មន្ត្រីអធិការដ្ឋាននគរបាលស្រុកពួក ខេត្តសៀមរាប បានឱ្យដឹងថា មន្ត្រីសាលាស្រុកម្នាក់ដែលជាអ្នកចិញ្ចឹមក្រពើផងនោះ ត្រូវបានជួយសង្គ្រោះនិងបញ្ជូនមកព្យាបាលនៅមន្ទីរពេទ្យរាជធានីភ្នំពេញ ដោយសារក្រពើខាំ ក្រោយពីមន្ត្រីរូបនោះធ្លាក់ចូលក្នុងអាងចិញ្ចឹមសត្វក្រពើ។
អធិការនគរបាលស្រុកពួក លោក ទេព ពុំសែន មានប្រសាសន៍ប្រាប់វីអូឌីថា បុរសដែលរងគ្រោះដោយសារក្រពើខាំនោះ ឈ្មោះ ស៊ូ សុធា ភេទប្រុស អាយុ៣៧ឆ្នាំ មានមុខរបរជាមន្ត្រីរដ្ឋបាលសាលាស្រុកពួក។ លោកបន្តថា ហេតុការណ៍នេះបានកើតឡើងកាលពីយប់ឆ្លងចូលថ្ងៃទី១៨ ខែមេសា ឆ្នាំ២០២២ ចំណុចទ្រុងក្រពើ ស្ថិតនៅខាងក្រោយផ្ទះរបស់ខ្លួន ក្នុងភូមិកំពង់តាយ៉ង ឃុំពួក ស្រុកពួក ខេត្តសៀមរាប។
មន្ត្រីនគរបាលរូបនេះបញ្ជាក់ថា គ្រោះថ្នាក់នេះកើតឡើង ក្រោយពេលជនរងគ្រោះធ្លាក់ក្នុងអាងចិញ្ចឹមសត្វក្រពើរបស់ខ្លួន ក្រោយពេលលោកត្រលប់ពីចូលរួមពិធីជប់លៀងក្នុងគ្រួសារ ហើយទៅសម្រាន្តលើអង្រឹងក្នុងរោងដែលសង់នៅលើអាងចិញ្ចឹមក្រពើដូចសព្វដង។
អធិការស្រុកពួកដដែលឱ្យដឹងថា ចំពោះការសន្និដ្ឋានរបស់សមត្ថកិច្ច បញ្ហានេះកើតឡើងអាចដោយសារជនរងគ្រោះក្រោកទៅបត់ជើងតូច ហើយរអិលធ្លាក់ចូលក្នុងអាងសត្វក្រពើតែម្តង៕
