សមត្ថកិច្ចនៅមូលដ្ឋានអះអាងថា ករណីបាញ់និងប្រើហិង្សាលើសមាជិកសហគមន៍នៅឃុំត្រពាំងជោរ ស្រុកឱរ៉ាល់ ខេត្តកំពង់ស្ពឺ មិនមែនជាទាហានអ្នកធ្វើនោះទេ។
ប្រជាសហគមន៍ «ឧត្ដមស្រែខ្ពស់» នៅភូមិពោធិ៍មាស ឃុំត្រពាំងជោរ បានចោទក្រុមទាហាននៃបញ្ជាការដ្ឋានរថក្រោះកងទ័ពជើងគោក ថាបានបាញ់ជាច្រើនគ្រាប់ និងប្រើអំពើហិង្សាលើសមាជិកសហគមន៍ចំនួន២នាក់ ខណៈពួកគេបើកគោយន្តដឹកបង្គោលរបងកាត់តំបន់ដែលទាហានយាម កាលពីថ្ងៃទី១១ ខែមេសា ឆ្នាំ២០២២។
មេប៉ុស្តិ៍ឃុំត្រពាំងជោរ លោក នៅ ណន បានទទួលស្គាល់ថា ពិតជាមានករណីបាញ់ឱ្យបែកកង់គោយន្ត និងមានការប្រើហិង្សាលើពលរដ្ឋពិតមែន ប៉ុន្តែជនប្រព្រឹត្តមិនមែនជាក្រុមទាហានលេខ «ង៧០» នោះទេ។ លោកថា ក្រុមទាហានដែលយាមកាមនៅតំបន់មានជម្លោះនោះ ត្រលប់ទៅផ្ទះអស់៣ទៅ៤ថ្ងៃមុនកើតហេតុ ដើម្បីទៅចូលឆ្នាំ ដោយនៅតែកម្មករស៊ីឈ្នួលកាប់ព្រៃតែ២នាក់ប៉ុណ្ណោះប្រចាំការនៅទីនោះ។
លោក នៅ ណន ប្រាប់ វីអូឌី នៅថ្ងៃចន្ទនេះថា តាមការស៊ើបសួរនិងការស្រាវជ្រាវរបស់លោក អ្នកដែលប្រើប្រាស់អាវុធបាញ់កង់គោយន្តនិងវាយពលរដ្ឋនោះ ជាកម្មករកាប់ព្រៃឱ្យក្រុមទាហាននៃបញ្ជាការដ្ឋានរថក្រោះកងទ័ពជើងគោកដែលទទួលបានដីសម្បទានសង្គមកិច្ចពីរដ្ឋាភិបាល នៅភូមិសាស្ត្រភូមិពោធិ៍មាស។
មេប៉ុស្តិ៍រូបនេះឱ្យដឹងថា ករណីនេះ លោកបានធ្វើរបាយការណ៍បញ្ជូនទៅអធិការដ្ឋាននគរបាលស្រុកឱរ៉ាល់ ដើម្បីសម្រេចនិងមានវិធានការបន្តហើយ។ លោកថា ហិង្សានេះជាជម្លោះរវាងបុគ្គលនិងបុគ្គល ដោយជនបង្កបានប្រើកាំភ្លើងប្រភេទឡុកបាញ់ជាច្រើនគ្រាប់បំបែកកង់គោយន្តជនរងគ្រោះ។
លោកបន្ថែមថា៖ «តាមការស្រាវជ្រាវទៅកំណត់បណ្ដឹងនោះ គេចោទថា ទាហាន”ង៧០” ប៉ុន្តែមិនមែនទេ។ មិនមែនជាកងកម្លាំងរបស់ទាហានទេ។ ពាក់ព័ន្ធនឹងការបាញ់បោះ គឺគ្រាន់តែបាញ់គំរាម ហើយនិងបាញ់កង់គោយន្ត ការបាញ់មនុស្សឱ្យរបួសស្នាមនោះ អត់មានទេ។ ហើយយើងបានសួរយោបល់មេដែរ បើពាក់ព័ន្ធជាមួយទាហាន យើងអត់ពាក់ព័ន្ធ ទុកឱ្យអធិការកិច្ចគេចុះស្រាវជ្រាវ ព្រោះរឿងនេះពាក់ព័ន្ធតុលាការយោធា»។
អធិការស្រុកឱរ៉ាល់ លោក ប៊ុត ប៊ុនធឿន បានចុចទូរសព្ទបិទ ក្រោយប្រាប់ថា វីអូឌី ទូរសព្ទទៅ និងមិនលើកទូរសព្ទ។
សមាជិកសហគមន៍ឧត្ដមស្រែខ្ពស់ម្នាក់ លោក ឃឿន គា ដែលអះអាងថា ខ្លួន និងប្អូនប្រុសឈ្មោះ ស៊ីម ចំប៉ា បានរងនូវការបាញ់ប្រហារ និងការប្រើហិង្សាពីសំណាក់ទាហាននោះ បាននិយាយថា លោកបានប្តឹងករណីនេះទៅអធិការដ្ឋាននគរបាលស្រុកឱរ៉ាល់ កាលពីថ្ងៃទី១៣ ខែមេសា ដោយប្តឹងចោទពីបទ «មនុស្សឃាត»។ លោកថា រហូតមកថ្ងៃនេះ ពុំទាន់មានអាជ្ញាធរឬសមត្ថកិច្ចណាម្នាក់ទៅសួរនាំលោកបន្ថែម ឬចាត់វិធានការច្បាប់ទៅលើជនបង្កនៅឡើយទេ។
លោកបន្ថែមថា៖ «ខ្ញុំសូមឱ្យសមត្ថកិច្ចពាក់ព័ន្ធស្រាវជ្រាវចាប់ជនបង្កមកផ្តទ្ទាទោសតាមច្បាប់ឱ្យខានតែបាន ព្រោះនេះជាទង្វើមនុស្សឃាត»។
លោក ឃឿន គា អះអាងថា ពេលកើតហេតុនោះ ទាហាន៦នាក់ដែលយាមដីកំពុងមានជម្លោះរវាងក្រុមទាហាននៃបញ្ជាការដ្ឋានរថក្រោះកងទ័ពជើងគោក និងប្រជាសហគមន៍ ស្ថិតក្នុងភូមិពោធិ៍មាស ចេញមកបាញ់ជាច្រើនគ្រាប់សំដៅទៅលើពួកគាត់ ដោយបណ្តាលឱ្យបែកកង់គោយន្ត និងចាប់វាយប្អូនរបស់លោកឱ្យរងបួសដោយមិនប្រាប់ពីមូលហេតុ រួមទាំងវាយកម្ទេចគោយន្ត២គ្រឿងរបស់លោកឱ្យខូចខាតទាំងស្រុងថែមទៀត។
សមាជិកសហគមន៍ឧត្ដមស្រែខ្ពស់ម្នាក់ទៀត លោក ខន សារិទ្ធ អះអាងថា រូបលោកក៏ធ្លាប់ត្រូវបានទាហានលេខង៧០ បញ្ជាឱ្យកូនចៅបាញ់សម្លាប់ផងដែរ ខណៈរូបលោកនិងប្រជាសហគមន៍ចុះតវ៉ាប្រឆាំងក្រុមទាហាននេះមិនឱ្យឈូសឆាយនិងកាប់បំផ្លាញព្រៃសហគមន៍នាពេលកន្លងមក។
លោកបន្តថា ចាប់តាំងពីមានជម្លោះដីធ្លីរវាងពលរដ្ឋនិងក្រុមទាហានមក គឺទាហានបានបាញ់គំរាមនិងប្រើហិង្សាលើប្រជាសហគមន៍ជាច្រើនដងហើយដោយអ្នកខ្លះបាក់ដៃ និងរបួសមុខជាដើម ប៉ុន្តែអាជ្ញាធរឬសមត្ថកិច្ចពាក់ព័ន្ធមិនដែលមានចំណាត់ការទៅលើជនបង្កឡើយ។ លោកថា បច្ចុប្បន្នទាហានទាំងនោះកំពុងបង្កការគំរាមកំហែងនិងបង្កការភ័យខ្លាចដល់ពលរដ្ឋក្នុងសហគមន៍។
លោកបន្ថែមថា៖ «កាលខ្ញុំ គាត់[ទាហានឈ្មោះ អៀម ម៉ៅ] ថាសម្លាប់អាហ្នឹងចោលទៅ និងអាធាមួយទៀត ទុកគាត់ជាអ្នកដោះស្រាយ។ កាលហ្នឹងក្រុមគាត់អត់ទាន់ដកកាំភ្លើងទេ។ ពួកគាត់គ្រាន់តែទាញកាំបិតដេញកាប់យើង។ អ្នកបញ្ជាជាទាហានង៧០ ឈ្មោះ អៀម ម៉ៅ។ ខ្ញុំថា ប្រសិនជាសមត្ថកិច្ចគាត់អត់ចាត់វិធានការ និងដោះស្រាយបញ្ហានេះតាមច្បាប់ទេ គាត់ទុកនៅតែអ៊ីចឹង ពួកខ្ញុំនឹងប្រឈម ព្រោះទាហានធ្វើអីបានតាមចិត្ត ហើយច្បាប់អត់ដោះស្រាយ ចេះតែច្រានចោល»។
វីអូឌី មិនអាចរកការឆ្លើយតបពីលោក អៀម ម៉ៅ ដែលពលរដ្ឋប្រាប់ថាជាទាហានលេខ«ង៧០»បានទេ ពាក់ព័ន្ធករណីនេះ។
មន្ត្រីសម្របសម្រួលគម្រោងធុរកិច្ច និងសិទ្ធិមនុស្ស នៃមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត បានជំរុញទៅសមត្ថកិច្ចឱ្យស្រាវជ្រាវ និងចាត់វិធានការករណីនេះទៅតាមផ្លូវច្បាប់ ដើម្បីលុបបំបាត់វប្បធម៌និទណ្ឌភាពនៅកម្ពុជា។ លោកថា សកម្មភាពបាញ់គំរាមកំហែង និងការប្រើហិង្សាលើពលរដ្ឋជាទង្វើខុសច្បាប់ និងរំលោភសិទ្ធិមនុស្សធ្ងន់ធ្ងរ។
លោកបន្តថា ប្រសិនបើករណីនេះមិនត្រូវបានចាត់វិធានការ និងបន្តឱ្យកើតមានទៀតនោះ នឹងធ្វើឱ្យប៉ះពាល់ដល់មុខមាត់កម្ពុជាលើឆាកអន្តរជាតិ ពាក់ព័ន្ធការរំលោភសិទ្ធិមនុស្ស។
លោកបន្ថែមថា៖ «យើងឃើញថា ប្រជាពលរដ្ឋខ្មែរដែលរងផលប៉ះពាល់ដោយសារដីធ្លី ឬប៉ះពាល់ដោយសារការរំលោភសិទ្ធិផ្សេងទៀត ពួកគាត់កាន់តែរងគ្រោះធ្ងន់ធ្ងរទៅៗ ដោយសារតែមានវប្បធម៌និទណ្ឌភាពចំពោះមន្ត្រីអ្នកអនុវត្តច្បាប់ ជាពិសេសដូចជាកម្លាំងប្រដាប់អាវុធជាដើមហ្នឹង»។
កាលពីថ្ងៃទី២០ ខែសីហា ឆ្នាំ២០២១ រដ្ឋាភិបាលបានចេញអនុក្រឹត្យមួយកាត់ដីទំហំជាង២៦០ហិកតា (២៦២,២៤ហិកតា) ពីដែនជម្រកសត្វព្រៃភ្នំឱរ៉ាល់ ស្ថិតភូមិសាស្ត្រភូមិពោធិ៍មាស ឃុំត្រពាំងជោរ ស្រុកឱរ៉ាល់ ខេត្តកំពង់ស្ពឺ ដើម្បីបែងចែកទៅឱ្យគ្រួសារកងទ័ពនៃបញ្ជាការដ្ឋានរថក្រោះកងទ័ពជើងគោក និងពលរដ្ឋចំនួន៤១គ្រួសារ សម្រាប់ធ្វើលំនៅឋាន និងបង្កបង្កើនផល។
ក្រោយរដ្ឋាភិបាលចេញអនុក្រឹត្យកាត់ដីនេះ ក្រុមទាហានបានដាក់គ្រឿងចក្រឈូសឆាយ និងប្រើកម្លាំងកម្មករឱ្យទៅកាប់បំផ្លាញព្រៃនៅតំបន់នោះ ប៉ុន្តែត្រូវបានរារាំងជាបន្តបន្ទាប់ដោយអ្នកភូមិរាប់រយនាក់ ដោយអ្នកភូមិអះអាងថា ដីដែលក្រុមទាហានកំពុងធ្វើសកម្មភាពឈូសឆាយនោះ ជាដីព្រៃសហគមន៍ «ឧត្ដមស្រែខ្ពស់» ហៅ «ព្រៃមេត្តាធម្មជាតិ» ជាព្រៃដែលពួកគេបានការពារជាង២០ឆ្នាំទៅហើយ។
អ្នកភូមិអះអាងថា ក្នុងជម្លោះដីព្រៃនេះផងដែរ ក៏មានតំណាងពលរដ្ឋ១០នាក់ជាប់បណ្តឹងនៅតុលាការផងដែរ ដោយសារតែការតវ៉ានេះ៕
