ក្នុងត្រីមាសទី១ ឆ្នាំ២០២២ មន្រ្តីស៊ើបអង្កេតអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) នៃក្រសួងមហាផ្ទៃ បានរកឃើញបទល្មើសចំនួន៣៥៩ករណី ដែលជាផលិតផលមិនមានភាពអនុលោមតាមច្បាប់ និងរំលោភលើកម្មសិទ្ធិបញ្ញា។
អគ្គនាយកដ្ឋាននៃអគ្គនាយកដ្ឋាន ក.ប.ប. លោក ផាន អូន បានប្រាប់វីអូឌីថា ការបង្រ្កាបបទល្មើសភាគច្រើន ជាប្រភេទផលិតផលដែលមិនអនុលោមតាមច្បាប់ និងរំលាភកម្មសិទ្ធិនាំចូលផ្ដាច់មុខ។
លោកនិយាយថា៖ «[ការបង្ក្រាបភាគច្រើនជា] ផលិតផលដែលមិនមានប្រសិទ្ធភាព ផលិតផលដែលរំលាភកម្មសិទ្ធិបញ្ញា ហើយដូចជាបទល្មើសមួយចំនួនទាក់ទងនឹងការបន្លំគុណភាព ជាពិសេសផលិតផលប្រេងឥន្ធនៈ»។
ជាមួយគ្នានេះ មន្រ្ដីចុះត្រួតពិនិត្យក៏បានពិន័យម្ចាស់អាជីវកម្មបន្លំប្រេងឥន្ធនៈ និងបានពិន័យអន្តរការណ៍ច្រើនជាង១ពាន់ករណី រួមមាន សុវត្ថិភាពចំណីអាហារប្រើប្រាស់សារធាតុគីមីប៉ះពាល់ដល់សុខភាព ផលិតផលហួសកាលបរិច្ឆេទ និងការក្លែងបន្លំកម្មសិទ្ធិបញ្ញា ក្នុងរយៈពេល១ត្រីមាសឆ្នាំ២០២២នេះ។
យោងតាមរបាយការណ៍របស់មន្រី្ដស៊ើបអង្កេតអគ្គនាយកដ្ឋាន ក.ប.ប ចុះត្រួតពិនិត្យស្ថានីយ/ដេប៉ូលក់ប្រេងឥន្ធនៈចំនួន១១៣០ស្ថានីយ/ដេប៉ូ ដោយរកឃើញស្ថានីយ/ដេប៉ូចំនួន៣៨៧ មិនមានភាពស្មោះត្រង់ត្រឹមត្រូវ។ លើសពីនេះទៅទៀត ក៏រកឃើញករណីអ្នកដាក់លក់អាល់កុលក្លែងក្លាយ ជាប្រភេទសារធាតុមេតាណុលចំនួន៨០៧,៥០លីត្រផងដែរ។
យ៉ាងណាមិញ ផលិតផលក្លែងក្លាយភាគច្រើនជាការនាំចូល ហើយផលិតផលដែលផលិតក្នុងស្រុកភាគច្រើនជាម្សៅដែលលាបឱ្យស។ មន្ដ្រី ក.ប.ប ក៏យកចិត្តទុកដាក់ឱ្យម្ចាស់អាជីវកម្មដាក់ស្លាកសញ្ញានិងសារធាតុផ្សំឱ្យបានត្រឹមត្រូវទៅតាមប្រកាសនៃការដាក់ស្លាកសញ្ញា ដើម្បីការពារអ្នកប្រើប្រាស់។
ចំពោះការចុះត្រួតពិនិត្យទីផ្សារវិញ បានចំនួន២៧៣លើក ហើយមន្រ្ដីបានដកហូតទំនិញមិនមានភាពអនុលោមតាមច្បាប់ចំនួន១២ ៦៣២គីឡូក្រាម។ បន្ថែមពីនេះ មន្រ្ដីជំនាញបានចុះត្រួតពិនិត្យទីតាំងផលិត កែច្នៃ និងឃ្លាំងស្តុកផលិតផលចំនួន៥២លើក ដោយរកឃើញផលិតផលមិនមានភាពអនុលោម ឬរំលោភសិទ្ធិនាំចូលផ្តាច់មុខចំនួន១ ២៧២តោន និង៦៨២គីឡូក្រាម៕