កម្មករ-កម្មការិនីជាង៣០០នាក់ បម្រើការងារនៅរោងចក្រកាត់ដេរសម្លៀកបំពាក់ ឃែនធើរេន អីភែរឹល ខេមបូឌា (CANTERAN APPAREL Cambodia co.,ltd) នៅសង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ នៅថ្ងៃចន្ទនេះ បាននាំគ្នាទៅតវ៉ានៅមុខរោងចក្រ ខ្វលីធី តេក្សស្ទីល (QUALITY TEXTILES) ស្ថិតក្នុងសង្កាត់ដូចគ្នា ដើម្បីទាមទារឱ្យថៅកែរោងចក្រនេះចេញមុខដោះស្រាយសំណង ក្រោយបិទទ្វាររោងចក្រ។
កម្មករបម្រើការងារនៅរោងចក្រកាត់ដេរសម្លៀកបំពាក់ ឃែនធើរេន អីភែរឹល (ខេមបូឌា) បាននាំគ្នាដេកយាមមុខរោងចក្រជាង១សប្តាហ៍ហើយ ដើម្បីការពារមិនឱ្យមានការដឹកសម្ភារផ្សេងៗចេញពីរោងចក្រ ក្រោយសង្ស័យថៅកែរត់ចោលដោយមិនបានដោះស្រាយសំណងតាមផ្លូវច្បាប់ជូនពួកគេ។
អ្នកស្រី សេង សុផាត អះអាងថាជាកម្មការិនីផ្នែកដេរនៅរោងចក្រ ឃែនធើរេន អស់រយៈពេល១៨ឆ្នាំមកហើយ បានប្រាប់វីអូឌីថា មូលហេតុដែលក្រុមកម្មករទៅតវ៉ានៅមុខរោងចក្រ ខ្វលីធី តេក្សស្ទីល ដោយសាររោងចក្រទាំង២នេះមានថៅកែតែមួយ ហើយកាលពីរោងចក្រ ឃែនធើរេន នៅដំណើរការអាជីវកម្ម គឺរោងចក្រតែងតែដោះដូរអីវ៉ាន់និងសម្ភារផ្សេងៗជាមួយរោងចក្រ ខ្វលីធី តេក្សស្ទីល នេះ ដើម្បីជំរុញដំណើរការចង្វាក់ផលិតកម្ម។
អ្នកស្រី សេង សុផាត បន្តថា ថ្នាក់ដឹកនាំរោងចក្រ ឃើធើរេន ដែលបានលាឈប់ពីការងារនៅរោងចក្រនេះ និងសម្ភារមួយចំនួនដែលថៅកែបានដឹកចេញ គឺបានដឹកចូលទៅរោងចក្រ ខ្វលីធី តេក្សស្ទីល។
អ្នកស្រីបន្ថែមថា៖ «ថ្នាក់ដឹកនាំរោងចក្រនេះ កន្លងមកបានហៅពួកខ្ញុំទៅមើលគំរូចង្វាក់ផលិតកម្មនៅរោងចក្រ ខ្វលីធី ដែលគាត់ប្រាប់ថាជាសាខាជាមួយគ្នា។ ឥលូវថៅកែនៅរោងចក្រ ខ្វលីធី បែរជាគាត់ថាមិនស្គាល់ពួកខ្ញុំ ទាំងដែលពួកខ្ញុំធ្វើការជាមួយជាង២០ឆ្នាំហើយហ្នឹង។ ខ្ញុំសុំអំពាវនាវដល់នាយករដ្ឋមន្ត្រី និងអ្នកពាក់ព័ន្ធទាំងអស់ជួយដោះស្រាយដល់ពួកខ្ញុំជាកម្មករផង កម្មករក្រីក្រណាស់! ហើយដល់ថ្ងៃបោះឆ្នោត តែពួកខ្ញុំអត់មានលុយអីសម្រាប់ធ្វើដំណើរទៅបោះឆ្នោត»។
អ្នកស្រី នៅ ហាន បម្រើការងារនៅរោងចក្រ ឃើធើរេន រយៈពេល២១ឆ្នាំ និយាយថា ករណីរោងចក្រនេះផ្អាកដំណើរអាជីវកម្ម ខាងថៅកែមិនបានជូនដំណឹងមុន និងដោះស្រាយប្រាក់សំណងតាមផ្លូវច្បាប់ជូនកម្មករឡើយ ហើយបានលួចដឹកសម្ភារចេញពីរោងចក្រថែមទៀត ប៉ុន្តែត្រូវបានរារាំងដោយក្រុមកម្មករ។
កម្មការិនីវ័យ៤០ឆ្នាំរូបនេះបន្តថា ក្រុមកម្មករកំពុងប្រឈមជាមួយការខ្វះខាតក្នុងជីវភាពគ្រួសារ និងគ្មានលុយសម្រាប់បង់សងបំណុលធនាគារ និងប្រឈមគ្មានការងារធ្វើ ខណៈវ័យពួកគាត់កាន់តែចាស់។
អ្នកស្រីបន្ថែមថា៖ «ខ្ញុំធ្វើការរាល់ថ្ងៃសម្រាប់ចំណាយលើកូនរៀន ទឹកភ្លើង និងបង់ធនាគារ ដល់រោងចក្របិទ មិនដោះស្រាយសំណងជូនពួកខ្ញុំ តើខ្ញុំបានអីសងគេ? អ៊ីចឹងសុំឱ្យអាជ្ញាធរដែនដី និងអ្នកពាក់ព័ន្ធ ត្រូវស្វែងរកថៅកែមកទទួលខុសត្រូវ»។
វីអូឌី មិនអាចសុំការបញ្ជាក់ពីអតីតបុគ្គលិកផ្នែករដ្ឋបាលរោងចក្រ ឃែនធើរេន លោក ឌាវ គឹមប៊ូ ដែលកម្មករអះអាងថា បច្ចុប្បន្នកំពុងបម្រើការងារនៅរោងចក្រ ខ្វលីធី តេក្សស្ទីល និងអភិបាលខណ្ឌពោធិ៍សែនជ័យ លោក ហែម ដារិទ្ធ បានទេ នៅថ្ងៃចន្ទនេះ។
ចំណែកអគ្គលេខាធិការនៃសមាគមរោងចក្រកាត់ដេរនៅកម្ពុជា (GMAC) លោក ខេន លូ សុំមិនឆ្លើយពាក់ព័ន្ធករណីនេះ។
មន្ត្រីសម្ព័ន្ធសហជីពចលនាកម្មករ លោក ស៊ុត ចិត្រ មានប្រសាសន៍ថា ករណីថៅកែបិទអាជីវកម្មដោយមិនបានជូនដំណឹងត្រឹមត្រូវដល់កម្មករនេះ គឺជារឿងខុសច្បាប់។ លោកថា តាមច្បាប់ មុននឹងបិទរោងចក្រ ថៅកែត្រូវជូនដំណឹងដល់កម្មករជាមុន និងត្រូវដោះស្រាយសំណងជូនកម្មករចំនួន ៥ចំណុច រួមមាន ប្រាក់ឈ្នួលចុងក្រោយ ប្រាក់ជូនដំណឹង ប្រាក់ជំងឺចិត្ត ប្រាក់អតីតភាពការងារ និងប្រាក់ដំណាច់ឆ្នាំដែលនៅសល់។
មន្ត្រីសហជីពរូបនេះលើកឡើងថា ថៅកែរោងចក្រ ឃើធើរេន មានចេតនាគេចវេះមិនទទួលខុសត្រូវលើការទូទាត់ប្រាក់អត្ថប្រយោជន៍ផ្សេងៗជូនកម្មករ។ លោកថា នេះមិនមែនជាលើកទី១ទេដែលជនបរទេសមករកស៊ីនៅកម្ពុជា ហើយបានធ្វើបាបកម្មករខ្មែរ តាមរយៈការផ្អាកអាជីវកម្មដោយមិនផ្តល់សំណងត្រឹមត្រូវជូនកម្មករ។
លោកបន្ថែមថា៖ «នេះវាជាចេតនាមួយអាក្រក់ អ៊ីចឹងសុំឱ្យរដ្ឋាភិបាលពិនិត្យឡើងវិញ ទាក់ទងនឹងរោងចក្រដែលបានបិទទ្វារ ដោយធ្វើយ៉ាងណាជួយអន្តរាគមន៍ឱ្យមានការទូទាត់សំណងជូនបងប្អូនកម្មករតាមផ្លូវច្បាប់។ មិនត្រូវមកបើករកស៊ីចំណេញរាប់ឆ្នាំ បង្កើតសាខា៤ឬ១០ហើយ ដល់ពេលបិទ អត់ទទួលខុសត្រូវរបៀបនេះទេ អាហ្នឹងវាមិនល្អទេ»។
អគ្គលេខាធិការរងគណៈកម្មការដោះស្រាយកូដកម្មបាតុកម្មគ្រប់មុខសញ្ញា នៃក្រសួងការងារ និងបណ្តុះបណ្តាលវិជ្ជាជីវៈ លោក វង្ស សុវណ្ណ មានប្រសាសន៍ថា រហូតមកដល់ពេលនេះ ក្រសួងមិនទាន់ទទួលបានបណ្តឹងពីក្រុមកម្មករនៅឡើយទេ។ លោកថា ពេលទទួលបានបណ្តឹងពីកម្មករ ក្រសួងនឹងដោះស្រាយតាមនីតិវិធីច្បាប់ស្តីពីការងារ។
លោកបន្ថែមថា៖ «បើយើងនឹងដោះស្រាយតាមច្បាប់ស្តីពីការងារហើយ ថៅកែនៅតែមិនចេញមុខមកដោះស្រាយទៀត។ យើងនឹងបញ្ជូនសំណុំរឿងនេះទៅក្រុមប្រឹក្សាអាជ្ញាកណ្ដាល និងតុលាការតាមនីតិវិធីរបស់យើង»។
បើតាមប្រធានសហជីពដើម្បីសិទ្ធិការងារប្រចាំរោងចក្រ ឃែនធើរេន អ្នកស្រី សុខ ម៉ាលី គឺដើមឡើយ រោងចក្រនេះមានកម្មករសរុបចំនួនជាង១ ០០០នាក់ ប៉ុន្តែបច្ចុប្បន្ននៅសល់ជាង៣០០នាក់ប៉ុណ្ណោះ ដោយភាគច្រើនពួកគេមានអតីតភាពការងារច្រើន ចន្លោះពី១០ឆ្នាំ ទៅ២០ឆ្នាំ។
ក្រុមកម្មករអះអាងថា ថ្ងៃស្អែកពួកគេនាំគ្នាទៅតវ៉ាមុខរោងចក្រ ខ្វលីធី តេក្សស្ទីល ដែលមានទីតាំងស្ថិតក្នុងភូមិត្រពាំងថ្លឹង សង្កាត់ចោមចៅទី១ ខណ្ឌពោធិ៍សែនជ័យ ម្តងទៀត បើនៅតែមិនមានដំណោះស្រាយសម្រាប់ពួកគេ៕
