ពលរដ្ឋជាង១០០នាក់ តំណាងឱ្យពលរដ្ឋចំនួន៤៤៣គ្រួសារ រស់នៅឃុំអំពិល ស្រុករមាសហែក ខេត្តស្វាយរៀង បានប្រមូលផ្ដុំគ្នានៅមុខរដ្ឋបាលឃុំ នៅថ្ងៃអង្គារនេះ ទាមទារឱ្យអាជ្ញាធរពន្លឿនការដោះស្រាយវិវាទដីធ្លី ដោយកាត់ឆ្វៀលដីទំហំជិត៧០០ហិកតា ពីក្រុមហ៊ុន «អិនខេវេនឈ័រ» ឱ្យប្រជាពលរដ្ឋកាន់កាប់ដូចដើមវិញ។
លោក ចាន់ ផន ដែលអះអាងជាតំណាងពលរដ្ឋនៅឃុំអំពិល ប្រាប់វីអូឌីថា បច្ចុប្បន្ន ពួកគាត់គ្មានដីសម្រាប់ធ្វើស្រែចម្ការនោះទេ ក្រោយពីមានជម្លោះដីធ្លីជាមួយក្រុមហ៊ុនអស់រយៈពេលប្រមាណ១០ឆ្នាំមកហើយ ខណៈអាជ្ញាធរហាក់អូសបន្លាយពេលវេលាក្នុងការដោះស្រាយវិវាទដីធ្លី។
លោកបន្តថា ដោយជួបបញ្ហាប្រឈមនេះហើយ បានធ្វើឱ្យប្រជាពលរដ្ឋនាំគ្នាទៅប្រមូលផ្ដុំ និងដាក់ញត្តិជាថ្មី នៅថ្ងៃនេះ ដើម្បីជំរុញទៅអាជ្ញាធរឱ្យពន្លឿនការដោះស្រាយ ដោយកាត់ឆ្វៀលដីពួកគាត់ចេញពីក្រុមហ៊ុន និងផ្ដល់បណ្ណកម្មសិទ្ធិដល់ពួកគាត់ ដើម្បីឱ្យពួកគាត់មានដីសម្រាប់បង្កបង្កើនផលចិញ្ចឹមជីវិតឡើងវិញ។
បើតាមលោក ចាន់ ផន ដីដែលពួកគាត់ស្នើសុំកាត់ឆ្វៀលនេះមានទំហំ៦៧០ហិកតា ត្រូវបានអ្នកភូមិអាស្រ័យផលតាំងពីឆ្នាំ១៩៩៨មកម្ល៉េះ ប៉ុន្តែនៅឆ្នាំ២០១០ រដ្ឋាភិបាលបានធ្វើដីសម្បទានសេដ្ឋកិច្ចឱ្យក្រុមហ៊ុនឥណ្ឌាឈ្មោះ អិនខេវេនឈ័រ ដើម្បីដាំអំពៅ ដោយមិនបានចុះសិក្សាពីផលប៉ះពាល់ទៅលើប្រជាពលរដ្ឋឡើយ។
លោកថា៖ «អាជ្ញាធរគេតែងប្រកាសប្រាប់ថា ក្រុមហ៊ុន អិនខេវេនឈ័រ បានក្ស័យធន អ៊ីចឹងរដ្ឋត្រូវដកដីហ្នឹងមកវិញហើយ។ ស្រាប់តែឆ្នាំ២០១៦ មានក្រុមហ៊ុនមួយទៀត ហើយមុនឆ្នាំ២០១៦ ប្រជាពលរដ្ឋចូលដាំដំឡូងធម្មតាអំឡុងឆ្នាំ២០១៤ និង២០១៥ ដាំដំឡូងនៅលើដីហ្នឹងពេញ ស្រាប់ឆ្នាំ២០១៦ មានក្រុមហ៊ុនណាមកទៀត គេមិនប្រកាសប្រាប់ទេ តែក្រុមហ៊ុនចុះមកដាក់គ្រឿងចក្រ ដាក់ប៉ូលិស ទាហាន ប៉េអឹម មកគំរាមបាញ់សម្លាប់ប្រជាពលរដ្ឋ។ អ្នកណាហ៊ានចូលដីហ្នឹង បាញ់សម្លាប់ចោល ស្រាប់តែចាប់ដាក់គុកដាក់ច្រវាក់»។
លោក ចាន់ ផន អះអាងថា រយៈពេល១០ឆ្នាំមកនេះ ពួកគាត់ទាំង៤៤៣គ្រួសារ បាននាំគ្នាដើរដាក់ញត្តិរកកិច្ចអន្តរាគមន៍ពីថ្នាក់ជាតិឱ្យជួយដោះស្រាយ ប៉ុន្តែមកដល់បច្ចុប្បន្ន មិនមានស្ថាប័នជាតិណាមួយចេញមុខមកដោះស្រាយឱ្យប្រជាពលរដ្ឋឡើយ។
ជុំវិញការតវ៉ានេះ មេឃុំអំពិល លោក ជា សារ៉ន មានប្រសាសន៍ថា អាជ្ញាធរឃុំមិនអាចដោះស្រាយរឿងវិវាទដីធ្លីនេះបានទេ ប៉ុន្តែលោកនឹងបញ្ជូនញត្តិរបស់ប្រជាពលរដ្ឋទៅអាជ្ញាធរស្រុក ដើម្បីពិនិត្យនិងរកដំណោះស្រាយ។
លោកថា៖ «ដាក់សំណើឱ្យឃុំដោះស្រាយហ្នឹង ឃុំអត់មានលទ្ធភាពដោះស្រាយកន្លងមក រហូតដល់ថ្នាក់ស្រុក ខេត្ត និងជាតិ ហើយបានដោះស្រាយរួចហើយ។ ដីហ្នឹងជាដីរបស់ក្រុមហ៊ុន ដែលរដ្ឋាភិបាលផ្ដល់ឱ្យធ្វើវិនិយោគដីកសិកម្ម។ អ៊ីចឹងអត់មានលទ្ធភាពដោះស្រាយ អាចបញ្ជូនញត្តិហ្នឹងទៅខាងលើទៀត»។
បើតាមមេឃុំអំពិល កាលពីឆ្នាំ២០១០ អ្នកភូមិចំនួន៤៤៣គ្រួសារ នៅឃុំអំពិល ចាប់ផ្ដើមមានជម្លោះដីធ្លីជាមួយក្រុមហ៊ុន អិនខេវេនឈ័រ បន្ទាប់ពីក្រុមហ៊ុននោះទទួលបានដីសម្បទានសេដ្ឋកិច្ចពីរដ្ឋាភិបាល ដើម្បីអភិវឌ្ឍដំណាំកសិកម្ម ប៉ុន្តែនៅអំឡុងឆ្នាំ២០១១ ក្រុមហ៊ុននេះបានផ្ទេរដីសម្បទាននោះទៅឱ្យក្រុមហ៊ុនមួយទៀតដែលមានម្ចាស់ជនជាខ្មែរឈ្មោះ ហេង វិញ។
វីអូឌី មិនអាចសុំការឆ្លើយតបពីអភិបាលស្រុករមាសហែក លោក សួស ម៉ុល បានទេ នៅថ្ងៃនេះ ។
ប្រធានសមាគមសម្ព័ន្ធសហគមន៍កសិករកម្ពុជា លោក ថេង សាវឿន ចាត់ទុកការយឺតយ៉ាវក្នុងការដោះស្រាយបញ្ហាដីធ្លីពីសំណាក់អាជ្ញាធរជូនពលរដ្ឋ ថាអាចនឹងធ្វើឱ្យប៉ះពាល់ដល់រដ្ឋាភិបាល ខណៈកម្ពុជានឹងមានការបោះឆ្នោតជ្រើសរើសក្រុមប្រឹក្សាឃុំសង្កាត់នៅខែមិថុនា ឆ្នាំនេះ និងការបោះឆ្នោតជាតិ នៅឆ្នាំ២០២៣ ខាងមុខ។
លោកថា៖ «អាជ្ញាធរដែលមិនបានដោះស្រាយបញ្ហាជូនប្រជាពលរដ្ឋ អាចនឹងធ្វើឱ្យប៉ះពាល់ដល់សិទ្ធិក្នុងការសម្រេចចិត្តរបស់ប្រជាពលរដ្ឋ ព្រោះយើងគិតថា ការបោះឆ្នោតជ្រើសរើសក្រុមប្រឹក្សានឹងឈានចូលមកដល់ខែ៦នេះ អ៊ីចឹងគាត់នឹងពិចារណា ក៏ដូចជាគិតគូរអំពីសមត្ថភាពនៃការដោះស្រាយ ក៏ដូចជាការឆ្លើយតបរបស់អាជ្ញាធរមូលដ្ឋានចំពោះគាត់ ក្នុងនាមគាត់ជាអ្នកទទួលខុសត្រូវក្នុងការនាំក្ដីកង្វល់និងបញ្ហា ដើម្បីផ្ញើជូនទៅថ្នាក់ខេត្ត និងថ្នាក់ជាតិ ជំរុញឱ្យមានការដោះស្រាយ»៕
