មន្ត្រីអធិការដ្ឋាននគរបាលស្រុកពួក ខេត្តសៀមរាប បានឱ្យដឹងថា មន្ត្រីសាលាស្រុកម្នាក់ដែលត្រូវបានក្រពើខាំឱ្យរងរបួសធ្ងន់នោះ បានស្លាប់បាត់បង់ជីវិតហើយកាលពីម្សិលមិញ ក្រោយពេលបញ្ជូនមកព្យាបាលនៅមន្ទីរពេទ្យរាជធានីភ្នំពេញបានពីរថ្ងៃ។
បុរសដែលរងគ្រោះដោយសារក្រពើខាំរហូតបណ្ដាលឱ្យស្លាប់នោះ ឈ្មោះ ស៊ូ សុធា ភេទប្រុស អាយុ៣៧ឆ្នាំ មានមុខរបរជាមន្ត្រីរដ្ឋបាលសាលាស្រុកពួក និងជាអ្នកចិញ្ចឹមក្រពើផងដែរ។ ហេតុការណ៍ក្រពើខាំឱ្យរបួសធ្ងន់នេះកើតឡើងកាលពីយប់ឆ្លងចូលថ្ងៃទី១៨ ខែមេសា ឆ្នាំ២០២២ ចំណុចទ្រុងក្រពើ ស្ថិតនៅខាងក្រោយផ្ទះរបស់ជនរងគ្រោះ ក្នុងភូមិកំពង់តាយ៉ង ឃុំពួក ស្រុកពួក ខេត្តសៀមរាប។
អធិការនគរបាលស្រុកពួក លោក ទេព ពុំសែន មានប្រសាសន៍ប្រាប់ វីអូឌី នៅរសៀលថ្ងៃពុធនេះថា បុរសដែលត្រូវក្រពើខាំនោះបានស្លាប់ហើយ កាលពីរសៀលម្សិលមិញ ហើយបានដឹកពីភ្នំពេញមកស្រុកពួក ខេត្តសៀមរាបវិញ ដើម្បីរៀបចំធ្វើបុណ្យតាមប្រពៃណី។
លោកនិយាយថា៖ «និយាយជារួម គឺពេលកើតហេតុគ្មាននរណាបានដឹងបានឃើញនោះទេ ដោយចន្លោះម៉ោង១ហ្នឹងមានឮសូរស្រែក ហើយបងប្អូនប្រជាពលរដ្ឋដែលនៅជិតខាង គាត់បានឮស្រែកឱ្យជួយ ហើយបានហៅគ្នាវាយ[ក្រពើ]ជួយសង្គ្រោះហ្នឹងឯង»។
អធិការស្រុកដដែលបញ្ជាក់ថា ការស្លាប់របស់លោក ស៊ូ សុធា នេះ បើមើលតាមរូបភាពជាក់ស្ដែង គឺក្រពើបានខាំច្រើនកន្លែងពេក ដូចជា ក្បាល ដៃ ជើង ខ្លួន ជាដើម។ អធិការស្រុកពួកដដែល ឱ្យដឹងថា ចំពោះការសន្និដ្ឋានរបស់សមត្ថកិច្ច បញ្ហាក្រពើខាំនេះកើតឡើងអាចដោយសារជនរងគ្រោះក្រោកទៅបត់ជើងតូចនៅរំលងអធ្រាត្រនោះ ហើយរអិលធ្លាក់ចូលក្នុងអាងសត្វក្រពើតែម្តង៕
