លោកនាយករដ្ឋមន្ត្រី ហ៊ុន សែន នាថ្ងៃអង្គារនេះ បានដឹកនាំគណៈប្រតិភូជាន់ខ្ពស់កម្ពុជាធ្វើដំណើរទៅកាន់ទឹកដីសហរដ្ឋអាមេរិក ដើម្បីដឹកនាំកិច្ចប្រជុំកំពូលអាស៊ាន-អាមេរិក នៅទីក្រុងវ៉ាស៊ីនតោន ចាប់ពីថ្ងៃទី១២-១៣ ខែឧសភា ឆ្នាំ២០២២។
បើយោងតាមហ្វេសប៊ុករបស់លោកនាយករដ្ឋមន្ត្រី ហ៊ុន សែន នាថ្ងៃទី១០ ខែឧសភានេះ បានឱ្យដឹងថា ការចូលរួមរបស់លោកនៅទីក្រុងវ៉ាស៊ីនតោន សហរដ្ឋអាមេរិក ក្នុងនាមជាប្រធានអាស៊ាន កម្ពុជាត្រូវធ្វើជាសហប្រធាននៃកិច្ចប្រជុំកំពូលពិសេសអាស៊ាន-អាមេរិក និងដើម្បីរំព្ញកខួបអនុស្សាវរីយ៍លើកទី៤៥ នៃទំនាក់ទំនងដៃគូសន្ទនាអាស៊ាន-សហរដ្ឋអាមេរិក។
លោកបន្តថា៖ «ស្ថិតនៅទឹកដីសហរដ្ឋអាមេរិក ខ្ញុំនឹងជួបជាមួយមេដឹកនាំសំខាន់ៗមួយចំនួន ព្រមទាំងបងប្អូនខ្មែរអាមេរិកាំងដែលរស់នៅទីនោះកំពុងរង់ចាំទទួលខ្ញុំ»។
ការទៅចូលរួមកិច្ចប្រជុំរបស់លោក ហ៊ុន សែន នាថ្ងៃអង្គារនេះ ធ្វើឡើងស្របពេលដែលឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោក ស ខេង បានត្រលប់ពីប្រទេសបារាំង មកកម្ពុជាវិញ យ៉ាងស្ងៀមស្ងាត់ បន្ទាប់លោកបានចេញទៅកាន់សាធារណរដ្ឋបារាំង កាលពីថ្ងៃទី២ ខែឧសភា ឆ្នាំ២០២២ រយៈពេល១សប្តាហ៍ ដើម្បីបន្តពិនិត្យតាមដានសុខភាព ជាលើកទីពីរ តាមការតម្រូវរបស់វេជ្ជបណ្ឌិត។
ពាក់ព័ន្ធនឹងការធ្វើដំណើរទៅសហរដ្ឋអាមេរិករបស់លោក ហ៊ុន សែន នេះដែរ កាលពីថ្ងៃទី១៦ ខែមេសា ឆ្នាំ២០២២ ក្រសួងការបរទេសកម្ពុជាបានចេញសេចក្តីថ្លែងការណ៍មួយ ឱ្យដឹងថា កិច្ចប្រជុំកំពូលពិសេសនេះជាកិច្ចប្រជុំកំពូលពិសេសលើកទី២ គិតពីឆ្នាំ២០១៦មក។
ជាមួយគ្នានេះ ថ្នាក់ដឹកនាំអាស៊ាន និងប្រធានាធិបតី ចូ បៃឌិន នឹងពិភាក្សាគ្នាអំពីមធ្យោបាយ និងវិធីសាស្ត្រនានា ដើម្បីបង្កើនកិច្ចសហប្រតិបត្តិការក្នុងវិស័យជាច្រើន ក្នុងនោះ ការឆ្លើយតបនឹងជំងឺកូវីដ-១៩ សន្តិសុខ សុខភាពសកល ការផ្លាស់ប្តូរបញ្ហាអាកាសធាតុ ការអភិវឌ្ឍប្រកបដោយចីរភាព កិច្ចសហប្រតិបត្តិការលំហសមុទ្រ ការអភិវឌ្ឍធនធានមនុស្ស ការអប់រំ និងចំណងទាក់ទងរវាងប្រជាពលរដ្ឋ និងប្រជាពលរដ្ឋ ក៏ដូចជាការតភ្ជាប់ទំនាក់ទំនងសេដ្ឋកិច្ច ជាដើម៕
