មន្ត្រីជាន់ខ្ពស់ក្រសួងមហាផ្ទៃ បានអះអាងថា ជនដៃដល់ម្នាក់ក្នុងសំណុំរឿងគប់គ្រាប់បែកដៃទៅលើក្រុមបាតុករ ដែលដឹកនាំដោយលោក សម រង្ស៊ី កាលពី២៥ឆ្នាំមុន បានស្លាប់ហើយ ដោយសារគ្រោះថ្នាក់ចរាចរណ៍ ដែលធ្វើឱ្យតម្រុយនៃការស៊ើបអង្កេតឈានទៅចាប់ខ្លួនជនល្មើសត្រូវបានបាត់ដាន។
ការលើកឡើងរបស់មន្ត្រីជាន់ខ្ពស់ក្រសួងមហាផ្ទៃនេះ ស្របពេលគណបក្សក្រៅរដ្ឋាភិបាលមួយ នៅព្រឹកថ្ងៃពុធនេះ បានដឹកនាំរៀបចំពិធីរំលឹកខួប ២៥ឆ្នាំនៃព្រឹត្តិការណ៍គប់គ្រាប់បែកដៃទៅលើក្រុមបាតុករ ដែលដឹកនាំដោយលោក សម រង្ស៊ី បណ្ដាលឱ្យមនុស្សយ៉ាងហោចណាស់ចំនួន ១៦នាក់ស្លាប់ និងរបួសជិត ២០០នាក់ ។
អ្នកនាំពាក្យក្រសួងមហាផ្ទៃ លោក ខៀវ សុភ័គ មានប្រសាសន៍ថា សមត្ថកិច្ចកម្ពុជា បានសហការជាមួយសមត្ថកិច្ច FBI ដើម្បីស៊ើបអង្កេត និងស្វែងជនដៃដល់ដែលបានគប់គ្រាប់បែកទៅលើក្រុមបាតុករដែលធ្វើបាតុកម្មដឹកនាំដោយលោក សម រង្ស៊ី កាលពីថ្ងៃទី៣០ ខែមីនា ឆ្នាំ១៩៩៧។ លោកបន្តថា អំឡុងពេលស៊ើបអង្កេតនោះ សមត្ថកិច្ចបានសួរសាក្សី និងអ្នកពាក់ព័ន្ធផ្សេងទៀត ដោយរកឃើញជនដៃដល់ម្នាក់ ដែលលោកថា ជាអ្នកគប់គ្រាប់បែកផ្ទាល់ចូលទៅក្នុងព្រឹត្តិការណ៍កាលពី ២៥ឆ្នាំមុន។
លោកបញ្ជាក់ថា សមត្ថកិច្ចបានតាមចាប់ខ្លួន ប៉ុន្តែជនដៃដល់រូបនោះ បានរត់គេចខ្លួន ហើយទៅចូលជាមួយគណបក្សនយោបាយមួយ ដែលលោកសុំមិនបញ្ចេញឈ្មោះ តែក្រោយមកលោកថាជនដៃដល់រូបនោះក៏បានស្លាប់ដោយសារគ្រោះថ្នាក់ចរាចរណ៍តែម្តង។
លោកថា៖«បានរត់គេខ្លួនទៅក្រោមការគ្រប់គ្រងរបស់គណបក្សមួយថាអ៊ីចឹងចុះ ខ្ញុំមិនបញ្ចេញឈ្មោះទេ ប៉ុន្តែក្រោយពីមានព្រឹត្តិការណ៍ស្រាប់តែលឺសូរអាប្រេស៊ីលហ្នឹង គាត់ជិះឡានងាប់បាត់ រកអាប្រេស៊ីលមិនឃើញប្រដោយ គឺស្លាប់បាត់ហើយ។ ដូច្នេះតាំងពីនោះ ការស្រាវជ្រាវរបស់យើងមុនជិតដល់ចុងបិទបញ្ចប់ និយាយរួមជិតចាប់បានជនល្មើសហើយ តែបាត់ដានពីនោះទៅ បាត់ដានរហូត តាំងពីនោះ លែងមានព័ត៌មានអី ដើម្បីបំភ្លឺផ្លូវទៀត បាត់ត្រឹមអាប្រេស៊ីលហ្នឹងតែម្ដង»។
លោក ខៀវ សុភ័គ បន្តថា ទោះបីជា ជនដៃដល់ឈ្មោះប្រេស៊ីល ដែលអះអាងថា ស្លាប់បាត់ទៅហើយក៏ដោយ ប៉ុន្តែលោកថា សំណុំរឿងនេះរដ្ឋមន្ត្រីក្រសួងមហាផ្ទៃ លោក ស ខេង នៅមិនទាន់បានប្រកាសបិទបញ្ចប់នៅឡើយទេ។
គណបក្សភ្លើងទៀន នៅថ្ងៃពុធនេះ បានរៀបចំពិធីបង្សុកូលរាប់បាត្រប្រគេនព្រះសង្ឃ ដើម្បីឧទ្ទិសកុសលជូនដល់ដួងវិញ្ញាណក្ខន្ធវីរបាតុករដែលបានបាត់បង់ជីវិត ក្នុងសោកនាដកម្មវាយប្រហារដោយគ្រាប់បែកដៃនៅមុខអតីតមន្ទីរដ្ឋសភារាជធានីភ្នំពេញកាលថ្ងៃទី៣០ ខែមីនា ឆ្នាំ១៩៩៧ បណ្ដាលឱ្យមនុស្សយ៉ាងហោចណាស់ចំនួន ១៦នាក់ស្លាប់ និងរបួសជិត ២០០នាក់។
អ្នកនាំពាក្យគណបក្សភ្លើងទៀន លោក ថាច់ សេដ្ឋា អះអាងថា បើគណបក្សនេះ ឈ្នះការបោះឆ្នោតខាងមុខនឹងចាត់វិធានការច្បាប់លើជនដៃដល់ និងអ្នកនៅពីក្រោយខ្នងនៃការគប់គ្រាប់បែកទៅលើក្រុមបាតុករ ដែលដឹកនាំដោយលោក សម រង្ស៊ី កាលពី២៥ឆ្នាំមុន ដើម្បីផ្ដល់យុត្តិធម៌ដល់គ្រួសារជនរងគ្រោះ។
លោកថា៖« បើយើងកាន់អំណាចវិញ យើងមិនខ្លាចទៅលើបុគ្គលណាទេ ព្រោះអនុវត្តច្បាប់ឱ្យស្មើភាពគ្នា ដូចមានចែងក្នុងរដ្ឋធម្មនុញ្ញថា ប្រជាពលរដ្ឋមានសិទ្ធិស្មើភាពចំពោះមុខច្បាប់ មិនមែនខ្លួនជាមន្ត្រី ជាទាហាន ជាយោធា ជាប៉ូលីសរដ្ឋមន្ត្រីកុងសីប្រព្រឹត្តបទល្មើសស្រេចអំពើចិត្តគឺអត់ទេ យើងត្រូវស្រាវជ្រាវរកឱ្យឃើញ មកផ្ដន្ទាទោស មិនត្រឹមអ្នកដៃដល់នៅពីក្រោយខ្នង ក៏ត្រូវមានទោសដូចគ្នា អាហ្នឹង គឺយើងមិនអាចលើកលែងបានទេ ពីព្រោះនៅពេលយើងដឹងនាំរដ្ឋាភិបាល យើងមានលទ្ធភាពគ្រប់គ្រាន់ ទាំងប្រព័ន្ធច្បាប់ទាំងអី យើងនឹងអនុវត្តច្បាប់ហ្នឹង ហើយយើងមានទាំងកម្លាំងប៉ូលីសកម្លាំងអីទាំងអស់»។
ប្រធានសហភាពសហជីពកម្ពុជា លោក រ៉ុង ឈុន កត់សម្គាល់ថា ពន្លឺយុត្តិធម៌សម្រាប់គ្រួសារជនរងគ្រោះបានទទួលខ្លះៗហើយ តាមរយៈតុលាការបារាំង ដែលបច្ចុប្បន្ន តុលាការប្រទេសបារាំងកំពុងកោះហៅអ្នកពាក់ព័ន្ធក្នុងព្រឹត្តិការណ៍គប់គ្រប់បែកនោះមកសវនាការ។
លោកបន្តថា ដោយសារសំណុំរឿងនេះពាក់ព័ន្ធមន្ត្រីធំៗក្នុងជួរដ្ឋាភិបាល ទើបធ្វើឱ្យអាជ្ញាធរកម្ពុជាពិបាកវែកមុខរកជនដៃដល់ និងអ្នកនៅពីក្រោយខ្នង។
លោកថា៖«អាជ្ញាធរកម្ពុជាយើងមានសមត្ថភាពដែលអាចវែកមុខរកអ្នកដែលបោកគ្រាប់បែក ឬអ្នកដៃដល់ មកផ្ដន្ទាទោស ក៏ប៉ុន្តែបញ្ហានេះ ពាក់ព័ន្ធនឹងអ្នកមានតួនាទីធំៗ ដូច្នេះ ហើយបានជាអាជ្ញាធរកម្ពុជាយើង មិនបានវែកមុខរកអ្នកដៃដល់មកផ្ដន្ទាទោស»។
នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ លោក អំ សំអាត មានប្រសានស៍ថា រយៈពេល ២៥ ឆ្នាំ ហើយដែលគ្រួសារជនរងគ្រោះនៅមិនទាន់ទទួលបានយុត្តិធម៌ ខណៈជនដៃដល់ និងអ្នកនៅពីក្រោយខ្នងសំណុំរឿងនេះ មិនទាន់ត្រូវបានចាប់ខ្លួនយកមកផ្ដន្ទាទោសនៅឡើយ។
យ៉ាងណា លោកជំរុញទៅអាជ្ញាធរកម្ពុជា ឱ្យស៊ើបអង្កេតរឿងនេះបន្ថែមទៀត។ លោកថា ប្រសិនបើសិនបើរដ្ឋាភិបាលនៅតែមិនអាចចាប់ខ្លួនជនដៃដល់ និងអ្នកពាក់ព័ន្ធរឿងនេះ មកដាក់ទោសទេ វានឹងបង្កើតជាវប្បធម៌និទណ្ឌភាព ដោយសារអំពើឧក្រិដ្ឋកម្មនេះ ជាព្រឹត្តិការណ៍ប្រវត្តិសាស្ត្រមួយនៅកម្ពុជា។
លោកថា៖«បញ្ហាទាំងអស់នេះ វាជាវប្បធម៌មួយដែលមិនល្អ ដែលគ្មានការទប់ស្កាត់ និងរាំងខ្ទប់ព្រឹត្តិការណ៍របៀបនេះ ។ អ៊ីចឹង ជាវប្បធម៌មួយដ៏អាក្រក់ ហើយវាជាគំនូរមួយដ៏អាក្រក់ ដែលព្រឹត្តិការណ៍ដ៏ធំធេង ដែលយើងមើលទៅសោកនាកម្មមួយដ៏ធំធេងមួយ ហើយមិនមានជនណាម្នាក់ចាប់មកផ្ដន្ទាទោស តាមផ្លូវច្បាប់ ដើម្បីស្វែងរកយុត្តិធម៌សម្រាប់គ្រួសារជនរងគ្រោះ»។
ពាក់ព័ន្ធនឹងរឿងនេះ កាលពីថ្ងៃទី២៩ ខែមីនា អង្គការឃ្លាំមើលសិទ្ធិមនុស្សអន្តរជាតិ ជំរុញជាថ្មីទៀតទៅតុលាការបារាំងឱ្យសហការជាមួយប៉ូលិសអន្តរជាតិអាំងទែរប៉ូល ចេញសំណើរឱ្យចាប់ខ្លួន មេអង្គរក្សដ៏មានឥទ្ធិពល ២រូប របស់លោកនាយករដ្ឋមន្រ្តី ហ៊ុន សែន ដែលជាប់ពាក់ព័ន្ធរឿងក្តីគប់គ្រាប់បែកដៃចូលក្រុមបាតុករដែលមានលោក សម រង្ស៊ី ជាអ្នកនាំដឹកនាំ កាលពី ២៥ឆ្នាំមុន។
ការជំរុញនេះ បានធ្វើឡើងបន្ទាប់ពីតុលាការប្រទេសបារាំង បានចេញដីកាកោះហៅ លោក ហ៊ុយ ពិសិដ្ឋ និងលោក ហ៊ីង ប៊ុនហៀង ដែលចេញដោយចៅក្រម លោក សាប៊ីន ឃើរីស(Sabine Kheris) ជាអនុប្រធានផ្នែកស៊ើបអង្កេត នៃតុលាការប្រទេសបារាំង កាលពីចុងខែធ្នូ ឆ្នាំ២០២១ កន្លងទៅ។
នៅក្នុងដីកាកោះហៅនោះ បង្ហាញថា មានភស្តុតាងបញ្ជាក់ ពីលោក ហ៊ុយ ពិសិដ្ឋ និងលោ ហ៊ីង ប៊ុនហៀង ដែលមានតួនាទីជាប្រធាន និងអនុប្រធាន នៃកងអង្គរក្សពិសេស របស់លោកនាយករដ្ឋមន្រ្តី បានរៀបចំ និងអនុវត្តការវាយប្រហារ ដោយគ្រាប់បែកដៃ កាលពីពីថ្ងៃទី៣០ ខែ មីនា ឆ្នាំ១៩៩៧ ដោយកំណត់យកលោក សម រង្ស៊ី ជាគោលដៅ។
ដីកាបន្តទៀតថា លោកនាយឧត្តមសេនីយ៍ ហ៊ុយ ពិសិដ្ឋ បានដាក់ពង្រាយទាហាន របស់ខ្លួនដែលបំពាក់អាវុធគ្រប់ដៃ និងស្ថិតក្នុងប្រុងជើងការដើម្បីត្រៀមប្រយុទ្ធ ខណៈនាយឧត្តមសេនីយ៍ ហ៊ីង ប៊ុនហៀង វិញជាមនុស្សមានឥទ្ធិពលបន្ទាប់ដែលបានអនុវត្តការវាយប្រហារពេលនោះ។ យ៉ាងណា សម្រាប់ លោក ហ៊ីង ប៊ុនហៀង បានច្រានចោលការចោទប្រកាន់ទាំងនេះ និងមិនខ្វល់ចំពោះការលើកឡើងរបស់អង្គការអន្តរជាតិនោះឡើយ៕