ថ្នាក់ដឹកនាំក្រសួងសុខាភិបាលក្រើនរម្លឹកដល់មន្ទីរសុខាភិបាលនៃរដ្ឋបាលរាជធានី-ខេត្ត ត្រូវចាត់វិធានការឱ្យការិយាល័យស្រុកប្រតិបត្តិ និងមូលដ្ឋានសុខាភិបាលសាធារណៈទាំងអស់ រៀបចំផ្ដល់សេវា២៤ម៉ោងលើ២៤ម៉ោងជូនប្រជាពលរដ្ឋដែលទៅទទួលសេវា។
លិខិតរបស់រដ្ឋមន្ត្រីក្រសួងសុខាភិបាល លោក ម៉ម ប៊ុនហេង ផ្ញើជូនអភិបាលរាជធានី-ខេត្ត ចុះថ្ងៃទី២០ ខែមេសា ឆ្នាំ២០២២ បានលើកឡើងថា ក្រសួងបានសង្កេតឃើញមានមន្ទីរពេទ្យបង្អែក និងមណ្ឌលសុខភាពមួយចំនួនធំ បានយកចិត្តទុកដាក់ក្នុងការផ្ដល់សេវាជូនប្រជាពលរដ្ឋបានល្អប្រសើរ ប៉ុន្តែនៅមានមន្ទីរពេទ្យបង្អែក និងមណ្ឌលសុខភាពមួយចំនួនតូច នៅមានការខ្វះខាតក្នុងការផ្ដល់សេវា២៤ម៉ោងលើ២៤ម៉ោងនៅឡើយ។
ករណីនេះ លោករដ្ឋមន្ត្រីបានណែនាំក្រើនរម្លឹកដល់មន្ទីរសុខាភិបាលទាំងអស់ចាត់វិធានការដល់ការិយាល័យស្រុកប្រតិបត្តិ និងមូលដ្ឋានសុខាភិបាលសាធារណៈទាំងអស់ ត្រូវធានាការផ្ដល់សេវា ២៤ម៉ោងលើ២៤ម៉ោង ជូនប្រជាពលរដ្ឋ និងត្រូវធ្វើបច្ចុប្បន្នភាពបញ្ជីឈ្មោះនិងលេខទូរសព្ទអ្នកប្រចាំការផ្តល់សេវានៅតាមមូលដ្ឋានសុខាភិបាលជាទៀងទាត់ ហើយត្រូវបិទផ្សាយនៅកន្លែងផ្ដល់សេវារបស់ខ្លួន៕