គណបក្សនយោបាយម៉ាឡេស៊ីមួយ បានសម្ដែងការព្រួយបារម្ភចំពោះការជួញដូរមនុស្ស ការរំលោភបំពានលើរូបរាងកាយ និងពលកម្មដោយបង្ខំនៅក្នុងប្រទេសកម្ពុជា ខណៈដែលពួកគេបាននាំឪពុកម្តាយរបស់ជនរងគ្រោះក្នុងករណីទាំងនេះមកធ្វើសន្និសីទសារព័ត៌មានមួយកាលពីថ្ងៃពុធ ដើម្បីស្នើសុំឱ្យមានការជួយសង្គ្រោះពួកគេ។ នេះបើយោងតាមប្រព័ន្ធផ្សព្វផ្សាយក្នុងស្រុករបស់ប្រទេសម៉ាឡេស៊ី។
យោងតាមអង្គការក្រៅរដ្ឋាភិបាលកម្ពុជា ស្ថានទូតនៃប្រទេសឥណ្ឌូនេស៊ី វៀតណាម ថៃ ប៉ាគីស្ថាន និងចិន កាលពីពេលកន្លងទៅក៏ធ្លាប់បានបង្ហាញក្តីព្រួយបារម្ភទាក់ទងនឹងស្ថានការណ៍ដូចគ្នានេះដែរ ខណៈអាជ្ញាធរថៃបានឱ្យដឹងកាលពីពេលថ្មីៗនេះថា ពួកគេក៏គ្រោងមកបញ្ជូនជនជាតិរបស់ខ្លួនប្រមាណ ៣ ០០០នាក់ចេញពីទីតាំងឆបោកនានានៅកម្ពុជាផងដែរ។
Malaysian Chinese Association (MCA) ជាគណបក្សនយោបាយមួយដែលតំណាងឱ្យជនជាតិចិន-ម៉ាឡេស៊ី និងជាផ្នែកនៃសម្ព័ន្ធនយោបាយដ៏សំខាន់មួយបានលើកឡើងថា ជនរងគ្រោះសញ្ជាតិម៉ាឡេស៊ីមួយចំនួន ជាយុវតីដែលមានអាយុតិចបំផុត ១៧ឆ្នាំ ហើយពួកគេទាំងនោះត្រូវបានឃុំឃាំងនៅក្នុងអគារក្រោមការយាមកាមដោយសន្តិសុខប្រដាប់ដោយអាវុធ និងរងនូវការរំលោភបំពានលើរូបរាងកាយទៀតផង។ នេះបើតាមសារព័ត៌មាន The Star របស់ម៉ាឡេស៊ី។
សារព័ត៌មានដដែលបន្តថា លោក Michael Chong ដែលជាប្រធានផ្នែកសេវាសាធារណៈ និងបណ្តឹងរបស់គណបក្សខាងលើបានលើកឡើងថា៖ «ប្រសិនបើជនរងគ្រោះគឺជាជនជាតិម៉ាឡេស៊ី ពួកគេនឹងត្រូវបានផ្តល់ជូននូវកុំព្យូទ័រយួរដៃដើម្បីធ្វើសកម្មភាពឆបោកប្រជាជនម៉ាឡេស៊ីដូចគ្នា។ ហើយក្នុងករណីដែលពួកគេធ្វើកិច្ចការងារនេះមិនបានល្អ ឬមិនអាចបោកប្រាស់នរណាម្នាក់បាននោះទេ ពួកគេនឹងត្រូវរងនូវការវាយដំជាក់ជាមិនខាន»។
ប្រភពដដែលបន្ថែមថា៖ «ជនរងគ្រោះដែលទាក់ទងមកកាន់ខ្ញុំមានចំនួន ១០នាក់។ ខ្ញុំគិតថាថា ជនរងគ្រោះសរុបមានយ៉ាងតិចណាស់ក៏ ១០០នាក់ដែរ។ ខ្ញុំទទួលបានករណីជាង ១០ រួចមកហើយដែលស្នើសុំឱ្យមានការជួយសង្រ្គោះពីរូបខ្ញុំ ប៉ុន្តែមានតែ ២ករណីប៉ុណ្ណោះដែលត្រូវបានជួយសង្គ្រោះ»។
សារព័ត៌មាន The Star ដដែលបានរាយការណ៍ឱ្យដឹងទៀតថា យោងតាមសារដែលបង្ហាញទៅកាន់អ្នកសារព័ត៌មាន ជនរងគ្រោះម្នាក់បានលើកឡើងថា មានជនជាតិម៉ាឡេស៊ីចំនួន ៥០នាក់ត្រូវបានឃុំខ្លួននៅក្នុងទីតាំងដូចគ្នាជាមួយខ្លួន។
យោងតាមសារព័ត៌មានអនឡាញ Free Malaysia Today ឱ្យដឹងថា ឪពុកម្តាយរបស់ជនរងគ្រោះពីររូបក៏បានថ្លែងនៅក្នុងសន្និសីទកាសែតដោយបានលើកឡើងអំពីការស្នើសុំឱ្យមានការជួយសង្រ្គោះពីកូនៗរបស់ពួកគេផងដែរ។
សារព័ត៌មានដដែលនេះ បានស្រង់សម្ដីឪពុករបស់ជនរងគ្រោះអាយុ ១៨ឆ្នាំមួយរូបដែលបានថ្លែងថា៖ «គាត់ [កូនដែលជាជនរងគ្រោះ] បានទូរសព្ទមកកាន់ខ្ញុំដោយប្រាប់ថា ការងាររបស់គាត់គឺត្រូវឆបោកអ្នកដទៃតាមរយៈទូរសព្ទ ហើយប្រសិនបើខ្លួនបដិសេធក្នុងការធ្វើកិច្ចការងារនេះ ពួកគេនឹងវាយដំខ្លួន»។
ជាមួយគ្នានេះ សារព័ត៌មាន The Star ក៏បានស្រង់សម្ដីម្តាយរបស់ជនរងគ្រោះអាយុ ២៤ឆ្នាំមួយរូបយកមកចុះផ្សាយថា៖ «គាត់ [កូនរបស់ខ្លួន] មានការភ័យខ្លាចយ៉ាងខ្លាំង ហើយបានថ្លែងថា អគារដែលខ្លួនស្នាក់នៅត្រូវបានចាក់សោរ ខណៈដែលច្រកចូលត្រូវបានយាមយ៉ាងតឹងរ៉ឹងដោយខ្មាន់កាំភ្លើង ដោយមិនអាចចេញពីអគារនេះបាននោះទេ»។
ទាក់ទិនករណីនេះ លោក Michael Chong បានបន្ថែមថា មន្រ្តីនគរបាលម៉ាឡេស៊ីក៏បាននិងកំពុងតែធ្វើការជាមួយប៉ូលិសអន្តរជាតិ Interpol ផងដែរ។ ទោះជាយ៉ាងណា ពួកគេអាចជួយសង្រ្គោះបានតែជនរងគ្រោះដែលបានរាយការណ៍មកតែប៉ុណ្ណោះ និងបានជំរុញឱ្យជនរងគ្រោះទាំងឡាយទាក់ទងទៅកាន់ស្ថានទូត។
ទាក់ទិនផែនការរបស់អាជ្ញាធរថៃក្នុងការបញ្ជូនមន្ត្រី និងនាវាកងទ័ពជើងទឹកមកកាន់ប្រទេសកម្ពុជា ដើម្បីប្រមូលជនជាតិថៃប្រមាណ ៣ ០០០នាក់ចេញពីទីតាំងដែលបម្រើការនៅក្រុមប្រតិបត្តិការឆបោកតាមប្រព័ន្ធអនឡាញនានានៅកម្ពុជា ឱ្យត្រឡប់ទៅកាន់ប្រទេសខ្លួនវិញ អ្នកនាំពាក្យអគ្គស្នងការដ្ឋាននគរបាលជាតិ លោក ឆាយ គឹមឃឿន បានបង្ហាញការគាំទ្រក្នុងកិច្ចសហការនេះ។
អ្នកនាំពាក្យរូបនេះថ្លែងថា៖ «យើងត្រូវតែសហការ ពីព្រោះយើងគឺជាប្រទេសជិតខាងជាមួយគ្នា ហើយក៏ជាសមាជិកនៃនគរបាលអាស៊ានដូចគ្នាផងដែរ។ ទី២ បទល្មើសនេះ គឺជាឧក្រិដ្ឋកម្មមួយនៅក្នុងប្រធានបទដែលត្រូវការកិច្ចសហប្រតិបត្តិការ ដូចជាការជួញដូរមនុស្ស ការបង្ខាំងមនុស្ស និងការឆ្លងដែនខុសច្បាប់ជាដើម។ ទាំងអស់នេះ គឺជាវិស័យដែលតម្រូវឱ្យមានកិច្ចសហប្រតិបត្តិការ»។
ស្ថានទូតជប៉ុនប្រចាំកម្ពុជា បានឱ្យដឹងកាលពីសប្តាហ៍មុនថា ខ្លួនមិនបានដឹងអំពីករណីពលរដ្ឋរបស់ខ្លួនណាម្នាក់ ដែលកំពុងតែត្រូវបានឃុំឃាំងឱ្យធ្វើជាទាសករនៅកម្ពុជានោះទេ ហើយខ្លួនសុំមិនធ្វើការអត្ថាធិប្បាយទាក់ទងនឹងករណីនេះឡើយ៕
បកប្រែ និងសម្រួលដោយ លោក ភុន ច័ន្ទឧសភា ចេញពីអត្ថបទដើមជាភាសាអង់គ្លេស៖
