កម្មករ-កម្មការិនីរាប់រយនាក់បម្រើការងារនៅរោងចក្រកាត់ដេរ រ៉ូស៊ីង ហ្គាមេន ស្ថិតក្នុងសង្កាត់ទួលសង្កែទី១ ខណ្ឌឫស្សីកែវ រាជធានីភ្នំពេញ បាននាំគ្នាតវ៉ាទាមទារប្រាក់អត្ថប្រយោជន៍ផ្សេងៗ ខណៈរោងចក្រនេះគ្រោងបិទទ្វារ ដោយគ្មានការដោះស្រាយសំណងតាមផ្លូវច្បាប់។
កម្មការិនី ឆុន ស្រីនី ដែលអះអាងថាធ្វើការនៅរោងចក្រ រ៉ូស៊ីង ប្រាប់វីអូឌីនៅថ្ងៃចន្ទនេះថា កម្មករជាង១ ០០០នាក់របស់រោងចក្រនេះ ត្រូវបានថៅកែបញ្ឈប់ពីការងារជាបន្តបន្ទាប់ ចាប់ពីដើមខែមេសានេះ ដោយពុំបានជូនដំណឹងនិងដោះស្រាយសំណងត្រឹមត្រូវទៅតាមផ្លូវច្បាប់ឡើយ។
អ្នកស្រី ឆុន ស្រីនី អាយុ២៩ឆ្នាំ ដែលអះអាងថាបម្រើកាងារនៅរោងចក្រ រ៉ូស៊ីង ៩ឆ្នាំនោះ បន្តថា ក្រុមកម្មករបាននាំគ្នាតវ៉ាក្នុងរោងចក្រប្រហែលមួយសប្ដាហ៍មកហើយ ដើម្បីទាមទារប្រាក់អត្ថប្រយោជន៍៥ចំណុចទៅតាមផ្លូវច្បាប់ ខណៈថៅកែដោះស្រាយឱ្យតែ២ចំណុចប៉ុណ្ណោះ រួមមាន ប្រាក់ខែចុងក្រោយ និងប្រាក់សំណងជំងឺចិត្ត។
អ្នកស្រីបន្ថែមថា៖ «ពេលដែលរោងចក្របញ្ឈប់ភ្លាមៗអ៊ីចឹង វាធ្វើឱ្យប៉ះពាល់ ដោយយើងមិនអាចទៅរកការងារធ្វើភ្លាមៗបាន ហើយប៉ះពាល់ដល់ការចំណាយយើង។ យើងជំពាក់គេច្រើន យើងអត់អីបង់ឱ្យគេបាន ហើយឥលូវជិតចូលឆ្នាំទៀត។ ខ្ញុំចង់ឱ្យក្រុមហ៊ុនដោះស្រាយសំណងតាមផ្លូវច្បាប់ជូនពួកយើង យើងមិនចង់បានអ្វីលើសពីផ្លូវច្បាប់ទេ»។
ប្រធានសហជីពសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (ស៊ីខាវឌូ) ប្រចាំរោងចក្រ រ៉ូស៊ីង លោក ខុន ជា មានប្រសាសន៍ថា ជុំវិញរឿងវិវាទការងារនេះ ក្រុមកម្មករបានដាក់បណ្ដឹងទៅក្រុមប្រឹក្សាអាជ្ញាកណ្ដាល កាលពីចុងខែមេសានេះ ដើម្បីទាមទារឱ្យថៅកែដោះស្រាយប្រាក់អត្ថប្រយោជន៍ចំនួន៥ចំណុច រួមមាន ប្រាក់ខែចុងក្រោយ ប្រាក់អតីតភាពការងារ ប្រាក់ជូនដំណឹង ប្រាក់សំណងជំងឺចិត្ត និងប្រាក់ដំណាច់ឆ្នាំដែលនៅសល់ ដែលបានកំណត់ដោយច្បាប់។
ប្រធានសហជីពរូបនេះបន្តថា រហូតមកដល់ពេលនេះ ខាងក្រុមប្រឹក្សាអាជ្ញាកណ្ដាលមិនទាន់សម្រេចថាយ៉ាងណានៅឡើយទេ ខណៈក្រុមកម្មករកំពុងរង់ចាំលទ្ធផល និងត្រៀមចិត្តយកសំណងតាមការកំណត់របស់ថៅកែ។
លោកបន្ថែមថា៖ «ការដែលថៅកែជូនដំណឹងបញ្ឈប់កម្មករហ្នឹងភ្លាមៗ ហើយច្រើន ដែលវាស្មើនឹងបិទទ្វារដែរ។ ជូនដំណឹងម្ដងបញ្ឈប់កម្មករជាង៩០០នាក់ និងម្ដងទៀតជាង៣០០នាក់។ ហើយរោងចក្រហ្នឹងមានកម្មករសរុបជាង១ ០០០នាក់ហ្នឹង អ៊ីចឹងវាស្មើនឹងបិទទ្វារហើយ។ ហើយការទូរទាត់សំណង វាអត់មានសងអីដល់កម្មករទេ វាសងតិចតួច។ និយាយរួម វាដោះស្រាយសំណងមិនត្រូវតាមផ្លូវច្បាប់ឡើយ»។
ប្រធានរដ្ឋបាលរោងចក្រ រ៉ូស៊ីង អ្នកស្រី ឡាក់ ដារ៉ាមុន្នី មានប្រសាសន៍ថា ករណីរោងចក្របញ្ឈប់កម្មករក្នុងចំនួនច្រើននេះ ដោយសារគ្មានការបញ្ជាទិញ ហើយថា ការបញ្ឈប់កម្មករនេះ គឺបានជូនដំណឹងត្រឹមត្រូវទៅតាមផ្លូវច្បាប់។
យ៉ាងណា ពេលដែលវីអូឌីសួរថា តើរោងចក្រ រ៉ូស៊ីង ត្រូវបិទទ្វារឬយ៉ាងណានោះ ប្រធានរដ្ឋបាលរោងចក្ររូបនេះសុំមិនឆ្លើយនោះទេ។
អ្នកស្រីបន្ថែមថា៖ «រោងចក្រអត់មានអ្នកបញ្ជាទិញផង អស់អ្នកទិញពីរោងចក្រហើយ បើយើងចិញ្ចឹមបុគ្គលិកច្រើន យើងបានឯណាលុយផ្ដល់ឱ្យគាត់។ ថៅកែអត់លុយដែរ បើអត់ចំណូលផង។ យើងបញ្ឈប់ពួកគាត់ យើងជូនដំណឹងត្រឹមត្រូវតើ! យើងជូនដំណឹងមុន តាំងពី២ខែមុន បិទក្រដាស់ផង ជូនដំណឹងផ្ទាល់មាត់ផងតាំងពីខែ២ រហូតដល់ខែ៤នេះ ជាបន្តបន្ទាប់តើ!»
វីអូឌី មិនអាចសុំការឆ្លើយតបពីប្រធានលេខាធិការដ្ឋានក្រុមប្រឹក្សាអាជ្ញាកណ្ដាល លោក ប៉ែន សាវ៉ាត បានទេ ពាក់ព័ន្ធករណីនេះ។
មន្ត្រីផ្នែកច្បាប់ និងដោះស្រាយវិវាទនៅសម្ព័ន្ធសហជីពស៊ីខាវឌូ លោក ស៊ាង យ៉ូត ធ្លាប់ប្រាប់វីអូឌីថា តាមផ្លូវច្បាប់ នៅពេលដែលរោងចក្រប្រកាសបិទទ្វារដោយមិនបានជូនដំណឹងមុនត្រឹមត្រូវតាមផ្លូវច្បាប់ សម្រាប់កម្មករដែលប្រើថេរវេលាមិនកំណត់ គឺថៅកែត្រូវដោះស្រាយសំណងជូនពួកគាត់ចំនួន៥ចំណុច រួមមាន ប្រាក់ខែចុងក្រោយ ប្រាក់អតីតភាពការងារ ប្រាក់ជូនដំណឹង ប្រាក់សំណងជំងឺចិត្ត និងប្រាក់ដំណាច់ឆ្នាំដែលនៅសល់។
កាលពីថ្ងៃទី៤ ខែមេសា ឆ្នាំ២០២២ សម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (CCAWDU) បានបង្ហាញការខកចិត្តចំពោះក្រសួងការងារ ដែលមិនមានចំណាត់ការលើនិយោជក ក្រោយពីរោងចក្របានបិទទ្វារ និងបានបណ្ដេញកម្មករចេញពីការងារដោយមិនបានទូទាត់អត្ថប្រយោជន៍ជូនកម្មករនិយោជិតតាមច្បាប់ស្ដីពីការងារ។
សម្ព័ន្ធសហជីពមួយនេះ ឱ្យដឹងថា រោងចក្រចំនួន២៣ទីតាំង ដែលមានកម្មករសរុប១ ៤០៨នាក់ បានរងគ្រោះដោយការបញ្ឈប់ពីការងារ បន្ទាប់ពួកគេប្រើប្រាស់សិទ្ធិក្នុងការបង្កើតសហជីពក្នុងសហគ្រាស និងគ្រឹះស្ថាននដែលពួកគេកំពុងធ្វើការ ខណៈរោងចក្រខ្លះទៀតត្រូវបានបិទទ្វារ ដោយសារថៅកែមិនបានទូទាត់ប្រាក់ជូនកម្មករតាមច្បាប់ការងារឡើយ។
មួយទៀតនោះ សំណុំរឿងមួយចំនួនដែលក្រុមប្រឹក្សាអាជ្ញាកណ្ដាលបានដោះស្រាយ និងសម្រេចឱ្យកម្មករឈ្នះហើយ គឺមិនត្រូវបានថៅកែឬនិយោជកអនុវត្តតាមសេចក្ដីបង្គាប់របស់ក្រុមប្រឹក្សាអាជ្ញាកណ្ដាលឡើយ ដែលករណីនេះ សហជីពចាត់ទុកថាជាការរំលោភសិទ្ធិមនុស្សធ្ងន់ធ្ងរ និងជាការកេងប្រវ័ញ្ចកម្លាំងពលកម្មកម្មករ ដែលត្រូវបានហាមឃាត់ដោយច្បាប់ផងនោះ៕
