គណៈកម្មាធិការជាតិរៀបចំការបោះឆ្នោត (គ.ជ.ប) បញ្ជាក់ពីជំហរនៃការរំលាយបញ្ជីបេក្ខភាពនៅសង្កាត់ទួលស្វាយព្រៃទី១ មកពីគណបក្សភ្លើងទៀន ថាមានភាពត្រឹមត្រូវតាមនីតិវិធី និងបទបញ្ជាស្ដីពីដំណើរការបោះឆ្នោតជ្រើសរើសក្រុមប្រឹក្សាឃុំសង្កាត់ ដោយមិនមានភាពលម្អៀងទៅរកគណបក្សនយោបាយណាមួយឡើយ។
លោក សោម សូរីដា អគ្គលេខាធិការរង គ.ជ.ប បានធ្វើការអះអាងបែបនេះនៅចំពោះមុខអ្នកសារព័ត៌មានក្នុងសន្និសីទកាសែតមួយនៅទីស្ដីការ គ.ជ.ប ព្រឹកថ្ងៃទី២៥ ខែមីនានេះ។
លោក សោម សូរីដា បានលើកឡើងថា មូលហេតុដែលនាំឱ្យ គ.ជ.ប សម្រេចរំលាយចោលទាំងស្រុងនូវបញ្ជីបេក្ខភាពដែលឈរឈ្មោះជាមេឃុំចៅសង្កាត់របស់គណបក្សភ្លើងទៀន ក្នុងសង្កាត់ទួលស្វាយព្រៃទី១ ដោយសារបញ្ជីឈ្មោះនេះមានភាពមិនត្រឹមត្រូវ និងលួចក្លែងឯកសារសាធារណៈ។
លោកបន្តថា៖ «ឯកសារភ្ជាប់ទៅនឹងការសុំចុះបញ្ជីមានភាពមិនប្រក្រតី។ នៅក្នុងភាពមិនប្រក្រតីនេះ គឺសំដៅទៅលើការបំពេញប្រវត្តិរូបដោយក្រុមការងាររបស់គណបក្សភ្លើងទៀន និងផ្ដិតមេដៃជំនួសដោយគណបក្សភ្លើងទៀន ចំពោះបេក្ខជនដែលឈរឈ្មោះបោះឆ្នោតទី១។ ហើយទី២ទៀត សាម៉ី ឬក៏តំណាងគណបក្សភ្លើងទៀន ក៏បានសារភាពទៅលើបញ្ហានេះដែរ»។
កាលពីថ្ងៃទី២២ ខែមីនា លោក ប្រាជ្ញ ចន្ទ ប្រធានក្រុមប្រឹក្សាជំនុំជម្រះ គ.ជ.ប បានសម្រេចរំលាយបញ្ជីបេក្ខភាពរបស់គណបក្សភ្លើងទៀន ដែលឈរឈ្មោះជាចៅសង្កាត់ទួលស្វាយព្រៃទី១ ចេញពីបញ្ជីបោះឆ្នោតជ្រើសរើសក្រុមប្រឹក្សាឃុំសង្កាត់ សម្រាប់អាណត្តិទី៥នេះ។
ធ្លាប់ជាអតីតអភិបាលខេត្តត្បូងឃ្មុំ មកពីគណបក្សប្រជាជនកម្ពុជា លោក ប្រាជ្ញ ចន្ទ បានសម្រេចនៅក្នុងអង្គសវនាការរបស់ គ.ជ.ប ថាបញ្ជីឈ្មោះគណបក្សភ្លើងទៀន មានភាពមិនប្រក្រតី ដោយគណបក្សនេះអនុវត្តខុសពីបទប្បញ្ញត្តិនិងនីតិវិធីដូចមានចែងក្នុងច្បាប់ស្ដីពីការបោះឆ្នោតជ្រើសរើសក្រុមប្រឹក្សាឃុំសង្កាត់។
តាមរយៈសេចក្ដីប្រកាសព័ត៌មានរបស់ គ.ជ.ប ដែលចេញក្នុងថ្ងៃតែមួយ បង្ហាញថា ទាំងដើមបណ្ដឹងឈ្មោះ ម៉ៅ មុន្នី ជាបេក្ខភាពមកពីគណបក្សប្រជាជនកម្ពុជា និងបេក្ខជន៤រូប ដែលឈរជាចៅសង្កាត់ឱ្យគណបក្សភ្លើងទៀន គឺមានភាពស៊ីសង្វាក់គ្នា។ ផ្អែកលើចម្លើយសារភាព និងការចុះអង្កេតស្រាវជ្រាវរបស់អគ្គលេខាធិការដ្ឋាន គ.ជ.ប រកឃើញថា បេក្ខជនដែលឈរឈ្មោះទាំង៤រូបឱ្យគណបក្សភ្លើងទៀន ពិតជាមិនបានបំពេញនិងចុះហត្ថលេខាលើជីវប្រវត្តិសង្ខេបដោយផ្ទាល់ទេ ផ្ទុយទៅវិញ ក្រុមការងារគណបក្សភ្លើងទៀននៅសង្កាត់ទួលស្វាយព្រៃទី១ នៃខណ្ឌបឹងកេងកង រាជធានីភ្នំពេញ ជាអ្នកបំពេញនិងចុះហត្ថលេខាជំនួស។
ប្រតិកម្មនឹងការលើកឡើងរបស់មន្រ្តី គ.ជ.ប នេះ អ្នកនាំពាក្យគណបក្សភ្លើងទៀន លោក ថាច់ សេដ្ឋា ថ្លែងថា តាមពិត អ្វីដែលគណបក្សក្រៅរដ្ឋាភិបាលមួយនេះជំទាស់ការសម្រេចរបស់ស្ថាប័នជាតិរៀបចំការបោះឆ្នោត ដោយហេតុថា ដើមបណ្ដឹងក្នុងរឿងក្ដីនេះ គឺជាបេក្ខភាពឈរឈ្មោះជាចៅសង្កាត់ដូចគ្នា។
បើតាមអ្នកនាំពាក្យរូបនេះ ការដែលសមាជិកបក្សកាន់អំណាចចេញមកប្ដឹងដូច្នេះ ឆ្លុះបញ្ចាំងឱ្យឃើញពីការរំលោភអំណាច និងរូបភាពនៃការគំរាមកំហែងដោយពិតប្រាកដ។
លោកបន្តថា៖ «ប្រជាពលរដ្ឋខ្មែរ ប៉ុន្តែតួនាទីគាត់គឺជាបេក្ខជន ហើយអ៊ីចឹងឱ្យតែប្រជាពលរដ្ឋខ្មែរហ្នឹងអត់មានកំណត់តួនាទី និងឋានៈទេហ្អី? ឬយ៉ាងម៉េចហ្នឹង? គាត់ជាបេក្ខជនដែលមានភារកិច្ចនៅក្នុងប្រអប់មួយទៀត។ ដូច្នេះ បើមិនអ៊ីចឹងទេ មិនមែនគេចែងពីទំនាស់ផលប្រយោជន៍ទេ។ ប្រជាពលរដ្ឋដូចគ្នាតើ! អ៊ីចឹងធ្វើបានទាំងអស់ទៅចុះ?»
គិតមកដល់ពេលនេះ បេក្ខភាពឈរឈ្មោះជាចៅសង្កាត់ចំនួន៣ របស់គណបក្សភ្លើងទៀន ត្រូវបាន គ.ជ.ប រំលាយចោលទាំងស្រុងចេញពីបញ្ជីបោះឆ្នោតជ្រើសរើសក្រុមប្រឹក្សាឃុំសង្កាត់ ឆ្នាំ២០២២ ក្នុងនោះមាន ១សង្កាត់នៅក្នុងខណ្ឌបឹងកេងកង និង២ឃុំ-សង្កាត់ទៀតនៅខេត្តកំពង់ចាម។
នាយកប្រតិបត្តិអង្គការនិចហ្វិក លោក សំ គន្ធាមី ចាត់ទុកថា ការបន្តរំលាយបញ្ជីឈ្មោះ និងរូបភាពនៃការធ្វើទុកបុកម្នេញទៅលើបេក្ខភាពឈរជាមេឃុំចៅសង្កាត់នេះ បង្ហាញឱ្យឃើញពីការមិនគោរពសិទ្ធិផ្នែកនយោបាយពីបក្សដទៃ។ មួយវិញទៀត លោកថា ប្រសិនបើបរិយាកាសនយោបាយ មានភាពអួអាប់នៅមុនការបោះឆ្នោតមកដល់បែបនេះ ប្រាកដណាស់នឹងធ្វើឱ្យមានផលប៉ះពាល់ទៅដល់ដំណើរការបោះឆ្នោតជ្រើសរើសក្រុមប្រឹក្សាឃុំសង្កាត់នាពេលខាងមុខ។
លទ្ធផលបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៤ កាលពីឆ្នាំ២០១៧ គណបក្សសង្រ្គោះជាតិដែលត្រូវបានតុលាការរំលាយ កាលណោះ ឈានទៅគ្រប់គ្រងជាចៅសង្កាត់ស្ទើរពាក់កណ្ដាល សម្រាប់មណ្ឌលនៅភ្នំពេញ។ លទ្ធផលផ្លូវការដែលប្រកាសដោយ គ.ជ.ប បង្ហាញថា ដោយឡែក សម្រាប់សង្កាត់ទួលស្វាយព្រៃទី១ ដែលកំពុងមានវិវាទនេះ គណបក្សប្រឆាំងដែលត្រូវបានតុលាការរំលាយ ឈ្នះអាសនៈជាចៅសង្កាត់រងទី២ និងមានសមាជិកក្រុមប្រឹក្សាឃុំសង្កាត់ប្រហែលនឹងគណបក្សប្រជាជនកម្ពុជាដែរនៅក្នុងមណ្ឌលមួយនេះ៕