តុលាការកំពូល នៅថ្ងៃចន្ទម្សិលមិញ បានជំនុំជម្រះលើបណ្ដឹងសាទុក្ខរបស់ស្រ្ដីមួយរូបដែលត្រូវបានកាត់ទោសពីបទធ្វើទារុណកម្ម និងអំពើឃោរឃៅដោយឆូតមុខនិងអារដៃ ទៅលើកុមារីម្នាក់ក្នុងឆ្នាំ២០២០ ខណៈមេធាវីរបស់ពិរុទ្ធជនរូបនេះបានអះអាងថា កូនក្ដីរបស់ខ្លួនជាជនវិបល្លាសស្មារតី។
កាលពីឆ្នាំ២០២០ ស្រ្ដីឈ្មោះ លីវ ប៊ុនធឿន ត្រូវបានតុលាការកាត់ទោសពីបទធ្វើទារុណកម្ម និងអំពើឃោរឃៅមានស្ថានទម្ងន់ទោស ដែលបានប្រព្រឹត្តទៅលើកុមារីម្នាក់អាយុ៥ឆ្នាំ តាមរយៈការចាប់ឆូតមុខនិងអារដៃ ដោយសារតែខឹងនឹងជនរងគ្រោះបានយកដុំថ្មគប់លើកូនប្រុសរបស់ខ្លួន។
យោងតាមរបាយការណ៍របស់សមត្ថកិច្ច ពិរុទ្ធជនខាងលើនេះបានយកកាំបិតឆូតមុខនិងអារដៃជនរងគ្រោះ ក្នុងរយៈពេលពីរថ្ងៃបន្ទាប់ពីកុមារីជាជនរងគ្រោះរូបនេះបានយកដុំថ្មគប់លើកូនប្រុសរបស់ខ្លួន។
ពិរុទ្ធជនឈ្មោះ លីវ ប៊ុនធឿន ភេទស្រី អាយុ៤៣ឆ្នាំ ត្រូវបានសាលាដំបូងរាជធានីភ្នំពេញ ក្នុងឆ្នាំ២០២០ ផ្ដន្ទាទោសឱ្យជាប់ពន្ធនាគាររយៈពេល១២ឆ្នាំ និងបានបង្គាប់ឱ្យសងជំងឺចិត្តចំនួន២០០លានរៀល ឬស្មើប្រមាណ៥ម៉ឺនដុល្លារសហរដ្ឋអាមេរិកដល់គ្រួសារកុមារីរងគ្រោះ ប៉ុន្តែពិរុទ្ធជនក៏បានប្ដឹងឧទ្ធរណ៍ផងដែរ។
ទោះជាយ៉ាងណា សាលាឧទ្ធរណ៍រាជធានីភ្នំពេញ បានតម្កល់ទណ្ឌកម្មរបស់ស្រ្ដីរូបនេះរក្សាទុកជាបានការដដែល ហើយជនជាប់ចោទក៏បានសម្រេចបន្តប្ដឹងសាទុក្ខមកកាន់តុលាការកំពូល។
យោងតាមលោក ពុធ ធាវី ជាមេធាវីការពារក្ដីឱ្យអ្នកស្រី លីវ ប៊ុនធឿន បានថ្លែងឱ្យដឹងថា កូនក្ដីរបស់លោកបានទទួលស្គាល់ថា ខ្លួនបានប្រព្រឹត្តនូវបទឧក្រិដ្ឋនេះ ប៉ុន្តែលោកយល់ថា កូនក្ដីរបស់លោកគួរតែត្រូវបានចោទប្រកាន់ពីបទហិង្សាដោយចេតនាវិញ។
លោកបន្តថា កូនក្ដីរបស់ខ្លួនជាមនុស្សមានសតិវិបល្លាស។ ទោះជាយ៉ាងណា មេធាវីរូបនេះមិនអាចបង្ហាញលិខិតបញ្ជាក់ដោយវេជ្ជសាស្ត្រណាមួយឡើយអំពីបញ្ហាផ្លូវចិត្តរបស់កូនក្ដី នៅពេលដែលចៅក្រមស្នើសុំ។
ទាក់ទិននឹងករណីនេះ ប្តីរបស់ពិរុទ្ធជនដដែលក៏បានអះអាងប្រាប់តុលាការថា ភរិយារបស់ខ្លួនគឺតែងតែទៅមន្ទីរពេទ្យមិត្តភាពខ្មែរ-សូវៀតជាទៀងទាត់ ប៉ុន្តែបុរសរូបនេះក៏មិនមានជាឯកសារបញ្ជាក់ណាមួយផងដែរ។
លោក ពុធ ធាវី បន្ថែមថា៖ «សូមឯកឧត្ដម ប្រធានក្រុមប្រឹក្សាជំនុំជម្រះ ទម្លាក់ចោលនូវការសម្រេចនេះ ហើយបង្វែរសំណុំរឿងទៅសាលាឧទ្ធរណ៍វិញ ដើម្បីចោទប្រកាន់ឱ្យចំបទចោទ»។
ជាការឆ្លើយតប ចៅក្រមតុលាការកំពូល លោក សាលី ធារ៉ា បានចោទប្រកាន់ប្ដីរបស់ពិរុទ្ធជនថាកុហកតុលាការ ពីព្រោះប្រសិនបើប្រពន្ធរបស់ខ្លួនធ្លាប់ទៅកាន់មន្ទីរពេទ្យដើម្បីពិនិត្យបញ្ហាផ្លូវចិត្តមែននោះ គឺវាត្រូវតែមានឯកសារវេជ្ជសាស្ត្រជាក់លាក់ជាមិនខាន ។
ថ្លែងរៀបរាប់ដោយយំបណ្ដើរផងដែរនោះ ស្រ្ដីឈ្មោះ លីវ ប៊ុនធឿន បានទទួលស្គាល់នូវកំហុស និងបានស្នើសុំឱ្យមានការបន្ធូរបន្ថយទោស ខណៈចៅក្រមតុលាការកំពូល លោក ឃឹម ប៉ុណ្ណ គ្រោងនឹងប្រកាសសាលក្រមនៅថ្ងៃទី១៦ ខែឧសភា ខាងមុខនេះ៕
បកប្រែនិងសម្រួលដោយលោក ភុន ច័ន្ទឧសភា ចេញពីអត្ថបទដើមភាសាអង់គ្លេស៖ Woman Convicted of Slashing Girl Appeals 12-Year Sentence