ក្រសួងសុខាភិបាលបានសម្រេចផ្លាស់ប្ដូរលក្ខខណ្ឌនៃការធ្វើចត្ដាឡីស័កពីរយៈពេល១៤ថ្ងៃ មកនៅត្រឹមរយៈពេល៧ថ្ងៃវិញ ទាំងអ្នកដំណើរមកពីបរទេសចូលតាមផ្លូវអាកាស និងតាមព្រំដែនគោក ដែលមិនបានចាក់វ៉ាក់សាំង ឬចាក់មិនបានពេញលេញ។
សេចក្ដីប្រកាសព័ត៌មានរបស់ក្រសួងសុខាភិបាលនៅថ្ងៃទី២១ ខែមេសានេះ បានកែសម្រួលលក្ខខណធ្វើចត្ដាឡីស័កចំពោះអ្នកមកពីបរទេសដែលមិនបានចាក់វ៉ាក់សាំង ឬមិនទាន់បានចាក់វ៉ាក់សាំងពេញលេញ ដែលតម្រូវឱ្យពួកគេធ្វើចត្តាឡីស័កមកនៅត្រឹមរយៈពេល៧ថ្ងៃប៉ុណ្ណោះ ហើយត្រូវធ្វើតេស្ដរហ័សនៅថ្ងៃទី៧ ដើម្បីបញ្ចប់ការធ្វើចត្តាឡីស័កផងដែរ។
ជាមួយគ្នានេះដែរ អ្នកដំណើរមកពីបរទេសតាមព្រំដែនគោក ត្រូវធ្វើតេស្ដរហ័សចំនួនពីរលើក ដោយលើកទី១ នៅថ្ងៃទី១ មុនពេលចូលមណ្ឌលធ្វើចត្តាឡីស័ក និងលើកទី២ នៅថ្ងៃទី៧ ដើម្បីបញ្ចប់ការធ្វើចត្តាឡីស័ក។
ក្រសួងក៏បានបញ្ជាឱ្យអាជ្ញាធរមានសមត្ថកិច្ចពាក់ព័ន្ធ ត្រូវបន្ដរក្សាការចាក់វ៉ាក់សាំងកូវីដ-១៩ដល់ប្រជាពលរដ្ឋឱ្យបានគ្រប់ៗគ្នា ដើម្បីបង្កើនភាពស៊ាំក្នុងសហគមន៍ជាតិ។
បើតាមក្រសួងសុខាភិបាល គិតត្រឹមព្រឹកថ្ងៃពុធម្សិលមិញនេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន១៣៦ ១១៧នាក់ ក្នុងនោះ អ្នកជំងឺព្យាបាលជាសះស្បើយចំនួន១៣២ ៨២៥នាក់ និងអ្នកស្លាប់មានចំនួន៣ ០៥៦នាក់។ ចំណែកករណីឆ្លងអូមីក្រុងក្នុងសហគមន៍វិញ ក្រសួងថា គិតមកដល់ពេលនេះបានកើនដល់១៤ ៣២១នាក់៕