កម្មការិនីមួយរូបនៅក្រុមហ៊ុន «ជា ស៊ីណាត ហ្គាមេន» បានប្ដឹងក្រុមហ៊ុនមួយនេះទៅក្រសួងការងាររឿងបញ្ឈប់គាត់ពីការងារដោយខុសច្បាប់ និងដោយសារកម្មការិនីរូបនោះជាសមាជិកសហជីព ក្រោមហេតុផលគ្មានការងារឱ្យធ្វើបន្តទៀត ខណៈក្រុមហ៊ុនបន្តរើសកម្មករថ្មីទៅវិញ។
ក្នុងពាក្យបណ្ដឹងរបស់កម្មការិនីរោងចក្រ ជា ស៊ីណាត មួយរូប គឺកញ្ញា អុល សុខម៉េង ដែលដាក់ទៅនាយកដ្ឋានវិវាទការងារនៃក្រសួងការងារ កាលពីថ្ងៃទី៤ ខែមេសា បានប្ដឹងក្រុមហ៊ុនមួយនេះ ចំពោះការបញ្ឈប់ខ្លួនពីការងារដោយខុសច្បាប់។
ក្នុងពាក្យបណ្ដឹងដដែលឱ្យដឹងថា ការបញ្ឈប់ពីការងារនេះកើតឡើងកាលពីថ្ងៃទី២៣ ខែមីនា ឆ្នាំ២០២២ ដោយខាងគណនេយ្យបានហៅកញ្ញាទៅ ហើយប្រាប់ថា ខាងក្រុមហ៊ុនមិនបន្តកិច្ចសន្យាការងារឱ្យបន្តទៀតទេ ដោយសារក្រុមហ៊ុនគ្មានការងារឱ្យធ្វើ ម្យ៉ាងដោយសារកញ្ញាជាសកម្មជនសហជីពឯករាជ្យផងដែរ។
កម្មការិនី និងសកម្មជនសហជីពឯករាជ្យនៅរោងចក្រ ជា ស៊ីណាត កញ្ញា សុខម៉េង បានឱ្យវីអូឌីដឹងកាលពីម្សិលមិញថា ក្រុមហ៊ុនកាត់ដេរមួយនេះ មិនបន្ដកិច្ចសន្យាការងារឱ្យគាត់ទៀតទេ ប៉ុន្តែក្រុមហ៊ុនបានសម្រេចបន្ដកិច្ចសន្យាការងារឱ្យកម្មករនៅក្នុងក្រុមដេរជាមួយគាត់ជាង១០០នាក់ផ្សេងទៀត និងរើសកម្មករថ្មីចូលរាល់ថ្ងៃផងដែរ។
បញ្ហានេះ កញ្ញាយល់ថា ការបញ្ឈប់គាត់ពីការងារ ដោយសារខ្លួនជាសកម្មជនសហជីពតែម្តង។
កញ្ញាថ្លែងថា៖ «សហជីពមានពីរក្រុម គាត់មកពីសហព័ន្ធឯករាជ្យ មានគ្នា៤នាក់ ប៉ុន្ដែបញ្ឈប់តែគាត់មួយនាក់។ គាត់[ក្រុមហ៊ុន]លើកថាអត់មានអីធ្វើ គេអត់បន្ដអាណត្តិឱ្យ តែគាត់ផ្សាយរើសកម្មករជារៀងរាល់ថ្ងៃ ការបញ្ឈប់ហ្នឹងគេបញ្ចប់តែខ្ញុំមួយ ហើយគេបន្ដឱ្យអ្នកផ្សេងទាំងអស់»។
ប្រធានសហព័ន្ធសហជីពឯករាជ្យ លោក រី សិទ្ធីណែត បានថ្លែងថា ចំពោះរឿងនេះ ខាងលោកបានដាក់ពាក្យបណ្ដឹងទៅក្រសួងការងារ ហើយកំពុងរង់ចាំនីតិវិធីដោះស្រាយពីនាយកដ្ឋានវិវាទការងារ ដែលមានពេល១៥ថ្ងៃដើម្បីដោះស្រាយរឿងនេះ។ លោកបន្តថា ក្រុមហ៊ុនបានរក្សាអត្រាប្ដូរប្រាក់ទាបជាងទីផ្សារ ហើយមានការរើសអើងចំពោះសហជីពឯករាជ្យលើការតវ៉ាលក្ខខណ្ឌមួយចំនួនរបស់ក្រុមហ៊ុន។
លោកនិយាយថា៖ «តាមពិត មិនមែនរឿងអត់ការងារធ្វើទេ រឿងគឺរោងចក្ររើសអើងសហជីព ពួកខ្ញុំចង់និយាយអ៊ីចឹង! ដោយសារគន្លងមក ពួកខ្ញុំបានព្យាយាមតវ៉ាលក្ខខណ្ឌមួយចំនួន ឧទាហរណ៍ថា រោងចក្រនៅបន្ដបើកលុយខ្មែរ ហើយអត្រាប្ដូរប្រាក់របស់ពួកគាត់គឺ៤០០០ [រៀលក្នុង១ដុល្លារ]។ ក្រោម១០០ដុល្លារ គឺគាត់បើកឱ្យលុយខ្មែរទាំងអស់ ហើយគាត់គិតអ៊ីចឹងសម្រាប់កម្មករទាំងអស់នៅក្នុងរោងចក្រហ្នឹង»។
ជំនួយការរដ្ឋបាលក្រុមហ៊ុន ជា ស៊ីណាត លោក សេង មករា បានបដិសេធក្នុងការឆ្លើយតបរឿងនេះ កាលពីម្សិលមិញ ដោយថាលោកជាប់រវល់។
ដោយឡែក មន្ត្រីសហជីពមួយរូបដែលសុំមិនបញ្ចេញឈ្មោះ បាននិយាយថា ក្រុមហ៊ុនបានសុំស្នើគាត់និយាយផ្ទាល់មាត់ច្រើនដងមកហើយ ដោយដាច់ខាតមិនឱ្យកញ្ញា អុល សុខម៉េង ចូលធ្វើការវិញនោះទេ ប៉ុន្តែខាងក្រុមហ៊ុនមិនបានប្រាប់មូលហេតុលម្អិតរឿងបញ្ឈប់នេះឡើយ ដោយថាជារឿងផ្ទៃក្នុងក្រុមហ៊ុន។
ក្រុមហ៊ុន ជា ស៊ីណាត ហ្គាមេន ខូអិលធីឌី មានអាសយដ្ឋានស្ថិតនៅភូមិព្រែកធំ សង្កាត់ក្បាលកោះ ខណ្ឌច្បារអំពៅ រាជធានីភ្នំពេញ មាននិយោជិតប្រហែល៦០០នាក់។
ទំព័រហ្វេសប៊ុកមួយឈ្មោះ អ៊ិនទូហ្វិ (Intufe) កាលពីម្សិលមិញ បានឱ្យដឹងថា ថ្នាក់ដឹកនាំសហជីពឯករាជ្យនៃក្រុមហ៊ុនមួយនេះបានទៅផ្ដល់ព័ត៌មានដែលតំណាងភាគីកម្មករនិយោជិតទាមទារលក្ខខណ្ឌការងារចំនួន១៣ចំណុច នៅនាយកដ្ឋានវិវាទការងារនៃក្រសួងការងារ។
ចំណុចទាំង១៣នោះ រួមមាន ទាមទាឱ្យភាគីនិយោជកសងរំលឹកប្រាក់ភាគទានសហជីព ជូនសហជីពឯករាជ្យ ដែលក្រុមហ៊ុនធ្លាប់បានគណនាខុស ហើយទាមទារឱ្យភាគីនិយោជកទូទាត់ប្រាក់រង្វាន់ និងប្រាក់ថ្លៃបាយជូនកម្មករនិយោជិតរៀងរាល់១សប្ដាហ៍ម្ដង។
លើសពីនេះ ទាមទារឱ្យភាគីនិយោជករៀបចំបន្ទប់ទឹកស្អាតនិងអនាម័យ ព្រមទាំងស្នើឱ្យភាគីនិយោជកផ្លាស់ប្ដូរកិច្ចសន្យាការងារមានថេរវេលាកំណត់ទៅជាកិច្ចសន្យាការងារមានថេរវេលាមិនកំណត់ សម្រាប់កម្មករនិយោជិតដែលបានបម្រើការងារនៅក្នុងក្រុមហ៊ុនលើសពី២ឆ្នាំ រួមទាំងចំណុចមួយចំនួនទៀត។
យ៉ាងណា ក្នុងពាក្យបណ្ដឹងរបស់កញ្ញា សុខម៉េង ដដែល បានស្នើក្រសួងអន្តរាគមន៍ឱ្យគាត់បានចូលបម្រើការងារនៅក្រុមហ៊ុននេះបន្តទៀត ប៉ុន្តែប្រសិនបើមិនបានធ្វើការវិញទេ កម្មការិនីរូបនេះទាមទារឱ្យភាគីរោងចក្រទូទាត់សំណងជូនគាត់តាមច្បាប់ការងារ៕
