សាលារាជធានីភ្នំពេញ បានអនុញ្ញាតឱ្យសហជីពរៀបចំប្រារព្ធទិវាពលកម្មអន្តរជាតិ ១ឧសភា នាថ្ងៃអាទិត្យស្អែកនេះ ដោយមានអ្នកចូលរួមចំនួនជិត ១ ០០០នាក់ នៅសួនច្បារក្រុមប្រឹក្សាអភិវឌ្ឍន៍កម្ពុជា ឬCDC ជិតវត្តភ្នំ។
ការអនុញ្ញាតនេះ បន្ទាប់ពីក្រុមសហជីពបានដាក់សំណើទៅសាលារាជធានីភ្នំពេញ ដើម្បីស្នើសុំរៀបចំប្រារព្ធទិវាពលកម្មអន្តរជាតិ ១ ឧសភា ដែលជាខួបលើកទី១៣៦ នៅសួនច្បារ CDC មុខក្រុមប្រឹក្សាអភិវឌ្ឍន៍កម្ពុជានៅក្បែររមណីយដ្ឋានវត្តភ្នំនៅថ្ងៃទី១ ខែឧសភា ដោយមានអ្នកចូលរួមចំនួន ៨០០នាក់។
ក្នុងលិខិតឆ្លើយតបរបស់សាលារាជធានីភ្នំពេញចេញនៅថ្ងៃទី២៩ ខែមេសា ឆ្នាំ២០២២ បានឱ្យដឹងថា អាជ្ញាធរយល់ព្រមអនុញ្ញាតឱ្យសហជីពរៀបចំប្រារព្ធពិធីនេះ ចាប់ពីម៉ោង ៦:៣០នាទីព្រឹកដល់ម៉ោង ១២:៣០ នាទីថ្ងៃត្រង់ តាមសំណើតំណាងសហជីព និងសមាគមធ្វើការក្នុងវិស័យការងារនៅកម្ពុជា។
ជាមួយគ្នានេះ ដើម្បីរៀបចំទិវានេះឱ្យរលូន និងធានាសន្តិសុខ សុវត្ថិភាព សណ្ដាប់ធ្នាប់និងរបៀបរៀបរយសាធារណៈ ក្រុមសហជីពត្រូវបានសហការជាមួយអាជ្ញាធរមានសមត្ថកិច្ចពាក់ព័ន្ធ និងអនុវត្តឱ្យបានដូចស្មារតីក្នុងអង្គប្រជុំកាលពីថ្ងៃទី២០ ខែមេសា ឆ្នាំ២០២២ នៅសាលារាជធានីភ្នំពេញ។
ប្រធានសហភាពការងារកម្ពុជា លោក អាត់ ធន់ ចាត់ទុកការអនុញ្ញាតរបស់សាលារាជធានីភ្នំពេញថា ជាសញ្ញាវិជ្ជមានមួយ ប៉ុន្តែការបើកឱ្យរៀបចំធ្វើពិធីតែមួយព្រឹករបស់អាជ្ញាធរនៅមិនទាន់មានលក្ខណៈទូលំទូលាយនៅឡើយ។ លោកបន្តថា រដ្ឋាភិបាលគួរតែបើកលំហឱ្យមានការជួបជុំគ្នា ដោយកុំមានការរឹតត្បិតទៀត ដែលសិទ្ធិទាំងនេះ ត្រូវបានធានាដោយរដ្ឋធម្មនុញ្ញ និងច្បាប់ផ្សេងៗផងដែរ។
លោកថា៖«ខ្ញុំគិតថា ការអនុញ្ញាតត្រឹមតែព្រឹកថ្ងៃ ១ ឧសភា វាជាការបើកលំហតូចតាចទេ ប៉ុន្តែអ្វីដែលរដ្ឋត្រូវធានាដែលមានចែងក្នុងរដ្ឋធម្មនុញ្ញ និងច្បាប់ស្ដីពីការធ្វើបាតុកម្មដោយសន្តិវិធីនោះ មានន័យថា ត្រូវផ្ដល់ឱកាសឱ្យច្រើនជាងនេះទៀត ទាំងការជួបជុំ ទាំងការប្រមូលផ្ដុំ ការធ្វើបាតុកម្មផ្សេងៗ ដែលមានកន្លងមក ដែលមានការហាមឃាត់គួរតែមានការបើកលំហឱ្យមានសេរីភាពឡើងវិញ»។
ក្រោយជួបជុំគ្នាថ្លែងសារក្នុងទិវាពលកម្មអន្តរជាតិ ១ឧសភា នាថ្ងៃស្អែកនេះ លោក អាត់ ធន់ បន្តថា សហជីពនឹងយកញត្តិទៅដាក់នៅស្ថាប័នជាតិ ក្នុងនោះរួមមានរដ្ឋសភា ទីស្ដីការគណៈរដ្ឋមន្ត្រី និងក្រសួងការងារ ដើម្បីឱ្យដោះស្រាយបញ្ហាមួយចំនួនផងដែរ។
ក្នុងសេចក្ដីថ្លែងការណ៍រួមមួយដែលចេញដោយក្រុមសហជីពនាថ្ងៃទី៣០ ខែមេសា ឆ្នាំ២០២២ ឱ្យដឹងថា ខួបលើកទី១៣៦ នៃទិវាពលកម្មអន្តរជាតិ ១ឧសភា ក្រុមសហជីពស្នើទៅរដ្ឋាភិបាល ជួយអន្តរាគមន៍ដោះស្រាយនូវសំណើចំនួន ១០ចំណុច ដើម្បីកាត់បន្ថយបញ្ហាប្រឈមនានារបស់កម្មករនិយោជិត។
សំណើទាំង ១០ចំណុច មានដូចជា ស្នើរដ្ឋាភិបាលអន្តរាគមន៍ទៅនិយោជកឱ្យទទួលយកថ្នាក់ដឹកនាំ និងសកម្មជនសហជីពដែលត្រូវបានក្រុមហ៊ុនបញ្ឈប់ពីការងារដោយខុសច្បាប់ឱ្យពួកគេចូលធ្វើការវិញ ព្រមទាំងសងប្រាក់រំលឹកដល់ពួកគេ ហើយជួយអន្តរាគមន៍ទៅស្ថាប័នតុលាការឱ្យទម្លាក់បទចោទប្រកាន់នានាលើសហជីព និងសកម្មជនសហជីព។
ជាមួយគ្នានោះ ស្នើទៅរដ្ឋាភិបាលជំរុញឱ្យរោងចក្រ សហគ្រាស បញ្ឈប់ការប្រើប្រាស់កិច្ចសន្យាការងារខ្លី និងឱ្យរដ្ឋាភិបាល រក្សាថ្ងៃឈប់សម្រាកបុណ្យជាតិ និងអន្តរជាតិមានប្រាក់ឈ្នួល ដែលធ្លាប់មានកន្លងមក ព្រមទាំងថ្ងៃបុណ្យជាតិ-អន្តរជាតិ ប៉ះចំថ្ងៃអាទិត្យ ត្រូវលើកឱ្យឈប់ថ្ងៃបន្ទាប់ ដែលត្រូវបានរដ្ឋាភិបាលលុបចោលកន្លងមក។
មួយវិញទៀត ក្រុមសហជីពក៏ស្នើទៅរដ្ឋាភិបាលពង្រីកវិសាលភាពបេឡាជាតិរបបសន្តិសុខសង្គមឬ ប.ស.ស ដល់កម្មករក្រៅប្រព័ន្ធ ឱ្យដូចគ្នាកម្មករក្នុងប្រព័ន្ធដែរ។ បន្ថែមពីនេះ ក្រុមសហជីពក៏ជំរុញទៅនិយោជកឱ្យផ្ដល់មធ្យោបាយដឹកជញ្ជូនប្រកបដោយសុវត្ថិភាពដល់កម្មករនិយោជិត រួមទាំងកំណត់ប្រាក់ឈ្នួលអប្បបរមាសម្រាប់វិស័យសេវាកម្ម សំណង់ សប្បិកម្ម និងកម្មករធ្វើការងារតាមផ្ទះ។
បន្ថែមពីនេះ ពួកគេក៏ស្នើរដ្ឋាភិបាលអន្តរាគមន៍ពិនិត្យឡើងវិញ ចំពោះការអនុវត្តអនុសញ្ញាអន្តរជាតិ ខាងការងារលេខ ៨៧និង៩៨ ស្ដីពីសេរីភាព សមាគម សហជីព និងសិទ្ធិចរចាសមូហភាព និងជួយអន្តរាគមន៍បញ្ចុះតម្លៃ និងទប់ស្កាត់ការឡើងថ្លៃទំនិញ ដូចជាតម្លៃប្រេងសាំងជាដើម ដើម្បីជួយសម្រាលការចំណាយរបស់ពលរដ្ឋ៕
