ប្រជាពលរដ្ឋជាង១០០គ្រួសារ នៅស្រុកកំពង់ត្រាច ខេត្តកំពត ទាមទារទៅរដ្ឋាភិបាលផ្ដល់សំណងដីធ្លី ក្រោយដីរបស់ពួកគេបានរងផលប៉ះពាល់ ពីគម្រោងសាងសង់ផ្លូវក្រវាត់ព្រំដែនកម្ពុជា-វៀតណាម។
លោក ឌី គន្ធា ដែលអះអាងថាជាតំណាងពលរដ្ឋ ប្រាប់វីអូឌីនៅថ្ងៃព្រហស្បតិ៍នេះថា ពលរដ្ឋចំនួន១០៣គ្រួសារ រស់នៅភូមិចំនួន៥ រួមមាន ភូមិព្រែកក្រឹស ភូមិព្រៃព្រួស ភូមិព្រទ្រហឹង ភូមិកោះតាកូវ និងភូមិកោះត្នោត នៃឃុំក្រឹស ស្រុកកំពង់ត្រាច បានរងផលប៉ះពាល់ពីគម្រោងសាងសង់ផ្លូវក្រវាត់ព្រំដែននោះ។
តំណាងពលរដ្ឋរូបនេះបន្តថា ដីដែលរងផលប៉ះពាល់ជាដីដែលមានបណ្ណកម្មសិទ្ធិស្របច្បាប់តាំងពីឆ្នាំ២០១៨មក និងមានទំហំចន្លោះពីកន្លះហិកតា ទៅជាង១ហិកតា ចាប់ពីបង្គោលព្រំដែនលេខ៣០១ ទៅដល់បង្គោលព្រំដែនលេខ៣០៧។
លោក ឌី គន្ធា បន្ថែមថា កន្លងមក អ្នកភូមិបានរកកិច្ចអន្តរាគមន៍ពីទីស្ដីការគណៈរដ្ឋមន្ត្រីឱ្យជួយដោះស្រាយ ហើយនៅឆ្នាំ២០២០ ស្ថាប័នមួយនេះ បានចេញសេចក្ដីជូនដំណឹងមួយឱ្យរដ្ឋបាលខេត្តកំពតជួបពិភាក្សាជាមួយតំណាងពលរដ្ឋ ដើម្បីឈានទៅរកការដោះស្រាយជូនពលរដ្ឋ ប៉ុន្តែរហូតមកដល់បច្ចុប្បន្ននេះនៅតែពុំមានដំណោះស្រាយនៅឡើយ។ លោកថា ពលរដ្ឋទាមទារឱ្យមានការដោះស្រាយសំណងផលប៉ះពាល់នៃការបាត់បង់ក្បាលដីស្រែទៅតាមតម្លៃទីផ្សារបច្ចុប្បន្ន និងរៀបចំធ្វើបណ្ណកម្មសិទ្ធិថ្មីជូនពលរដ្ឋវិញដោយមិនយកលុយ។
លោកបន្ថែមថា៖ «អ៊ីចឹងសំណងក៏មិនទាន់ដោះ និងការធ្វើប្លង់ថ្មីក៏មិនទាន់បាន។ កាលសម័យអភិបាលខេត្តចាស់ លោក ជាវ តាយ គឺគាត់អសមត្ថភាព គ្មានឆន្ទៈដោះស្រាយសំណង និងមិនអើពើពីការការពារឆ្នាំងបាយរបស់កសិករទេ។ ហើយថ្មីៗនេះ លោក ម៉ៅ ធនិន អភិបាលខេត្តថ្មី ទំនួលខុសត្រូវរបស់គាត់ ក៏ដូចជា ជាវ តាយ អ៊ីចឹងដែរ។ តំណាងកសិករបានដាក់សំណើទៅគាត់តាំងពីខែ១១ ឆ្នាំ២០២១ ឱ្យគាត់ជួយអន្តរាគមន៍ជួយដោះស្រាយជូនកសិករ ដោយយោងតាមលិខិតណែនាំរបស់រដ្ឋាភិបាលទៀត ប៉ុន្តែគាត់មិនត្រឹមតែមិនដោះនោះទេ គឺគាត់មិនគោរពតាមការណែនាំរបស់រដ្ឋាភិបាលថែមទៀត»។
ពលរដ្ឋនៅឃុំក្រឹសម្នាក់ទៀត លោក សុខ សារឿន ដែលអះអាងថាបានប៉ះពាល់ដីស្រែជាង១ហិកតា បានឱ្យដឹងថា ការដែលរដ្ឋាភិបាលដាក់គ្រឿងចក្រឈូសឆាយដីស្រែរបស់អ្នកភូមិ ដើម្បីសាងសង់ផ្លូវខ្សែក្រវាត់ព្រំដែននោះ គឺអាជ្ញាធរពាក់ព័ន្ធមិនជូនដំណឹងជាមុន ឬពិភាក្សាជាមួយពលរដ្ឋពីផលប៉ះពាល់ និងការផ្ដល់សំណងឡើយ ថែមទាំងបានដាក់កម្លាំងសមត្ថកិច្ចពាក់ព័ន្ធចាំការពារមិនឱ្យពលរដ្ឋតវ៉ាថែមទៀត។
ពលរដ្ឋរូបនេះបន្តថា ចាប់តាំងពីមានការឈូសឆាយនៅឆ្នាំ២០១៨មក អ្នកភូមិមួយចំនួនបានបាត់បង់និងខូចខាតដីស្រែស្ទើរទាំងស្រុង ដោយពួកគេមិនអាចបង្កបង្កើនផលបានទៀតឡើយ ដែលធ្វើឱ្យពលរដ្ឋខ្លះសម្រេចចិត្តចំណាកស្រុកទៅប្រទេសថៃ។
លោកបន្ថែមថា៖ «កាលណោះអត់មានប្រជុំប្រាប់ប្រជាពលរដ្ឋទេ ពេលឮគេឈូលឆាយ ខ្ញុំទៅមើល គេដាក់កម្លាំងប៉ូលិសទាហាន មិនឱ្យយើងទៅជិតផង។ អត់មានលោកមេភូមិមេឃុំណាមកប្រាប់ថា គេសុំជីកដីស្រែធ្វើនេះធ្វើនោះ អត់! គួរតែគិតមើលទៅ យកឆ្នាំងបាយប្រជាជន អត់មានអាណិតអាសូរប្រជាជនសោះ ហើយមិនអត់មនុស្សទេ រាប់រយគ្រួសារ។ អ្នកខ្លះមានមុខរបរមានបាយហូបទៅ អ្នកខ្លះអត់មុខរបរធ្វើមុខស្អុយហ៊ូ។ បើពលរដ្ឋពីរបីគ្រួសារនោះ គ្នាអស់រលីងតែម្ដង គ្នាអត់[ដីស្រែ]ធ្វើ បានទៅធ្វើខ្ញុំថៃ មិនទាន់មកវិញផង»។
មេឃុំក្រឹស លោក ឈិន សេក មានប្រសាសន៍ថា គម្រោងសាងសង់ផ្លូវខ្សែក្រវាត់ព្រំដែនរបស់រដ្ឋាភិបាលបានធ្វើឱ្យប៉ះពាល់ដីធ្លីប្រជាពលរដ្ឋជាង១០០គ្រួសារ។ លោកថា ផលប៉ះពាល់នៃគម្រោងទៅលើដីស្រែរបស់ប្រជាពលរដ្ឋនោះ ហួសពីដែនសមត្ថកិច្ចរបស់លោកក្នុងការដោះស្រាយ។ លោកបន្តថា បញ្ហានេះមានតែរដ្ឋាភិបាលប៉ុណ្ណោះអាចសម្រេចនិងដោះស្រាយបាន។
លោកបន្ថែមថា៖ «រឿងប៉ះពាល់ហ្នឹង រដ្ឋាភិបាលគេដឹងហើយ មិនមែនប៉ះពាល់តែខេត្តកំពតយើងទេ ប៉ះពាល់៥ខេត្តនោះ។ អត់មានយើងពាក់ព័ន្ធទេនៅថ្នាក់ឃុំ»។
អភិបាលខេត្តកំពត លោក ម៉ៅ ធនិន មិនទទួលទូរសព្ទរបស់វីអូឌីទេ នៅថ្ងៃព្រហស្បតិ៍នេះ។
មន្ត្រីសម្របសម្រួលគម្រោងធុរកិច្ច និងសិទ្ធិមនុស្ស នៃមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត សង្កេតឃើញថា កន្លងមក រាល់គម្រោងអភិវឌ្ឍន៍នានារបស់ក្រុមហ៊ុនឯកជន និងរដ្ឋាភិបាល ហាក់មិនបានអនុវត្តតាមច្បាប់រដ្ឋធម្មនុញ្ញ ច្បាប់ភូមិបាល និងច្បាប់អស្សាមិករណ៍ឡើយ។
លោកថ្លែងថា៖ «ទាំងរដ្ឋធម្មនុញ្ញ ច្បាប់ភូមិបាល ច្បាប់អស្សាមិករណ៍ គឺបានចែងយ៉ាងច្បាស់ណាស់ថា ការដែលដកហូតអចលនទ្រព្យរបស់នីតិបុគ្គល ឬរូបវន្តបុគ្គលណាមួយ គឺត្រូវតែមានសំណងសមរម្យ និងមានការយល់ព្រមពីម្ចាស់អចលនទ្រព្យហ្នឹងផងដែរ។ ហើយប្រសិនបើយកដោយពុំមានការយល់ព្រម គ្មានផ្ដល់សំណងសមរម្យអាចទទួលយកបានទេ អាហ្នឹងគឺជាការដកហូតដោយខុសច្បាប់ ហើយជាការរំលោភសិទ្ធិមនុស្សធ្ងន់ធ្ងររបស់ប្រជាពលរដ្ឋ ជាពិសេសមានដីធ្លី និងលំនៅឋានសមរម្យ»។
កាលពីឆ្នាំ២០២០ ទីស្ដីការគណៈរដ្ឋមន្ត្រី បានចេញសេចក្ដីណែនាំមួយឱ្យអាជ្ញាធរពាក់ព័ន្ធ សិក្សានិងដោះស្រាយសំណងដីធ្លីជូនពលរដ្ឋ៩៩គ្រួសារ ស្មើក្បាលដី១២០ក្បាលដី ក្រោយពីប៉ះពាល់ដោយគម្រោងសាងសង់ផ្លូវក្រវាត់ព្រំដែនកម្ពុជា-វៀតណាម តាមបណ្ដោយព្រំដែនលេខ៣០១ ដល់៣០៧ នៅភូមិចំនួន៥ នៃឃុំក្រឹស ស្រុកកំពង់ត្រាច ខេត្តកំពត៕