រដ្ឋសភា នៅព្រឹកថ្ងៃពុធនេះ បានអនុម័តគាំទ្រទាំងស្រុងលើសេចក្ដីព្រាងច្បាប់ស្ដីពី «សុវត្ថិភាពម្ហូបអាហារ» ដោយសំឡេង១០២សំឡេង ខណៈមន្ត្រីរដ្ឋាភិបាលអះអាងថា សេចក្ដីព្រាងច្បាប់នេះមានសារៈសំខាន់សម្រាប់ការពារសុខុមាលភាព និងអាយុជីវិតប្រជាពលរដ្ឋ។
សេចក្ដីប្រកាសព័ត៌មានរបស់រដ្ឋសភា ស្ដីពីលទ្ធផលសម័យប្រជុំរដ្ឋសភាលើកទី៧ នីតិកាលទី៦ បានលើកឡើងថា សេចក្ដីព្រាងច្បាប់ស្ដីពីសុវត្ថិភាពម្ហូបអាហារ ដែលមាន១១ជំពូក និង៤៣មាត្រា ត្រូវបានអង្គសភាអនុម័តយល់ព្រមឱ្យប្រើប្រាស់ទាំងមូល មានចំនួន១០២សំឡេង។
ក្រសួងពាណិជ្ជកម្មបានឱ្យដឹងនៅក្នុងទំព័រហ្វេសប៊ុករបស់ខ្លួនដែរថា ក្នុងសម័យប្រជុំរដ្ឋសភានោះ លោក អង្គ វង្សវឌ្ឍានា ទេសរដ្ឋមន្រ្តីទទួលបន្ទុកបេសកកម្មពិសេស និងជាតំណាងរដ្ឋាភិបាល បានលើកឡើងថា សេចក្ដីព្រាងច្បាប់នេះមានអត្ថប្រយោជន៍ និងចំណុចសំខាន់ៗជាច្រើន ដូចជា ការបង្កើតឱ្យមានយន្តការទទួលខុសត្រូវរបស់ក្រសួងស្ថាប័នជាតិ ដើម្បីគ្រប់គ្រងប្រតិបត្តិករអាជីវកម្មម្ហូបអាហារនៅគ្រប់ដំណាក់កាលនៃខ្សែសង្វាក់ផលិតកម្ម ចាប់ពីកសិដ្ឋានផលិតរហូតដល់តុអាហារ និងធានាថាផលិតផលម្ហូបអាហារទាំងអស់ដែលចរាចរនៅកម្ពុជាមានគុណភាព សុវត្ថិភាព និងអនាម័យល្អសម្រាប់ប្រជាពលរដ្ឋគ្រប់ៗរូប។
លោកបន្តថា សេចក្តីព្រាងច្បាប់នេះក៏បានកំណត់គោលការណ៍ជាមូលដ្ឋាន ដើម្បីជំរុញផលិតផលម្ហូបអាហារត្រូវបានផលិត កែច្នៃ វេចខ្ចប់ និងចែកចាយ ផ្អែកទៅតាមស្តង់ដារនិងបទប្បញ្ញត្តិបច្ចេកទេសជាតិ សំដៅធានាឱ្យបាននូវការការពារអាយុជីវិតនិងសុខភាពប្រជាពលរដ្ឋ និងជំរុញប្រសិទ្ធភាពខ្ពស់ក្នុងការអនុវត្តពាណិជ្ជកម្មស្មើភាព សំដៅការពារផលប្រយោជន៍អ្នកប្រើប្រាស់។
លោក អង្គ វង្សវឌ្ឍនា បានគូសបញ្ជាក់ថា៖ «សេចក្ដីព្រាងច្បាប់នេះពិតមានសារៈសំខាន់ខ្លាំងណាស់សម្រាប់កម្ពុជា ព្រោះច្បាប់នេះនឹងចូលរួមគាំពារដល់សុខសុវត្ថិភាពផ្នែកម្ហូបអាហារជូនប្រជាពលរដ្ឋគ្រប់រូប ដោយធានាបាននូវការការពារសុខភាព និងអាយុជីវិត តាមរយៈការការពារការទទួលទានអាហារគ្មានសុវត្ថិភាព ដែលបណ្ដាលឱ្យកើតមានជំងឺផ្សេងៗ ព្រមទាំងអត្ថប្រយោជន៍សំខាន់ៗមួយចំនួនទៀតដែលកម្ពុជាអាចទទួលបាន នៅពេលដែលសេចក្ដីព្រាងច្បាប់នេះចូលជាធរមានក្នុងពេលឆាប់ៗខាងមុខ»។
ប្រភពដដែលបន្តថា សុវត្ថិភាពម្ហូបអាហារ ជាការទទួលខុសត្រូវរួម និងមានលក្ខណៈពហុវិស័យ ដែលចាំបាច់តម្រូវឱ្យមានការចូលរួមពីក្រសួង ស្ថាប័ន និងភាគីពាក់ព័ន្ធ ក្នុងការអនុវត្តការគ្រប់គ្រង សម្របសម្រួល និងត្រួតពិនិត្យគុណភាព សុវត្ថិភាពម្ហូបអាហារ នៅតាមគ្រប់ដំណាក់កាលនៃខ្សែសង្វាក់ផលិតកម្ម។
ក្រៅពីនោះ សេចក្តីព្រាងច្បាប់ស្ដីពីសុវត្ថិភាពម្ហូបអាហារ នឹងបង្កលក្ខណៈឱ្យប្រទេសកម្ពុជារៀបចំនូវប្រព័ន្ធសុវត្ថិភាពម្ហូបអាហារដែលមានលក្ខណៈទំនើប តាមរយៈការកសាងវិធីសាស្រ្តទប់ស្កាត់ជាមុន និងការត្រួតពិនិត្យខ្សែសង្វាក់ផលិតកម្ម ប្រសើរជាងការត្រួតពិនិត្យ និងវិភាគលើផលិតផលសម្រេច ដែលជាគោលការណ៍មួយយ៉ាងសំខាន់ក្នុងការជំរុញផលិតផលកម្ពុជា ឱ្យមានការទទួលស្គាល់ក្នុងទីផ្សារពិភពលោក។
សេចក្ដីព្រាងច្បាប់ស្តីពីសុវត្ថិភាពចំណីអាហារនេះ ត្រូវបានគណៈរដ្ឋមន្ត្រីអនុម័ត កាលពីថ្ងៃទី១ ខែមេសា ឆ្នាំ២០២២ ដោយក្នុងសេចក្តីព្រាងច្បាប់នោះបានបញ្ញត្តិពីគោលបំណងបង្កើតប្រព័ន្ធសុវត្ថិភាពម្ហូបអាហារសម្រាប់ការពារសុខភាពមនុស្សនិងអ្នកប្រើប្រាស់ តាមរយៈការទប់ស្កាត់ ការគ្រប់គ្រង និងលុបបំបាត់ការបំពុលនិងគ្រោះថ្នាក់ដែលបណ្ដាលមកពីម្ហូបអាហារផងដែរ។
សេចក្តីព្រាងច្បាប់ស្តីពីសុវត្ថិភាពអាហារនេះ ត្រូវបានរៀបចំឡើងក្នុងឆ្នាំ២០១៥ ដោយគ្របដណ្តប់លើម្ហូបអាហារទាំងកែច្នៃ និងមិនកែច្នៃដែលមានកំណត់ក្នុងច្បាប់ ព្រមទាំងលើខ្សែសង្វាក់ផលិតកម្មម្ហូបអាហារទាំងមូល ស្របតាមគោលការណ៍សុវត្ថិភាពម្ហូបអាហារ ចាប់ពីកសិដ្ឋានដល់តុបរិភោគ៕
