អ្នកចម្រៀងអាយ៉ៃដែលធ្លាប់ល្បីឈ្មោះអំឡុងទសវត្សរ៍៨០ លោក ព្រហ្ម ម៉ាញ ទទួលបានគោរមងារជា «កិត្តិឧទ្ទេសបណ្ឌិត» ខណៈរូបលោកកំពុងមានជំងឺលើសឈាម។
ប្រមុខរដ្ឋស្ដីទី លោក ឆាយ ឈុំ តាមព្រះរាជក្រឹត្យចុះថ្ងៃទី៩ ខែមេសា ឆ្នាំ២០២២ បានផ្ដល់គោរមងារជូនលោក ព្រហ្ម ម៉ាញ ជា «កិត្តិឧទ្ទេសបណ្ឌិត»។
ការផ្ដល់គោរមងារនេះ ស្របពេលដែលលោក ព្រហ្ម ម៉ាញ បានចូលសម្រាកព្យាបាលជំងឺលើសឈាមកាលពីខែមុន ក្រោយពីមានអាការដួលសន្លប់។ ប៉ុន្តែលោក ព្រហ្ម ម៉ាញ បានចេញពីមន្ទីរពេទ្យវិញ នៅថ្ងៃទី៤ ខែមេសា ឆ្នាំ២០២២នេះ។
តាមការបង្ហោះសារលើបណ្ដាញសង្គមអំឡុងនៃការព្យាបាល លោក ព្រហ្ម ម៉ាញ ទទួលបានការឧបត្ថម្ភជាទឹកប្រាក់ពីថ្នាក់ដឹកនាំកំពូលមួយចំនួន រួមទាំងរដ្ឋមន្ត្រីក្រសួងមហាផ្ទៃ លោក ស ខេង។
លោក ស ខេង បានសរសេរនៅលើហ្វេសប៊ុករបស់លោក កាលពីថ្ងៃទី២៤ ខែមីនា ឆ្នាំ២០២២ ថាក្រោយពីទទួលដំណឹងថាលោក ព្រហ្ម ម៉ាញ កំពុងស្ថិតក្នុងការព្យាបាលជំងឺលើសឈាម ចាប់ពីថ្ងៃទី១៩ ខែមីនាមក លោកបានចាត់តាំងមន្ត្រីខុទ្ទកាល័យឱ្យនាំយកថវិកាចំនួន៥ ០០០ដុល្លារ ទៅឧត្ថម្ភដល់ «វីរសិល្បករ» រូបនោះ៕