គមស៊ីវិលចុះល្បាតព្រៃទៀត លោក ហេង គឹមហុង បារម្ភថា ព្រៃឈើនៅកម្ពុជានឹងវិនាស ដោយសារបច្ចុប្បន្នបទល្មើសព្រៃឈើនៅតែមិនថយចុះ ខណៈថ្មីៗនេះ អង្គការអន្តរជាតិមួយបានរកឃើញថា ក្នុងឆ្នាំ២០២១ ព្រៃឈើនៅកម្ពុជាជាង៦ ០០០ហិកតាបានរងនូវការកាប់បំផ្លាញនោះ។
លោកថា៖ «ប្រសិនពុំមានការដោះស្រាយបញ្ហានេះទេ មែនទែនទៅ យើងមានការព្រួយបារម្ភ ព្រោះអីដើមឆ្នាំ២០២២ របាយការណ៍មួយរបស់គម្រោង ស៊ីចា [ឈ្មោះគម្រោងរបស់អង្គការមួយ] បានរកឃើញគម្របព្រៃឈើជាង១០ហិកតាត្រូវបានបាត់បង់នៅក្នុងតំបន់ការពារធម្មជាតិចំនួន២ ហើយក្នុងនោះ អង្គការលើកលែងទោសអន្តរជាតិ [Amnesty International] ពីការបាត់បង់គម្របព្រៃឈើដែរ។ អ៊ីចឹងបើសិននៅតែបិទសិទ្ធិសេរីភាព ពុំមានឆន្ទៈក្នុងការបើកលំហសិទ្ធិសេរីភាពឱ្យចូលរួមពិតប្រាកដទេ ពីសំណាក់សហគមន៍មូលដ្ឋាន យើងមានការព្រួយបារម្ភថា បទល្មើសព្រៃឈើនៅតែបន្តកើតមានឡើង»។
បើតាមរបាយការណ៍របស់អង្គការលើកលែងទោសអន្តរជាតិ (Amnesty International) ចេញផ្សាយកាលពីថ្ងៃទី២៨ ខែមករា ឆ្នាំ២០២២ បានបង្ហាញថា ក្នុងឆ្នាំ២០២១ ព្រៃឈើលើផ្ទៃដីកម្ពុជាជាង៦ ០០០ហិកតាបានរងនូវការកាប់បំផ្លាញនៅតំបន់ការពារព្រៃឡង់ និងព្រៃព្រះរការ ដោយមានការទទួលសំណូក និងការប្រព្រឹត្តអំពើពុករលួយរបស់អាជ្ញាធរពាក់ព័ន្ធ។
កាលពីថ្ងៃទី១៧ ខែមិថុនា ឆ្នាំ២០២១ ស្ថានទូតសហរដ្ឋអាមេរិកប្រចាំកម្ពុជា បានផ្ដាច់ជំនួយពីរដ្ឋាភិបាលកម្ពុជា លើគម្រោង «ព្រៃឡង់បៃតង» ឆ្លើយតបនឹងវិធានការរបស់រដ្ឋាភិបាលដែលបិទខ្ទប់សំឡេងនិងសកម្មភាពសកម្មជនការពារព្រៃឈើ មិនឱ្យចូលល្បាតបទល្មើសនៅតំបន់ព្រៃឡង់ ហើយព្រៃឈើក្នុងតំបន់ការពារមួយនេះនៅបន្តរងការកាប់បំផ្លាញ។
ជាមួយគ្នានេះ សមាគម អង្គការសង្គមស៊ីវិល សហគមន៍មូលដ្ឋាន និងសហគមន៍ជនជាតិដើមភាគតិច បាននាំគ្នាប្រារព្ធកម្មវិធីទិវាព្រៃឈើពិភពលោកឆ្នាំ២០២២ រយៈពេល១៥ថ្ងៃ ចាប់ពីថ្ងៃទី១៥ ដល់ទី៣០ ខែមីនានេះ ក្រោមប្រធានបទ ស្ដីពី “យើងមានសិទ្ធិចូលរួមការពារព្រៃឈើ ដើម្បីជីវិតនៅលើភពផែនដី”។
កាលពីថ្ងៃទី១០ ខែមីនា ឆ្នាំ២០២២ រដ្ឋមន្រ្តីក្រសួងមហាផ្ទៃ លោក ស ខេង បានថ្លែងដោយរម្លឹកអំពីភាពសម្បូរហូរហៀរនៃព្រៃឈើនៅកម្ពុជាកាលពីអតីតកាល ខណៈបច្ចុប្បន្ន លោកថា ព្រៃឈើនៅសល់តិចតួចប៉ុណ្ណោះ ដោយរកតែព្រៃសម្រាប់បាំងថ្ងៃមិនបានផង៕
សេចក្ដីកែតម្រូវ៖ «…ដើម្បីថែរក្សាគម្របព្រៃឈើឱ្យបានចំនួន៦៩ភាគរយក្នុងឆ្នាំ២០២៩ខាងមុខ…» ទៅជា «…ដើម្បីថែរក្សាគម្របព្រៃឈើឱ្យបានចំនួន៦០ភាគរយក្នុងឆ្នាំ២០២៩ខាងមុខ…»
