តុលាការកំពូលសម្រេចកម្កល់សាលដីកាសំណុំរឿង«សមគំនិតក្នុងអំពើញុះញង់ឱ្យប្រព្រឹត្តអំពើបង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» លើសកម្មជនដីធ្លី និងសកម្មជនបក្សប្រឆាំងត្រូវបានតុលាការរំលាយចំនួន ៧នាក់នៅខេត្តត្បូងឃ្មុំទុកជាបានការដដែល។
ការសម្រេចកម្កល់នេះ ធ្វើឡើងបន្ទាប់ពីតុលាការកំពូលបើកសវនាការកាលពីថ្ងៃទី២៣ ខែមីនា ឆ្នាំ២០២២ តាមបណ្ដឹងសាទុក្ខមេធាវីការពារក្ដីឱ្យសកម្មជនបក្សប្រឆាំងដែលត្រូវបានតុលាការរំលាយ និងសកម្មជនដីធ្លីចំនួន ៧នាក់ ដោយតុលាការបានដោះលែងចំនួន ៦នាក់ បន្ទាប់ពីពួកគេអនុវត្តទោសចប់ ប៉ុន្តែលោក សែម ចំណាន ដែលជាសកម្មជនដីធ្លីភូមិស្រែប្រាំង នៅស្រុកតំបែរមិនទាន់ត្រូវបានដោះលែងនៅឡើយ។
ក្នុងបន្ទប់សវនាការ នាថ្ងៃពុធនេះ ប្រធានក្រុមប្រឹក្សាជំនុំជម្រះនៃតុលាការកំពូលលោក សឹង បញ្ញាវុឌ្ឍ បានសម្រេចកម្កល់សាលដីកាបណ្ដឹងសាទុក្ខរបស់សកម្មជនដីធ្លី និងសកម្មជនបក្សប្រឆាំងទុកជាបានការដដែល ដោយថា ការសម្រេចរបស់សាលាដំបូងខេត្តត្បួងឃ្មុំ និងសាលាឧទ្ធរណ៍ គឺជារឿងត្រឹមត្រូវ។
យ៉ាងណា ការប្រកាសសាលដីកានាថ្ងៃពុធនេះ មិនមានវត្តមានជនជាប់ចោទទាំង ៧នាក់ និងមេធាវីចូលរួមស្ដាប់ឡើយ។
ជនជាប់ចោទចំនួន៧នាក់ ក្នុងសំណុំរឿង «សមគំនិតក្នុងអំពើញុះញង់ឱ្យប្រព្រឹត្តអំពើបង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» នេះ រួមមានឈ្មោះ ផុន សុផល, ម៉ក់ សំអាន, ព្រៅ ចាន់ធឿន, ខន ទន, អ៊ុំ យ៉េត, ស៊ូ យាន និង សែម ចំណាន។
ប៉ុន្តែក្នុងចំណោមពួកគេទាំង៧នាក់ គឺមានជនជាប់ចោទចំនួន៦នាក់ត្រូវបានដោះលែងចេញពីពន្ធនាគារ បន្ទាប់ពីពួកគេបានអនុវត្តទោសគ្រប់១ឆ្នាំ ខណៈលោក សែម ចំណាន មិនទាន់ត្រូវបានដោះលែងនៅឡើយ ដោយសាររូបលោកមានជាប់បទចោទក្នុងសំណុំរឿងដីធ្លីមួយផ្សេងទៀត។
លោក សែម ចំណាន ត្រូវបានសាលាដំបូងខេត្តត្បូងឃ្មុំ ចេញសាលក្រមសម្រេចផ្ដន្ទាទោសដាក់ពន្ធនាគារ៧ឆ្នាំ ក្រោមបទចោទ «កំហែងយកដោយមានស្ថានទម្ងន់ទោស ប្រើប្រាស់អាវុធ» កាលពីខែមិថុនា ឆ្នាំ២០២០ ពាក់ព័ន្ធនឹងរឿងតវ៉ាដីធ្លី។ ក្រោយពីមានការសម្រេចនេះ មេធាវីការពារក្ដីបានប្ដឹងសាទុក្ខសាលាឧទ្ធរណ៍ ហើយសាលាឧទ្ធណ៍សម្រេចឱ្យលោកអនុវត្តទោសក្នុងពន្ធនាគារ២ឆ្នាំវិញ។
តំណាងសហគមន៍ស្រែប្រាំង នៅភូមិស្រែប្រាំង ឃុំត្រពាំងព្រីង ស្រុកតំបែរ ខេត្តត្បូងឃ្មុំ លោក សែម ចំណាន ត្រូវបានអាជ្ញាធរចាប់ខ្លួនកាលពីថ្ងៃទី១៥ ខែមករា ឆ្នាំ២០២១ នៅស្រុកអន្លង់វែង ខេត្តឧត្ដរមានជ័យ ហើយបានបញ្ជូនមកកាន់ពន្ធនាគាខេត្តត្បូងឃ្មុំ៕