សមាជិកសភាអឺរ៉ុបកាលពីថ្ងៃទី៥ ខែឧសភា បានស្នើទៅកាន់ប្រទេសសមាជិកអឺរ៉ុបទាំង ២៧ ឱ្យដាក់ទណ្ឌកម្មលើប្រទេសកម្ពុជាដោយដកប្រព័ន្ធអនុគ្រោះពន្ធទាំងស្រុងប្រសិនបើការបោះឆ្នោតជ្រើសរើសក្រុមប្រឹក្សាឃុំ-សង្កាត់ នៅថ្ងៃទី៥ ខែមិថុនា ឆ្នាំ២០២២ និងការបោះឆ្នោតជ្រើសតាំងតំណាងរាស្រ្តនៅឆ្នាំ ២០២៣ ត្រូវបានគេរកឃើញថា គ្មានភាពសេរី ត្រឹមត្រូវ និងយុត្តិធ៌ម។
ក្នុងញត្តិរបស់សមាជិកសភាអឺរ៉ុប ពួកគេបានស្នើទៅកាន់គណៈកម្មការអឺរ៉ុបឱ្យ ប្រើប្រាស់រាល់មធ្យោបាយដែលមានក្នុងនោះរួមមានទាំងការដកចេញទាំងស្រុងនូវប្រព័ន្ធអនុគ្រោះពន្ធ EBA ដែលសហភាពអឺរ៉ុបនៅបន្តផ្តល់ដល់កម្ពុជាចេញពីប្រទេសមួយនេះ ព្រមទាំង ទណ្ឌកម្មផ្សេងទៀត។
សេចក្តីស្នើទៅកាន់សហភាពអឺរ៉ុបនេះ ត្រូវបានទទួលការបោះឆ្នោតគំាទ្រពីសមាជិកសភាអឺរ៉ុប ចំនួន ៥២៦ សំឡេង ក្នុងចំណោមសមាជិក ៥៩៤ នាក់។
សមាជិកសភាអឺរ៉ុបបានសម្តែងការបារម្ភយ៉ាងខ្លាំងអំពីការដើរថយក្រោយនៃការគោរពសិទ្ធិមនុស្សនៅកម្ពុជា ជាពិសេសនៅមុនពេលនៃការបោះឆ្នោតជ្រើសរើសក្រុមប្រឹក្សាឃុំ-សង្កាត់ នៅក្នុងខែមិថុនាខាងមុខ និងការបោះឆ្នោតជ្រើសតាំងតំណាងរាស្រ្តនៅឆ្នាំក្រោយ។
សមាជិកសភាអឺរ៉ុបក៏បានទទូចឱ្យសហភាពអឺរ៉ុប និងសហគមន៍អន្តរជាតិផ្តល់ការគំាទ្រដល់ សកម្មជនសង្គម អ្នកការពារសិទ្ធិមនុស្ស និងគណបក្សនយោបាយដែលកំពុងទាមទារឱ្យមាន ការគោរពលិទ្ធិប្រជាធិបតេយ្យ និងសិទ្ធិមនុស្សនៅកម្ពុជា ដែលត្រូវបានគេមើលឃើញថា លំហទាំងអស់នេះនៅមានកម្រិតតិចតួចនៅឡើយ។
សមាជិកសភាអឺរ៉ុបក៏បានថ្កោលទោសចំពោះការរំលាយគណបក្សសង្រ្គោះជាតិដោយតុលាការកំពូលរបស់កម្ពុជា និងបានទាមទារឱ្យតុលាការទម្លាក់ចោលរាល់ការចោទប្រកាន់មក លើប្រធានគណបក្សសង្រ្គោះជាតិដែលតុលាការរំលាយ លោក កឹម សុខា និងថ្នាក់ដឹកនាំគណបក្ស សង្រ្គោះជាតិ រួមមាន លោក សម រង្ស៊ី អ្នកស្រី មូរ សុខហួរ និងសកម្មជននយោបាយកំពូលៗ របស់គណបក្សប្រឆាំងផ្សេងទៀត។
ក្រៅពីថ្កោលទោសលើការទុក្ខបុកម្នេញចំពោះគណបក្សប្រឆាំងដោយរដ្ឋាភិបាលលោក ហ៊ុន សែន សមាជិកសភាអឺរ៉ុបក៏បានថ្កោលទោសការធ្វើទុក្ខបុកម្នេញរបស់អាជ្ញាធរកម្ពុជាលើអ្នក ការពារសិទ្ធិមនុស្ស សហជីព អ្នកកាសែត សកម្មជនការពារបរិស្ថាន និងជនមួយចំនួនទៀត ដែលបានតស៊ូមតិហើយត្រូវបានរដ្ឋាភិបាលកម្ពុជាធ្វើបាប។
វីអូឌីមិនទាន់អាចទាក់ទងលោក ផៃ ស៊ីផាន ប្រធានអង្គភាពអ្នកនាំពាក្យរាជរដ្ឋាភិបាលកម្ពុជា និងលោក សុខ ឥសាន អ្នកនាំពាក្យគណបក្សប្រជាជនកម្ពុជាបាននៅឡើយទេនៅថ្ងៃទី៦ ខែឧសភា ដោយទូរស័ព្ទចូលមិនលើក។
ចំណែក លោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោតបានឆ្លើយ តបយ៉ាងខ្លីថា អ្វីដែល គ.ជ.ប អាចធ្វើបានគឺការអនុវត្តទៅតាមច្បាប់បោះឆ្នោតរបស់កម្ពុជា ដែលមានស្រាប់។
ទោះជាយ៉ាងណា នាយកប្រតិបត្តិអង្គការណិចហ្វិច លោក សំ គន្ធាមី ចាត់ទុកញត្តិរបស់សមាជិកសភា អឺរ៉ុបថា ជាការជូនដំណឹងដល់រដ្ឋាភិបាលកម្ពុជាជាមុន។ ដូច្នេះ លោកថា បើសិនជាកម្ពុជា នៅតែមិនធ្វើតាមសភាអឺរ៉ុបទេ លោកថា កម្ពុជានឹងទទួលរងទណ្ឌកម្មកាន់តែធ្ងន់ពីអឺរ៉ុបមិនខាន។
លោកថា៖ «ការដាក់កម្រិតអ៊ីចឹង វាជាការត្រឹមត្រូវហើយ ចង់បានការបោះឆ្នោតត្រឹមត្រូវសេរី និងយុត្តិធម៌។ គេចង់បានតាមស្ដង់ដារវា ព្រោះយើងបានផ្ដល់ធម្មនុញ្ញភាព និងកតិកាសញ្ញា អន្តរជាតិយើងបានទទួល និងផ្ដល់សច្ចាប័នច្រើនហើយ អ៊ីចឹងយើងត្រូវគោរពតាមអ៊ីចឹង ហើយ។ អាហ្នឹងគេធ្វើតាមច្បាប់អ៊ីចឹង ច្បាប់ជាតិក៏អ៊ីចឹងដែរ រដ្ឋធម្មនុញ្ញ ច្បាប់បោះឆ្នោត អ៊ីចឹងគេដាក់អ៊ីចឹងត្រឹមត្រូវហើយ។ យើងកំពុងរៀបចំសង្កេតការណ៍អីហ្នឹងដែរ»។
សមាជិកសភាអឺរ៉ុបបានទាមទារឱ្យរដ្ឋាភិបាលកម្ពុជា បញ្ចប់នូវរាល់ទម្រង់នៃការធ្វើទុក្ខបុក ម្នេញ ការសម្លុតបំភ័យ គំរាមកំហែងមកលើអ្នកនយោបាយប្រឆាំងនិងសកម្មជនផ្សេងៗ ទៀត និងទទូចឱ្យសមត្ថកិច្ចកម្ពុជាបញ្ឈប់រាល់ការប្រើប្រាស់កម្លាំងមិនចាំបាច់ និងលើសលប់បង្រ្កាបទៅលើអ្នកធ្វើការតវ៉ាដោយសន្តិវិធី៕