លោកនាយករដ្ឋមន្ត្រី ហ៊ុន សែន បានប្រាប់ឱ្យរដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល សិក្សាលើកគម្រោងរកដៃគូដើម្បីកែលម្អរផ្លូវរថភ្លើងចាស់ អភិវឌ្ឍន៍ទៅជាផ្លូវរថភ្លើងល្បឿនលឿនជំនួសវិញ។
លោក ហ៊ុន សែន ថ្លែងថា រដ្ឋាភិបាលកំពុងគិតគូអភិវឌ្ឍន៍ហេដ្ឋារចនាសម្ព័ន្ធប្រព័ន្ធផ្លូវដែកដែលមានស្រាប់ ព្រោះជាប្រព័ន្ធផ្លូវដែកហួសសម័យដែលធ្វើដំណើរបានតែ២០ឬ៣០គីឡូម៉ែត្រក្នុង១ម៉ោង ហើយជំនួសដោយផ្លូវដែកល្បៀនលឿនទាំងពីរទិសតែម្ដង។ ការថ្លែងនេះ ធ្វើឡើងនៅក្នុងពិធីសម្ពោធដាក់ឱ្យប្រើប្រាស់ផ្លូវ ៣៨ខ្សែក្នុងក្រុងសៀមរាប នាព្រឹកថ្ងៃទី៤ ខែមេសា ឆ្នាំ២០២២នេះ។
លោកថា គម្រោងអភិវឌ្ឍនេះ គឺត្រូវមានការតភ្ជាប់ខ្សែរថភ្លើងសម្រាប់ការដឹកជញ្ជូននៅក្នុងប្រទេសនិងការតភ្ជាប់ជាមួយប្រទេសជិតខាង ដោយបច្ចុប្បន្ននេះកម្ពុជាមានខ្សែរថភ្លើងពីរខ្សែ ដោយមួយខ្សែភ្ជាប់ពីភ្នំពេញទៅប៉ោយប៉ែត និងពីភ្នំពេញទៅខេត្តព្រះសីហនុ។
លោក ហ៊ុន សែន ក៏ជំរុញឱ្យរដ្ឋមន្រ្ដីក្រសួងសាធារណការ លោក ស៊ុន ចាន់ថុល ស្វែងរកដៃគូប្រតិបត្តិការលើគម្រោងខ្សែរថភ្លើងល្បឿនលឿននេះឱ្យបានឆាប់ ដើម្បីឱ្យទាន់សភាពការជឹកជញ្ជូននាពេលបច្ចុប្បន្ន។
លោក បានបញ្ជាក់ថា៖ « រកដៃគូដើម្បីធ្វើជាផ្លូវរថភ្លើងល្បឿនលឿនលើផ្លូវរថភ្លើងចាស់ដដែល ហើយក៏ដាក់ឱ្យលោក ស៊ុន ចាន់ថុល ធ្វើការសិក្សានិងពិចារណាលើកគម្រោងរកដៃគូដើម្បីពិភាក្សាទៅរកបញ្ហានេះ ប្រសិនបើទុកដំណើរការបៀបនេះ ខិកខិកខិកអីចឹង វាទៅអត់រួច តាមមិនទាន់សភាពការ»។
កម្ពុជាមានផ្លូវរថភ្លើងពីរខ្សែ ដោយខ្សែទី១ ភ្ជាប់ពីភ្នំពេញទៅប៉ោយប៉ែត ជាប់ព្រំដែនប្រទេសថៃមានប្រវែង ៣៨៦គីឡូម៉ែត្រ ត្រូវបានសាងសង់ឡើងពីឆ្នាំ១៩២៩ ដល់ឆ្នាំ១៩៤២ និង ខ្សែទី២ ពីភ្នំពេញទៅក្រុងព្រះសីហនុ ដោយឆ្លងកាត់ខេត្តកំពត មានប្រវែង ២៦៦គីឡូម៉ែត្រ ត្រូវបានសាងសង់ពីឆ្នាំ១៩៦០ ដល់ឆ្នាំ១៩៦៩ ។
ក្រៅពីគម្រោងវិនិយោគផ្លូវរថភ្លើងល្បឿនលឿនលើផ្លូវចាស់នេះ លោក ហ៊ុន សែន ក៏ស្នើឱ្យពិនិត្យមើលលទ្ធភាពតភ្ជាប់ផ្លូវពីខេត្តសៀមរាប ទៅខេត្តបាត់ដំបងផងដែរ ដើម្បីសម្រួលដល់ការធ្វើដំណើរ និងជួយដល់ជីវភាពរបស់ប្រជាពលរដ្ឋ៕
