សាលាដំបូងរាជធានីភ្នំពេញ បានសម្រេចឃុំខ្លួននិងបង្កកទ្រព្យសម្បត្តិរបស់បុរសម្នាក់នៅក្នុងពន្ធនាគារព្រៃស ពាក់ព័ន្ធនឹងករណីកែច្នៃសំណាកសត្វព្រៃកម្រនិងជិតផុតពូជ។
ការសម្រេចនេះបានធ្វើឡើងបន្ទាប់ពីកងកម្លាំងខណ្ឌរដ្ឋបាលព្រៃឈើ រាជធានីភ្នំពេញ បានចុះឆែកឆេរលំនៅដ្ឋានមួយកន្លែង ស្ថិតនៅភូមិកណ្ដាល សង្កាត់រលួស ខណ្ឌដង្កោ រាជធានីភ្នំពេញ កាលពីថ្ងៃទី១៥ ខែមីនា ឆ្នាំ២០២២ ដោយបានឃាត់ខ្លួនម្ចាស់ផ្ទះម្នាក់ឈ្មោះ ឡា សេងងួន អាយុ៤២ឆ្នាំ ដោយបានរកឃើញថា លោកបានកែច្នៃសំណាកសត្វព្រៃក្នុងក្រុមកម្រនិងជិតផុតពូជ។
ចៅក្រមស៊ើបសួរសាលាដំបូងរាជធានីភ្នំពេញ លោក ស៊ិន សុវណ្ណរ័ត្ន បានចេញសេចក្ដីសម្រេចនេះ កាលពីថ្ងៃទី១៩ ខែមីនា ឆ្នាំ២០២២ ដោយឱ្យបង្កកទ្រព្យសម្បត្តិរបស់ឈ្មោះ ឡា សេងងួន និងបញ្ជូនទៅឃុំខ្លួននៅក្នុងពន្ធនាគារព្រៃស។
ដីកាបង្គាប់ថា៖ «បង្កកទ្រព្យសម្បត្តិលេខ៤០ អ.ដ.ប.ទ ចុះថ្ងៃទី១៩ ខែមីនា ឆ្នាំ២០២២ របស់សាលាដំបូងរាជធានីភ្នំពេញ ដើម្បីបង្កកទ្រព្យសម្បត្តិរបស់ឈ្មោះ ឡា សេងងួន រួមមានផ្ទះ និងសម្ភារផ្សេងៗទៀត ដោយហាមមិនឱ្យលក់ដូរ ផ្ទេរកម្មសិទ្ធិ ជួល បញ្ចាំ និងធ្វើអំណោយផ្សេងៗ រហូតមានដីកាសម្រេចថ្មីពីសាលាដំបូងរាជធានីភ្នំពេញ»។
ចំណែកអ្នកពាក់ព័ន្ធ៣នាក់ទៀតដែលកំពុងរត់គេចខ្លួន រួមមាន ឈ្មោះ សុខ ធារ៉ា, ឈ្មោះ លី ហេងហួរ និងឈ្មោះ សី ហួរ ក៏បានត្រូវតុលាការបង្កទ្រព្យសម្បត្តិដែរ។
យោងតាមការស្រាវជ្រាវ ផ្ទះខាងលើបានមកពីការធ្វើពាណិជ្ជកម្ម សន្និធិ និងកែច្នៃសំណាកសត្វព្រៃក្នុងក្រុមកម្រនិងជិតផុតពូជ ដែលសមត្ថកិច្ចរកឃើញថា ធ្វើឡើងកាលពីអំឡុងចុងឆ្នាំ២០១៩ ដល់ថ្ងៃទី១៦ ខែមីនា ឆ្នាំ២០២២៕