សកម្មជនសិទ្ធិមនុស្ស បានស្នើទៅក្រសួងមហាផ្ទៃ និងក្រសួងកិច្ចការនារី ចាត់វិធានការលើអាជ្ញាធរដែលពួកគេអះអាងថា បានប្រើហិង្សា និងបៀតបៀនកេរ្តិ៍ខ្មាសលើកូដករណាហ្គាវើលដ៍ ខណៈកូដករទាំងនោះតវ៉ាទាមទាររកដំណោះស្រាយវិវាទការងារនាពេលកន្លងមក។
តាមញត្តិដាក់ទៅក្រសួងមហាផ្ទៃ និងក្រសួងកិច្ចការនារី នៅថ្ងៃចន្ទនេះ បានឱ្យដឹងថា មន្ត្រីអាជ្ញាធរបានប្រើអំពើហិង្សា និងបៀបបៀនកេរ្តិ៍ខ្មាសទៅលើកូដករជាស្ត្រីភេទអំឡុងពេលកូដករទាំងនោះ ធ្វើការជួបជុំគ្នាធ្វើកូដកម្មដោយសន្តិវិធីស្របតាមច្បាប់ជាតិ និងអន្តរជាតិ ដែលបានធានាឱ្យមានការជួបជុំ និងប្រមូលផ្តុំដោយសេរី។
ញត្តិដដែលបញ្ជាក់ថា កាលពីខែធ្នូ ឆ្នាំ២០២១ អាជ្ញាធរបានប្រើប្រាស់ភាសារអាសគ្រាមដោយមិនសមរម្យទៅលើកូដករម្នាក់ និងបានគំរាមរំលោភបំពានផ្លូវភេទទៅលើនាងថែមទៀតផង។
ញត្តិបញ្ជាក់ទៀតថា កាលពីខែកុម្ភៈឆ្នាំ២០២២ បុរសម្នាក់ដែលជាមន្ត្រីអាជ្ញាធរបានចាប់ និងបៀតបៀនលើស្ត្រីជាកូដករ ម្នាក់ខណៈដែលស្ត្រីរូបនោះ កំពុងត្រូវបានសមត្ថកិច្ចចាប់បញ្ចូលទៅក្នុងរថយន្តក្រុង ហើយនៅថ្ងៃទី២២ ខែមីនា ឆ្នាំ២០២២នេះ កូដករជាស្ត្រីម្នាក់ទៀត ត្រូវបានអាជ្ញាធរវាយចំភ្នែក ពេលដែលសមត្ថកិច្ចកំពុងរុញច្រានយ៉ាងហិង្សា និងបង្ខំឱ្យក្រុមកូដករចូលក្នុងរថយន្តក្រុង។
ក្រុមយុវជន និងសកម្មជនសិទ្ធិមនុស្ស លើកឡើងក្នុងញត្តិទៀតថា សកម្មភាពរបស់អាជ្ញាធរទាំងនេះ គឺពួកគេមិនអាចទទួលយកបានឡើយ ដោយពួកគេទាមទារទៅក្រសួងមហាផ្ទៃ ចាត់វិធានការច្បាប់លើជនទាំងនោះឱ្យខានតែបាន។
សកម្មជនសិទ្ធិមនុស្ស និងជាសមាជិកក្រុមយុវជនខ្មែរថាវរៈ លោក ហ៊ុន វណ្ណៈ ដែលយកញត្តិទៅដាក់នៅក្រសួងមហាផ្ទៃ បានស្នើដល់លោកស ខេង ដែលជាថ្នាក់ដឹកនាំក្រសួងនេះ ស្រាវជ្រាវ និងចាត់វិធានការលើមន្ត្រីអាជ្ញាធរដែលប្រើហិង្សាលើកូដករណាហ្គាវើលដ៍នេះទៅតាមផ្លូវច្បាប់។
លោកបន្ថែមថា៖ «បញ្ហាដែលកើតមានលើកូដករណាហ្គាវើលដ៍ ដែលពួកគាត់គ្រាន់តែអនុវត្តសិទ្ធិសេរីភាព ដែលមានចែងក្នុងរដ្ឋធម្មនុញ្ញ ហើយពួកគាត់អត់មានបានធ្វើអ្វីដែលប៉ះពាល់ដល់ក្រុមហ៊ុន និងសង្គមទេ។ ប៉ុន្តែផ្ទុយទៅវិញអ្វីដែលគាត់ទទួលបាន គឺការប្រើហិង្សា ការបៀតបៀនកេរ្តិ៍ខ្មាសពួកគាត់យ៉ាងអយុត្តិធម៌ ហើយកើតចេញពីសំណាក់មន្ត្រីអាជ្ញាធរជាមន្ត្រីអនុវត្តច្បាប់។ អីចឹងក្នុងនាមយើងជាសកម្មជនសិទ្ធិមនុស្សយើងមិនអាចទទួលយកសកម្មភាពហ្នឹងបានទេ ហើយក៏មិនចង់ឱ្យអ្នកដែលប្រព្រឹត្តកំហុសនេះរួចខ្លួនដែរ»។
លោកក៏បានជំរុញដល់រដ្ឋមន្ត្រីក្រសួងកិច្ចការនារី លោកស្រី អ៊ឹង កន្ថាផាវី យកចិត្តទុកដាក់ និងការពារកូដករណាហ្គាវើលដ៍ ដែលកំពុងរងការបៀតបៀន និងហិង្សានេះផងដែរ។
លោកបន្ថែមថា៖ «យើងទៅដាក់ញត្តិនៅក្រសួងកិច្ចការនារីនេះ យើងចង់សួរទៅក្រសួងដែលមានតួនាទី ជាអ្នកបារម្ភឈឺឆ្អាលរឿងស្ត្រីនេះថា តើគាត់នឹងការអន្តរាគមន៍យ៉ាងណា? គាត់បានដឹងរឿងហ្នឹងអត់?ពីព្រោះព័ត៌មាន ហ្វេសប៊ុកគេបានផ្សាយជាបន្តបន្ទាប់មានទាំងរូបភាពវាយ រូបភាពបៀតបៀនទៀត ហើយគាត់ជាក្រសួងកិច្ចការនារីហ្នឹង តើគាត់នឹងមានដំណោះស្រាយយ៉ាងណា»។
យ៉ាងណា ការដាក់ញត្តិរបស់សកម្មជនសិទ្ធិមនុស្សនៅថ្ងៃនេះ គឺមន្ត្រីក្រសួងមហាផ្ទៃមិនទទួលយកញត្តិនោះទេ ក្រោមហេតុផលថា ញត្តិនោះធ្វើមិនត្រឹមត្រូវតាមបែបបទរដ្ឋបាល។ ចំណែកមន្ត្រីក្រសួងកិច្ចការនារី បានទទួលយកនូវញត្តិនេះហើយ។
រដ្ឋលេខាធិការ និងជាអ្នកនាំពាក្យក្រសួងកិច្ចការនារី លោកស្រី ម៉ាន ចិន្តា មិនទាន់បានឆ្លើយតបជាមួយវីអូឌីនៅឡើយទេ នៅថ្ងៃចន្ទនេះ ក្រោយលោកស្រីឱ្យផ្ញើសំណួរតាមប្រព័ន្ធតេឡេក្រាម។
កូដករណាហ្គាវើលដ៍ អ្នកស្រី វ៉ាន់ ណារី ដែលអះអាងថា បម្រើការងារនៅក្រុមហ៊ុនល្បែងមួយនេះ១៦ឆ្នាំ បាននិយាយថា ពេលចេញតវ៉ាម្តងៗ អាជ្ញាធរតែងតែរុញច្រាន ចាប់អូសទាញ ចាប់បោះទៅលើឡានក្រុង និងបៀតបៀនផ្សេងៗទៀតទៅរាងកាយរបស់ពួកគាត់។ អ្នកស្រីចាត់ទុកករណីនេះថា ជាទង្វើអសីលធម៌របស់មន្ត្រីអាជ្ញាធរ។
អ្នកស្រីបន្ថែមថា៖ «ពេលដែលក្រុមកូដករបានប្រាប់ទៅអាជ្ញាធរទាំងអស់ហ្នឹងបានប៉ះនូវកេរ្តិ៍របស់គាត់ហើយ ប៉ុន្តែពួកគាត់អត់មានទម្លាក់ដៃទេ ពួកគាត់នៅតែចាប់ថែមយកទៅបោកផ្ទុបនឹងឡាន។ ទង្វើបែបនេះសរបញ្ជាក់ថា ក្រុមអាជ្ញាធរគាត់បានបៀតបៀនមកលើពួកយើងជាកូដករ។ ទង្វើនេះជាទង្វើអមនុស្សធម៌»។
យ៉ាងណា កាលពីថ្ងៃទី២៣ ខែមីនា ឆ្នាំ២០២២ រដ្ឋបាលរាជធានីភ្នំពេញ បានចេញលិខិតមួយច្រានការលើកឡើងនេះ ហើយបានចោទក្រុមកូដករវិញថា បានប្រើអំពើហិង្សា និងជេរប្រមាទមកលើសមត្ថកិច្ច។
រដ្ឋបាលរាជធានីភ្នំពេញ បន្តថា ក្រុមកូដករបានប្រើពាក្យពេចន៍អសុរោះ អាកប្បកិរិយា និងកាយវិការមិនសមរម្យដាក់អាជ្ញាធរ ដើម្បីបញ្ឆេះកំហឹង និងត្រៀមចាំផ្ដិតយករូបភាពផ្សេងៗ ទុកធ្វើការចោទប្រកាន់មកលើអាជ្ញាធរ។
កាលពីថ្ងៃទី២៥ ខែមីនា ឆ្នាំ២០២២ សង្គមស៊ីវិល និងសហគមន៍ជាង៧០ បានស្នើទៅរដ្ឋាភិបាលឱ្យបញ្ឈប់ការឃាត់ខ្លួន និងការប្រើប្រាស់ហិង្សាទៅលើសមាជិកសហជីព និងកូដករណាហ្គាវើលដ៍ ព្រមទាំងចាត់វិធានការច្បាស់លាស់ដោះស្រាយវិវាទការងារនេះ ដែលរួមមានទាំងការធានាឱ្យក្រុមហ៊ុនចូលរួមចរចាដោយភាពស្មោះត្រង់ ដើម្បីបញ្ចៀសនូវការរំលោភសិទ្ធិមនុស្សកាន់តែធ្ងន់ធ្ងរ៕
