ក្រសួងបរិស្ថាន សង្គមស៊ីវិល និងអាជ្ញាធរពាក់ព័ន្ធ បន្តធ្វើយុទ្ធនាការ «អន្ទាក់សូន្យ» នៅខេត្តព្រះវិហារ នៅថ្ងៃចន្ទនេះ ដើម្បីលុបបំបាត់ការដាក់អន្ទាក់សត្វព្រៃគ្រប់ប្រភេទ នៅក្នុងតំបន់ការពារធម្មជាតិ។
សេចក្តីប្រកាសព័ត៌មានរួមបានឱ្យដឹងថា យុទ្ធនាការនេះរៀបចំដោយអង្គការ WCS សហការជាមួយក្រសួងបរិស្ថាន មន្ទីរបរិស្ថានខេត្តព្រះវិហារ រដ្ឋបាលខេត្តព្រះវិហារ គម្រោងព្រៃឡង់បៃតង និងអង្គការអភិរក្សអន្តរជាតិ (CI)។
សេចក្តីប្រកាសព័ត៌មានដដែលបន្តថា៖ «យុទ្ធនាការអន្ទាក់សូន្យនេះអំពាវនាវឱ្យមានការដាក់ចេញនូវវិធានការបន្ទាន់នានា ដើម្បីបង្កើនការពង្រឹងការអនុវត្តច្បាប់ និងពិនិត្យមើលបទប្បញ្ញត្តិពាក់ព័ន្ធ ក្នុងគោលបំណងទប់ស្កាត់ការបរបាញ់សត្វព្រៃខុសច្បាប់ និងបញ្ចប់វិបត្តិអន្ទាក់ដែលកំពុងគំរាមកំហែងដល់ជីវិតសត្វព្រៃកម្ពុជាកាន់តែខ្លាំងឡើង»។
រដ្ឋលេខាធិការក្រសួងបរិស្ថាន លោក នេត្រ ភក្ត្រា បានលើកឡើងក្នុងសេចក្តីប្រកាសព័ត៌មានរួមនោះថា៖ «រាប់ចាប់ពីប្រជាពលរដ្ឋក្នុងភូមិដល់អ្នកផ្តល់សេវាដឹកជញ្ជូន អ្នកលក់ដូរម្ហូបអាហារនៅទីផ្សារក្នុងក្រុងនិងទីប្រជុំជន រហូតដល់ម្ចាស់ភោជនីយដ្ឋាន និងអតិថិជន ការចូលរួមរបស់ប្រជាពលរដ្ឋសហគមន៍ គឺដើរតួយ៉ាងសំខាន់ក្នុងការផ្តល់សុវត្ថិភាពដល់ការរស់រាននៃសត្វព្រៃគ្រប់ប្រភេទក្នុងទីជម្រកព្រៃធម្មជាតិរបស់ពួកវា និងក្នុងការចូលរួមបញ្ឈប់ការប្រើប្រាស់និងការដាក់អន្ទាក់នៅក្នុងដែនជម្រកធម្មជាតិសម្រាប់សត្វព្រៃ»។
លោកក៏បានអំពាវនាវដល់ប្រជាពលរដ្ឋទាំងអស់ឱ្យបញ្ឈប់ការទទួលទានសាច់សត្វព្រៃ ឬជាវផលិតផលសត្វព្រៃដទៃទៀត ព្រមទាំងចូលរួមក្នុងសកម្មភាពអភិរក្សធនធានធម្មជាតិឱ្យនៅគង់វង្សផងដែរ។
នាយកអង្គការ WCS លោកបណ្ឌិត កែន សេរីរដ្ឋា បានថ្លែងថា ការទប់ស្កាត់សកម្មភាពដាក់អន្ទាក់នៅក្នុងប្រទេសកម្ពុជា នឹងមិនអាចទទួលបានជោគជ័យទេ ប្រសិនបើគ្មានការចូលរួមពីសាធារណជន។
លោកថា៖ «យុទ្ធនាការនេះគឺជាយន្តការមួយប្រកបដោយប្រសិទ្ធភាពសម្រាប់យើងទាំងអស់គ្នាក្នុងការផ្សព្វផ្សាយសារបន្ទាន់ទៅកាន់សាធារណជន ដើម្បីបញ្ឈប់ការប្រើប្រាស់ផលិតផលសត្វព្រៃឱ្យបានទាន់ពេលវេលា»។
លោកបន្ថែមថា៖ «អង្គការ WCS សូមទទូចស្នើសុំឱ្យអ្នកពាក់ព័ន្ធទាំងអស់ចូលរួមអនុវត្តតាមការអំពាវនាវនេះ ទាំងអ្នកដែលបង្កើតឱ្យមានតម្រូវការប្រើប្រាស់ផលិតផលសត្វព្រៃ និងទាំងអ្នកជួញដូរសាច់សត្វព្រៃ។ សត្វព្រៃ គឺជាផ្នែកដ៏សំខាន់មួយនៃប្រព័ន្ធអេកូឡូស៊ី។ ការចូលរួមរបស់លោកអ្នកថ្ងៃនេះ នឹងធានាដល់ការរស់រានរបស់សត្វព្រៃនាពេលអនាគត»។
បើតាមសេចក្តីប្រកាសព័ត៌មានរួម នេះជាយុទ្ធនាការទី៣ ក្នុងចំណោម «យុទ្ធនាការអន្ទាក់សូន្យ» ចំនួន៨ ក្នុងនោះ យុទ្ធនាការទី១ បានរៀបចំឡើងដោយក្រសួងបរិស្ថាន នៅរាជធានីភ្នំពេញ កាលពីថ្ងៃទី៣ ខែមីនា និងយុទ្ធនាការទី២ រៀបចំឡើងនៅខេត្តស្ទឹងត្រែង ដោយអង្គការ WWF សហការជាមួយមន្ទីរបរិស្ថានខេត្តស្ទឹងត្រែង អង្គការ CI អង្គការ WEA និងគម្រោងព្រៃឡង់បៃតង កាលពីដើមខែមេសាកន្លងទៅ។
ចំណែកយុទ្ធនាការបន្តបន្ទាប់ទៀតនឹងរៀបចំធ្វើឡើងនៅខេត្តក្រចេះ មណ្ឌលគិរី កំពង់ធំ រតនគិរី និងបញ្ចប់នៅរាជធានីភ្នំពេញ។
ក្នុងឆ្នាំ២០២១ ក្រសួងបរិស្ថាន និងស្ថាប័នអង្គការដៃគូរបស់ខ្លួនបានដកអន្ទាក់សរុបចំនួន៦១ ៦១១អន្ទាក់ ចេញពីតំបន់ការពារធម្មជាតិ ចំនួន៧២ និងច្រករបៀងជីវចម្រុះផ្សេងៗទៀតក្នុងប្រទេសកម្ពុជា។ ជាមធ្យម ក្នុងមួយឆ្នាំ មានអន្ទាក់សរុបចំនួនប្រមាណជាង៤០ ០០០ ត្រូវបានដកចេញពីតំបន់ការពារធម្មជាតិទាំងនេះ។
បើតាមលោក នេត្រ ភក្ត្រា ក្នុងឆ្នាំ២០២១នោះដែរ ក្រុមសង្គ្រោះសត្វព្រៃបន្ទាន់មកពីអង្គភាពចម្រុះ បានចុះប្រតិបត្តិការបង្ក្រាបការជួញដូរសត្វព្រៃចំនួន៦២៥ករណី សង្គ្រោះសត្វព្រៃបាន១ ២៧១ក្បាល រឹបអូសសាច់សត្វព្រៃចំនួន៣ ៦០៩ក្បាល និងរឹបអូសសាច់សត្វព្រៃគ្រប់ប្រភេទបានចំនួន៣៥៤គីឡូក្រាម បញ្ចូនសំណុំរឿងចំនួន១១ទៅតុលាការ និងបានដោះលែងសត្វព្រៃចូលទៅព្រៃធម្មជាតិវិញចំនួន៨៦៤ក្បាល៕