កម្មករជាច្រើននាក់បម្រើការងារនៅរោងចក្រកាត់ដេរសម្លៀកបំពាក់ ឃែនធើរេន អីភែរឹល (ខេមបូឌា) ស្ថិតក្នុងសង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ បាននាំគ្នាដេកយាមមុខរោងចក្រ ក្រោយសង្ស័យថៅកែរត់ចោល ដោយមិនបានដោះស្រាយសំណងតាមផ្លូវច្បាប់ជូនពួកគេ។
កម្មការិនីផ្នែកដេរ អ្នកស្រី ឃួន សុខា បម្រើការងារនៅរោងចក្រ ឃែនធើរេន ២១ឆ្នាំ ប្រាប់វីអូឌីនៅថ្ងៃសុក្រនេះថា ក្រុមកម្មករបានដេកយាមមុខរោងចក្ររយៈពេល១សប្ដាហ៍ហើយ ដើម្បីរារាំងមិនឱ្យមានការដឹកសម្ភារចេញពីរោងចក្រ ក្រោយពីថ្នាក់ដឹកនាំរបស់រោងចក្រនេះចាប់ពីផ្នែករដ្ឋបាលរហូតដល់អ្នកគ្រប់គ្រងបានលាឈប់ពីការងារអស់ និងថៅកែក៏បានបាត់ពីរោងចក្រ។
កម្មការិនីរូបនេះបន្តថា រោងចក្រនេះបានផ្អាកដំណើរការអាជីវកម្មជាច្រើនថ្ងៃហើយ ដោយថៅកែមិនបានជូនដំណឹងនិងដោះស្រាយប្រាក់សំណងជូនកម្មករតាមច្បាប់ឡើយ ហើយបានលួចដឹកសម្ភារចេញពីរោងចក្រថែមទៀត។
អ្នកស្រីបន្ថែមថា៖ «គេ [ថៅកែរោងចក្រ] អត់ជូនដំណឹងយើងថាក្ស័យធន ឬប្តូរទីតាំងអី អត់ផង! យើងធ្វើការសុខៗតាំងពីថ្ងៃទី១ ខែឧសភា រហូតដល់ថ្ងៃទី៧ ស្រាប់តែនៅថ្ងៃទី៩ វាបិទទ្វាររោងចក្រលែងឱ្យកម្មករចូលតែម្តង។ ឥលូវកម្មករទាមទារឱ្យក្រុមហ៊ុនទូទាត់អត្ថប្រយោជន៍ផ្សេងៗជូនកម្មករតាមផ្លូវច្បាប់ ព្រោះវាបានប៉ះពាល់ខ្លាំងដល់ជីវភាពរបស់ពួកគាត់។ និយាយទៅសឹង១០០ភាគ១ ០០០ ដែលបានកម្មករជំពាក់បំណុលធនាគារ និងត្រូវបង់ថ្លៃសាលាកូនរៀន និងថ្លៃចំណាយផ្សេងៗទៀត»។
ប្រធានសហជីពដើម្បីសិទ្ធិការងារប្រចាំរោងចក្រ ឃែនធើរេន អ្នកស្រី សុខ ម៉ាលី មានប្រសាសន៍ថា ថៅកែរោងចក្រ ឃែនធើរេន មានចេតនាគេចវេះមិនទទួលខុសត្រូវលើការទូទាត់ប្រាក់អត្ថប្រយោជន៍ជូនកម្មករ ខណៈកម្មករបម្រើការងារនៅរោងចក្រនេះភាគច្រើនមានអតីតភាពការងារយូរឆ្នាំ ចន្លោះពី១០ ទៅ២០ឆ្នាំ។ អ្នកស្រីបានស្នើដល់ក្រសួងការងារ និងអាជ្ញាធរពាក់ព័ន្ធ ស្រាវជ្រាវរកថៅកែរោងចក្រមកទទួលខុសត្រូវលើការទូទាត់សំណងជូនកម្មករ។
ប្រធានសហជីពរូបនេះលើកឡើងថា តាមផ្លូវច្បាប់ ពេលដែលរោងចក្របិទទ្វារដោយមិនបានជូនដំណឹងត្រឹមត្រូវ គឺថៅកែត្រូវដោះស្រាយសំណងជូនកម្មករចំនួន៥ចំណុច រួមមាន ប្រាក់ឈ្នួលចុងក្រោយ ប្រាក់ជូនដំណឹង ប្រាក់ជំងឺចិត្ត ប្រាក់អតីតភាពការងារ និងប្រាក់ដំណាច់ឆ្នាំដែលនៅសល់។
អ្នកស្រីបន្ថែមថា៖ «ក្រសួងការងារត្រូវតែជួយដល់បងប្អូនកម្មករយើង ត្រូវស្វែងរកចាប់ថៅកែឱ្យមកទទួលខុសត្រូវ ធ្វើយ៉ាងណាកុំថៅកែក្រុមហ៊ុនហ្នឹងវាគេចរួច។ ឥលូវនេះ ពួកខ្ញុំទឹកភ្នែក គ្មានលុយគ្មានកាក់ទេ។ ខ្លះគ្មានលុយសម្រាប់ហូបបាយ ខ្លះគ្មានលុយបង់ធនាគារទេ»។
បុគ្គលិកផ្នែករដ្ឋបាលរោងចក្រ ឃែនធើរេន លោក ឌាវ គឹមប៊ូ សុំមិនឆ្លើយតបជុំវិញវិវាទការងារនេះទេ ដោយថា លោកបានឈប់ធ្វើការងារនៅរោងចក្រ ឃែនធើរេន តាំងពីខែមករា ឆ្នាំ២០២២នេះ។
អគ្គលេខាធិការរងគណៈកម្មការដោះស្រាយកូដកម្មបាតុកម្មគ្រប់មុខសញ្ញា នៃក្រសួងការងារ និងបណ្តុះបណ្តាលវិជ្ជាជីវៈ លោក វង្ស សុវណ្ណ មានប្រសាសន៍ថា លោកមិនទាន់អាចសន្និដ្ឋានបានថា រោងចក្រ ឃែនធើរេន បិទទ្វារដោយសារថៅកែរត់ឬយ៉ាងណានៅឡើយទេ ដោយរង់ចាំការស្រាវជ្រាវសិន។
លោកបន្តថា ក្រសួងកំពុងរង់ចាំបណ្តឹងផ្លូវការពីក្រុមកម្មករឱ្យជួយអន្តរាគមន៍ដោះស្រាយ ហើយនៅពេលទទួលបានបណ្តឹងពីកម្មករ ក្រសួងនឹងដោះស្រាយតាមនីតិវិធី និងច្បាប់ស្តីពីការងារ។ លោកបញ្ជាក់ថា ប្រសិនបើដោះស្រាយនីតិវិធីមិនបាន នឹងបញ្ជូនសំណុំរឿងទៅតុលាការ។
លោកបន្ថែមថា៖ «ប្រសិនបើថៅកែមិនចេញមុខមកដោះស្រាយ អាហ្នឹងខាងអធិការកិច្ចការងាររបស់យើងនឹងធ្វើការត្រួតពិនិត្យរឿងហ្នឹង និងបញ្ជូនសំណុំឯកសារពាក់ព័ន្ធតាមនីតិវិធីច្បាប់ស្តីពីការងារ។ បើយើងដោះស្រាយតាមច្បាប់ស្តីពីការងារហើយ ថៅកែនៅតែមិនចេញមុខមកដោះស្រាយ។ យើងអាចបញ្ជូនសំណុំរឿងនេះទៅអាជ្ញាកណ្ដាល និងតុលាការតាមនីតិវិធីរបស់យើង»។
កាលពីថ្ងៃទី១៩ ខែមេសា ឆ្នាំ២០២២ កម្មករជាង៣០០នាក់ របស់រោងចក្រកាត់ដេរ ឃែនធើរេន អីភែរឹល (ខេមបូឌា) បាននាំគ្នាតវ៉ាបិទកំណាត់ផ្លូវវេងស្រេង ក្នុងសង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ អស់រយៈពេលជិត១ម៉ោង ដើម្បីទាមទារឱ្យថៅកែទូទាត់ប្រាក់អតីតភាពការងារ និងប្រាក់អត្ថប្រយោជន៍ផ្សេងៗតាមច្បាប់ ក្រោយពួកគេឃើញថៅកែដឹកសម្ភារផ្សេងៗចេញពីរោងចក្រដោយមិនផ្ដល់ដំណឹងដល់កម្មករ។
បើតាមប្រធានសហជីពដើម្បីសិទ្ធិការងារប្រចាំរោងចក្រ ឃែនធើរេន អ្នកស្រី សុខ ម៉ាលី គឺដើមឡើយ រោងចក្រនេះមានកម្មករសរុបចំនួនជាង១ពាន់នាក់ ប៉ុន្តែបច្ចុប្បន្ននៅសល់ជាង៣០០នាក់ប៉ុណ្ណោះ ដោយភាគច្រើនពួកគេមានអតីតភាពការងារច្រើន ចន្លោះពី១០ ទៅ២០ឆ្នាំ៕