ក្រសួងព័ត៌មានស្នើសុំមេធាវីរបស់រដ្ឋាភិបាល ដើម្បីជួយការពារក្តីឱ្យអ្នកកាសែតក្នុងស្រុកចំនួន៤នាក់ដែលជាប់ពាក់ព័ន្ធក្នុងសំណុំរឿងព្រហ្មទណ្ឌ។
យោងតាមលិខិតមួយច្បាប់ដែលចេញដោយក្រសួងព័ត៌មាននៅថ្ងៃចន្ទនេះ បង្ហាញថា ខ្លួនបានស្នើសុំគោលការណ៍ទៅប្រធានក្រុមមេធាវីរបស់រដ្ឋាភិបាល និងមេធាវីស្ម័គ្រចិត្តដែលមានឈ្មោះថា «សម្តេចតេជោ» ក្រោយទទួលបានសំណុំរឿង និងកិច្ចអន្តរាគមន៍ពីក្រុមអ្នកកាសែត។
លិខិតបន្តថា ការស្នើសុំក្រុមមេធាវីរបស់រដ្ឋាភិបាលនេះ នៅបន្ទាប់ពីតំណាងអយ្យការអមសាលាដំបូងខេត្តកំពង់ឆ្នាំង កាលពីដើមខែមករា ឆ្នាំ២០២២ កន្លងទៅ សម្រេចចោទប្រកាន់ អ្នកកាសែត៤នាក់ ពីបទ «កាន់កាប់ ឬដឹកជញ្ជូនអាវុធគ្មានការអនុញ្ញាត និងបទញុះញង់ឱ្យប្រព្រឹត្តបទឧក្រិដ្ឋជាអាទិ៍ »។
បើតាមលិខិតស្នើសុំកិច្ចអន្តរាគមន៍របស់ក្រសួងព័ត៌មាន អ្នកកាសែតទាំង៤រូប ដែលរងការចោទប្រកាន់ក្នុងសំណុំរឿងនេះ មានដូចជាឈ្មោះ សាំង ចាន់ថន ភេទប្រុស ជាចាងហ្វាងគេហទំព័រ MC TV Online លោក អុក ប៉ារ៉ាឌី ចាងហ្វាងគេហទំព័រ Kriell hot news online លោក ឈួន គង់តារា ប្រធានស៊ើបការព័ត៌មានរបស់ទូរទស្សន៍មហាជន SMC TV និងជាអគ្គនាយករងគេហទំព័រ យុវជនការពារសន្តិភាព ព្រមទាំងលោក ប្រាក់ សង្ហា ជាអ្នកបើករថយន្ត ឱ្យចាងហ្វាង នៃគេហទំព័រ MC TV Online។
ប្រភពដដែលបន្តថា អ្នកកាសែតទាំង ៤រូបនេះ ត្រូវបានតុលាការខេត្តកំពង់ឆ្នាំង ចោទប្រកាន់ថាបានប្រព្រឹត្តបទល្មើសនៅក្នុងទីតាំងភូមិគុយ និងភូមិប្រាសាទ ស្ថិតក្នុងឃុំដារ ស្រុកកំពង់លែង ស្រុកកំពង់ឆ្នាំង កាលពីដើមខែមករា ឆ្នាំ២០២២៕