រដ្ឋាភិបាលកម្ពុជាបោះឆ្នោតអនុប្បវាទលើវត្តមានមហាអំណាចរុស្ស៊ីនៅក្រុមប្រឹក្សាសន្តិសុខអង្គការសហប្រជាជាតិ ខណៈមហាសន្និបាតនៃអង្គការកំពូលមួយនេះសម្រេចព្យួរកៅអីរដ្ឋសហព័ន្ធរុស្ស៊ីនេះ ដោយសំឡេងគាំទ្រ ២ភាគ៣ នៃប្រទេសសរុបចំនួន១៩៣ប្រទេសដែលជាសមាជិករបស់អង្គការសហប្រជាជាតិ។
មហាសន្និបាតអង្គការសហប្រជាជាតិ កាលពីថ្ងៃទី៧ ខែមេសា បានបើកសម័យប្រជុំរបស់ខ្លួន ដោយពិនិត្យទៅលើការព្យួរអាសនៈឬកៅអីរបស់មហាអំណាចរុស្ស៊ី នៅក្រុមប្រឹក្សាសន្តិសុខអង្គការសហប្រជាជាតិ។
ជាលទ្ធផលនៃការបោះឆ្នោតព្យួរអាសនៈក្នុងសម័យប្រជុំនោះបានបង្ហាញថា ៩៣ប្រទេសបោះឆ្នោតគាំទ្រ ២៤ប្រទេសបោះឆ្នោតប្រឆាំង និង ៥៨ប្រទេសបោះឆ្នោតអនុប្បវាទ ក្នុងនោះ កម្ពុជាត្រូវបានបង្ហាញនៅក្នុងតារាងនៃរដ្ឋជាសមាជិក ដែលបានបោះឆ្នោតអនុប្បវាទ ចំពោះវត្តមានរុស្ស៊ី ក្នុងពេលដែល UN សម្រេចព្យួរកៅអីប្រទេសមហាអំណាចផ្នែកសព្វាវុធនេះ ដោយសារមូលហេតុមានការរំលោភសិទ្ធិមនុស្សធ្ងន់ធ្ងរ។
ការបោះឆ្នោតតាមរយៈរូបមន្តអនុប្បវាទនេះ មែនទែនទៅ មិនមែនតែកម្ពុជាមួយទេ។ នៅក្នុងរដ្ឋជាសមាជិកអាស៊ាន មានប្រទេសចំនួន៦ហើយដែលបានបោះឆ្នោតតាមយន្តការដូចកម្ពុជានេះ ក្នុងពេលដែលប្រទេសវៀតណាម និងឡាវ បោះឆ្នោតប្រឆាំងការព្យួរអាសនៈដោយមហាសន្និបាតនេះ។
ដោយឡែក មានតែប្រទេស២ទេដែលជាសមាជិកអាស៊ាន គឺប្រទេសហ្វីលីពីន និងប្រទេសមីយ៉ាន់ម៉ា បោះឆ្នោតគាំទ្រឱ្យព្យួរកៅអីរបស់ប្រទេសរុស្ស៊ីនេះ នៅក្រុមប្រឹក្សាសន្តិសុខអង្គការសហប្រជាជាតិ។
វីអូឌី មិនអាចសុំការបញ្ជាក់បន្ថែមជុំវិញបញ្ហានេះពីលោក ផៃ ស៊ីផាន ប្រធានអង្គភាពអ្នកនាំពាក្យរដ្ឋាភិបាលកម្ពុជា និងលោក ជុំ សន្ទរី អ្នកនាំពាក្យក្រសួងការបរទេស បានទេ នៅថ្ងៃសុក្រនេះ។
កាលពីពេលថ្មីៗនេះ លោកនាយករដ្ឋមន្រ្តី ហ៊ុន សែន តែងប្រកាន់គោលជំហរនយោបាយការបរទេស ដោយបោះឆ្នោតប្រឆាំងការឈ្លានពានដោយរុស្ស៊ីទៅលើអ៊ុយក្រែន។ ប៉ុន្តែរបត់ចុងក្រោយនេះ គេនៅមិនទាន់ដឹងពីជំហរថាតើមានមូលហេតុអ្វីដែលកម្ពុជាសម្រេចបោះឆ្នោតអនុប្បវាទនៅក្នុងមហាសន្និបាតអង្គការសហប្រជាជាតិ កាលពីថ្ងៃព្រហស្បតិ៍ម្សិលមិញនេះទេ។
យ៉ាងនេះក្ដី អ្នកស្រាវជ្រាវវិទ្យាស្ថានខ្មែរសម្រាប់សហប្រតិបត្តិការ និងសន្តិភាព លោក វណ្ណ ប៊ុនណា យល់ឃើញថា ការសម្រេចចិត្តរបស់រដ្ឋាភិបាលកម្ពុជានៅពេលនេះ ទំនងជាមានការប្រយ័ត្នប្រយែងជាងលើកមុនៗ ដោយសារបញ្ហានេះជាចំណុចរសើប។
លោកបន្តថា អ្វីដែលជាបញ្ហានោះ គឺនៅត្រង់សេចក្ដីសម្រេចរបស់មហាសន្និបាតនៃអង្គការសហប្រជាជាតិលើកនេះ វាទាក់ទិននឹងការរំលោភសិទ្ធិមនុស្ស។ ហើយបើពិនិត្យមើលពីកម្ពុជាសព្វថ្ងៃ លោក ប៊ុនណា យល់ឃើញថា កម្ពុជានៅមានបញ្ហាខ្លះដែរជុំវិញរឿងសិទ្ធិមនុស្សនេះ។ ហេតុដូច្នេះ ចង់ឬមិនចង់ កម្ពុជាត្រូវឈរលើផ្លូវកណ្ដាលមួយហើយ ដើម្បីបានសុខខ្លះ។
ប៉ុន្តែបើទោះជាការសម្រេចចិត្តបែបនេះក្ដីរបស់កម្ពុជា បើតាមលោក ប៊ុនណា គឺនៅតែមានផលមិនល្អឡើយសម្រាប់ប្រទេសកំពុងអភិវឌ្ឍន៍មួយនេះនៅលើឆាកអន្តរជាតិ។
លោកបន្តថា៖ «ជាជំហរបស់កម្ពុជាពេលហ្នឹង វាជាជម្រើសត្រឹមត្រូវរបស់រដ្ឋាភិបាល។ ប៉ុន្តែវាមិនមែនជាជម្រើសល្អសម្រាប់កម្ពុជាទេ ព្រោះកម្ពុជាត្រូវបង្ហាញជំហរឱ្យច្បាស់លាស់ ទាក់ទងការរំលោភសិទ្ធិមនុស្សណាមួយដែលវាបានកើតឡើង ជាពិសេសការរំលោភសិទ្ធិមនុស្សពីការឈ្លានពានរបស់រុស្ស៊ីទៅលើប្រជាជនអ៊ុយក្រែនអីហ្នឹង»។
ជាមួយគ្នានេះ ទីក្រុងមូស្គូ ក៏បានសម្រេចដើរចេញពីកៅអីនៅក្នុងក្រុមប្រឹក្សាសន្តិសុខអង្គការសហប្រជាជាតិភ្លាមដែរ។
ឯកអគ្គរដ្ឋទូតរងប្រទេសរុស្ស៊ី លោក កេនណាឌី (Gennady) ប្រចាំនៅអង្គការសហប្រជាជាតិ បានសម្រេចចិត្តបន្ទាន់មួយ ដោយប្រកាសដើរចេញពីស្ថាប័នផ្នែកសិទ្ធិមនុស្សនេះ។ នេះបើតាមសេចក្ដីរាយការណ៍ដោយសារព័ត៌មាន Reuters កាលពីថ្ងៃព្រហស្បតិ៍ម្សិលមិញ។
លោក កេនណាឌី ក៏បានព្រមានដែរពីហានិភ័យចំពោះរដ្ឋជាសមាជិកណាមួយដែលបោះឆ្នោតគាំទ្រឬអនុប្បវាទនេះ ដែលលោកថា ជាកាយវិការមួយមិនរាប់អានខ្លួន ហើយក៏ជាផលវិបាកទៅថ្ងៃមុខដែរអំពីទំនាក់ទំនងទ្វេភាគី។
នាយកចាត់ការទូទៅនៃអង្គការការពារសិទ្ធិមនុស្ស លីកាដូ លោក អំ សំអាត យល់ឃើញថា ការព្យូរកៅអីរុស្ស៊ីនេះ មានន័យថា ស្មើនឹងការទណ្ឌកម្មបន្ថែមទៀត ចំពោះរដ្ឋសហព័ន្ធមួយនេះ។ បើតាមលោក អំ សំអាត ភាពប្រឈមផ្នែកសិទ្ធិមនុស្សរបស់រុស្ស៊ីនៅពេលនេះ មិនត្រឹមតែប៉ះពាល់ដល់រដ្ឋាភិបាលទេ ចំពោះពលរដ្ឋក៏ជាផ្នែកមួយ នៃភាពរងគ្រោះពីសេចក្តីសម្រេចចិត្តនេះដែរ។
លោកបន្តថា៖ «រុស្ស៊ីយើងឃើញថា ឥលូវនេះកំពុងជួបផលលំបាកខ្លាំងហើយចំពោះរដ្ឋាភិបាលផ្ទាល់ ហើយនៅពេលដែលការដកឬក៏ព្យូរសមាជិកភាពពីក្រុមប្រឹក្សាសិទ្ធិមនុស្សទៀត វាកាន់តែប៉ះពាល់រវាងទំនាក់ទំនង ក៏ដូចជាបញ្ហាពាណិជ្ជកម្មអីផ្សេងៗក្រៅពីទណ្ឌកម្មហ្នឹង ដែលមានកន្លងមកទៅទៀតហើយ»។
ផ្តើមចេញពីការឈានពានដោយរុស្ស៊ីទៅលើប្រទេសអ៊ុយក្រែននេះហើយ បានរុញឱ្យប្រទេសដែលធ្លាប់ទទួលបានឋានៈជាមហាអំណាចទី២ផ្នែកសព្វាវុធ ត្រូវក្លាយជារដ្ឋឯកោនៅលើពិភពលោក។ ទណ្ឌកម្មជាច្រើនផ្នែកពីប្រទេសលោកខាងលិច រាប់ទាំងការកាត់ផ្តាច់ផ្នែកពាណិជ្ជកម្ម ការបង្កកទ្រព្យសម្បត្តិ និងផ្អាកលំហូរសាច់ប្រាក់ ជាដើម។ គិតចាប់ពីថ្ងៃបើកការវាយលុយដោយយោធា កាលពីថ្ងៃទី២៤ ខែកុម្ភៈ ដែលប្រធានាធិបតីរុស្ស៊ី លោក ពូទីន ហៅថាជាប្រតិបត្តិការពិសេសទៅលើអ៊ុយក្រែននោះ គឺមានជនស៊ីវិលរាប់ម៉ឺននាក់ ត្រូវភៀសខ្លួនចេញពីប្រទេស និងរាប់ពាន់នាក់ទៀតបានស្លាប់និងរបួស៕
