ពលរដ្ឋនៅស្រុកចន្ទ្រា ខេត្តស្វាយរៀង ចោទក្រុមហ៊ុនចិនមួយថាបានបិទផ្លូវក្នុងសហគមន៍មិនឱ្យប្រជាពលរដ្ឋធ្វើដំណើរឆ្លងកាត់ ក្រោយអភិវឌ្ឍផ្លូវនោះរួចរាល់។
កាលពីថ្ងៃទី១០ ខែឧសភា ឆ្នាំ២០២២ ពលរដ្ឋជាច្រើននាក់មកពី៣ភូមិ នៃឃុំព្រៃគគីរ ស្រុកចន្ទ្រា បានប្រមូលផ្ដុំតវ៉ាមុខសាលាស្រុក ដើម្បីរកអន្តរាគមន៍ពីអាជ្ញាធរឱ្យជួយដោះស្រាយករណីក្រុមហ៊ុនចិននៅក្នុងតំបន់សេដ្ឋកិច្ចពិសេសតាយសេង បិទផ្លូវក្នុងសហគមន៍មិនឱ្យពួកគេធ្វើដំណើរឆ្លងកាត់។
លោក ពុំ សុម៉ាល័យ អះអាងថាជាពលរដ្ឋរស់នៅភូមិគគីរ ឃុំព្រៃគគីរ ប្រាប់វីអូឌីនៅថ្ងៃពុធនេះថា ក្រុមហ៊ុនចិនឈ្មោះ តាយ សេង បានសុំពលរដ្ឋ និងអាជ្ញាធរអភិវឌ្ឍផ្លូវមួយខ្សែក្នុងសហគមន៍ ដោយសន្យាពេលធ្វើរួច នឹងអនុញ្ញាតឱ្យពលរដ្ឋធ្វើដំណើរឆ្លងកាត់ធម្មតា។ ប៉ុន្តែកាលពីដើមសប្ដាហ៍នេះ ក្រុមហ៊ុនបានបិទផ្លូវនោះ មិនឱ្យប្រជាពលរដ្ឋធ្វើដំណើរឆ្លងកាត់ឡើយ ដែលធ្វើឱ្យពលរដ្ឋខឹងសម្បា និងផ្ទុះការតវ៉ា។
លោកបន្ថែមថា៖ «មុនដំបូង ប្រជាពលរដ្ឋតវ៉ាមិនឱ្យក្រុមហ៊ុនធ្វើផ្លូវហ្នឹងទេ ដោយសារបារម្ភខ្លាចក្រុមហ៊ុនធ្វើហើយមិនឱ្យពលរដ្ឋធ្វើដំណើរឆ្លងកាត់ ប៉ុន្តែក្រោយអភិបាលរងខេត្តស្វាយរៀងចុះមកដោះស្រាយ គាត់បានឱ្យប្រជាពលរដ្ឋដែលមានដីជាប់ផ្លូវនោះជួយបរិច្ចាគដីខ្លះ ដើម្បីឱ្យក្រុមហ៊ុនធ្វើផ្លូវបានធ្វើដំណើរទាំងអស់គ្នា ហើយប្រជាពលរដ្ឋក៏ព្រមឱ្យធ្វើ ប៉ុន្តែពេលក្រុមហ៊ុនធ្វើរួច បានបិទផ្លូវហ្នឹងមិនឱ្យពលរដ្ឋធ្វើដំណើរចេញចូលទៅវិញ»។
ពលរដ្ឋនៅឃុំព្រៃគគីរម្នាក់ទៀត អ្នកស្រី អ៊ុង ផល្លី បានឱ្យដឹងថា ផ្លូវដែលក្រុមហ៊ុនបិទនោះមានប្រវែងប្រហែល៣គីឡូម៉ែត្រ មានប្រជាពលរដ្ឋចំនួន៣ភូមិ ក្នុងឃុំនេះ ធ្វើដំណើរឆ្លងកាត់ជាប្រចាំថ្ងៃ ដើម្បីទៅធ្វើការងារ ធ្វើកសិកម្ម និងប្រកបមុខរបរផ្សេងៗ។
អ្នកស្រីបន្ថែមថា៖ «កន្លែងហ្នឹងមានទួលប្រវត្តិសាស្ត្រមួយកន្លែងដែលប្រជាពលរដ្ឋ និងព្រះសង្ឃ ចូលធ្វើបុណ្យធ្វើទាននៅទីហ្នឹង ហើយមានប្រជាពលរដ្ឋជាច្រើនធ្វើដំណើរចូលទៅធ្វើស្រែនៅជិតៗនោះ អ៊ីចឹងគាត់បិទផ្លូវហ្នឹងម៉េចកើត! បើក្រុមហ៊ុននៅតែមិនគោរពសម្តីរបស់គាត់ យើងនឹងនាំគ្នាតវ៉ាទៀត»។
វីអូឌី មិនអាចរកការឆ្លើយតបពីតំណាងក្រុមហ៊ុនដែលរងការចោទប្រកាន់នោះបានទេ នៅថ្ងៃពុធនេះ។
មេឃុំព្រៃគគី លោក ពេទ ស៊ាន បានទទួលស្គាល់ថា ក្រុមហ៊ុនចិនពិតជាបានបិទផ្លូវមិនឱ្យពលរដ្ឋធ្វើដំណើរឆ្លងកាត់មែន ប៉ុន្តែបញ្ហានេះត្រូវបានដោះស្រាយបញ្ចប់ហើយ ដោយក្រុមហ៊ុនបានសម្រេចបើកផ្លូវឱ្យពលរដ្ឋធ្វើដំណើរឡើងវិញនៅថ្ងៃនេះ ក្រោយមានការសម្របសម្រួលពីអាជ្ញាធរពាក់ព័ន្ធ។
លោកបន្ថែមថា៖ «យើងដោះស្រាយបានមួយរយភាគរយហើយ ដោយពលរដ្ឋ និងក្រុមហ៊ុនបានព្រមព្រៀងគ្នា ក្រុមហ៊ុនគេឱ្យចរាចរធម្មតាវិញហើយ គេឱ្យដឹកបានត្រឹម៥តោន ឱ្យជួយថែទាំទាំងអស់គ្នា ហើយមានកិច្ចសន្យារវាងភាគីទាំងសងខាង»។
បើតាមមេឃុំរូបនេះ នៅឃុំព្រៃគគីរ មានប្រជាពលរដ្ឋរស់នៅជិត៦ ០០០នាក់ និងមានភូមិចំនួន៥ រួមមាន ភូមិគគី ភូមិកោះគោ ភូមិចំការលាវ ភូមិអង្គក្ដួច និងភូមិត្រពាំងបុណ្យ។ លោកអះអាងថា ការបិទផ្លូវនេះ គឺប៉ះពាល់ពលរដ្ឋតែមួយភូមិប៉ុណ្ណោះ៕