រដ្ឋាភិបាលអនុញ្ញាតឱ្យកម្មករនិយោជិតឈប់សម្រាក១ថ្ងៃមុនថ្ងៃបោះឆ្នោត និង១ថ្ងៃក្រោយថ្ងៃបោះឆ្នោត ដើម្បីឱ្យពួកគាត់អាចទៅបោះឆ្នោតជ្រើសរើសក្រុមប្រឹក្សាឃុំសង្កាត់ ដែលនឹងប្រព្រឹត្តទៅនៅថ្ងៃទី០៥ ខែមិថុនា ឆ្នាំ២០២២ ខាងមុខនេះ។
កាលពីថ្ងៃទី០៤ ខែឧសភា ឆ្នាំ២០២២ ក្រសួងការងារ និងបណ្ដុះបណ្ដាលវិជ្ជាជីវៈ បានដាក់សំណើទៅលោកនាយករដ្ឋមន្ត្រី ហ៊ុន សែន ស្តីពីការឈប់សម្រាករបស់កម្មករនិយោជិត ដើម្បីទៅបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥នេះ។
ជាការឆ្លើយតបតាមរយៈលិខិតរបស់ទីស្ដីការគណៈរដ្ឋមន្ត្រី ទៅរដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ចុះថ្ងៃទី២០ ខែឧសភា ឆ្នាំ២០២២ ដែលវីអូឌីទទួលបាននៅថ្ងៃអង្គារនេះ បានឱ្យដឹងថា រដ្ឋាភិបាលយល់ព្រមជាគោលការណ៍ឱ្យកម្មករនិយោជិតឈប់សម្រាក ១ថ្ងៃមុនថ្ងៃបោះឆ្នោត និង១ថ្ងៃក្រោយថ្ងៃបោះឆ្នោត ដោយរក្សាប្រាក់ឈ្នួល និងអត្ថប្រយោជន៍ផ្សេងៗនៅដដែល។
អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ បញ្ជាក់បន្ថែមយ៉ាងខ្លីនៅថ្ងៃអង្គារនេះថា សេចក្តីសម្រេចនេះត្រូវអនុវត្តទាំងម្ចាស់រោងចក្រសហគ្រាស និងកម្មករនិយោជិតដែលធ្វើការក្នុងវិស័យឯកជន។
ប្រធានសហភាពការងារកម្ពុជា លោក អាត់ ធន់ មានប្រសាសន៍ថា ការឱ្យកម្មករនិយោជិតបានឈប់សម្រាក១ថ្ងៃមុន និង១ថ្ងៃក្រោយថ្ងៃបោះឆ្នោតនេះ មិនជាបញ្ហាសម្រាប់ពលរដ្ឋដែលរស់នៅជិតកន្លែងបោះឆ្នោតរបស់ពួកគេ ប៉ុន្តែសម្រាប់អ្នកទៅបោះឆ្នោតនៅតាមខេត្តឆ្ងាយៗ គឺពួកគេអាចនឹងបញ្ហាលំបាកជាមួយនឹងពេលវេលាក្នុងការធ្វើដំណើរទៅមក។
មេសហជីពរូបនេះចង់ឱ្យនិយោជកជួយសម្រួលបន្ថែមទៀត ដោយធ្វើយ៉ាងណាឱ្យអ្នកដែលទៅបោះឆ្នោតនៅតាមបណ្តាខេត្តឆ្ងាយៗបានសម្រាកច្រើនជាងនេះ ដោយលោកបារម្ភថា អ្នកនៅខេត្តឆ្ងាយអាចនឹងមិនទៅបោះឆ្នោតច្រើន។
លោកបន្ថែមថា៖ «ខ្ញុំគិតថា សម្រាប់អ្នកមានផ្ទះជិត និងផ្ទះឆ្ងាយល្មម វាមិនអីទេប៉ុណ្ណឹងនោះ ទៅមួយថ្ងៃមកមួយថ្ងៃ។ ប៉ុន្តែសម្រាប់អ្នកនៅខេត្តឆ្ងាយ អាចនឹងយឺតយ៉ាវ ដោយសារតែវាស្ទះមធ្យោបាយធ្វើដំណើរ ឬក៏បញ្ហាស្ទះចរាចរណ៍។ អ៊ីចឹងខ្ញុំគិតថា ក្រសួងការងារ និងក្រុមហ៊ុន គួរតែផ្តល់ការអនុញ្ញាតឱ្យឈប់សម្រាកច្រើនជាងនេះ ចំពោះអ្នកទៅបោះឆ្នោតជាក់ស្តែងដែលមិនមានពេលគ្រប់គ្រាន់។ កាលណាមិនមានសម្រួលឱ្យទេ ធ្វើឱ្យពួកគាត់មិនចង់ទៅបោះឆ្នោត ធ្វើឱ្យបាត់បង់ចំនួនអ្នកទៅបោះឆ្នោតច្រើន»។
កម្មករបម្រើការងារនៅរោងចក្រ W&D ក្នុងរាជធានីភ្នំពេញ លោក សឿង ប្រុស ដែលត្រូវទៅបោះឆ្នោតនៅខេត្តកំពត និយាយថា ការដែលរដ្ឋាភិបាលកំណត់ឱ្យកម្មករឈប់ត្រឹម៣ថ្ងៃទៅបោះឆ្នោតនេះ គឺមានរយៈពេលខ្លីសម្រាប់រូបលោក និងពលរដ្ឋផ្សេងទៀតដែលរស់នៅតាមបណ្តាខេត្តឆ្ងាយៗ។
លោកថា៖ «អ្នកខ្លះទៀតនៅបាត់ដំបង បន្ទាយមានជ័យ ប៉ៃលិន អ៊ីចឹងរយៈពេល៣ថ្ងៃ ទៅមក វាតក់ក្រហល់ពេក។ បើសិនជារដ្ឋាភិបាលឱ្យសម្រាក២ថ្ងៃទៀត ល្អហ្មង»។
កម្មករម្នាក់ទៀតបម្រើការងាររោងចក្រកាត់ដេរ ខ្វាន់ទុំ ស្ថិតនៅរាជធានីភ្នំពេញ លោក ស៊ុន ហេង ដែលត្រូវទៅបោះឆ្នោតនៅស្រុកកំណើតក្នុងខេត្តកំពង់ចាម និយាយថា ការឈប់សម្រាករយៈពេល៣ថ្ងៃ រាប់ទាំងថ្ងៃបោះឆ្នោតនេះ គឺគ្រប់គ្រាន់សម្រាប់លោក។
លោកបន្ថែមថា៖ «បើសម្រាប់ខ្ញុំ ពេលវេលា៣ថ្ងៃហ្នឹង វាគ្រប់គ្រាន់ហើយ ខ្ញុំគិតថាវាអត់អីទេ។ សម្រាប់ការធ្វើដំណើរមួយថ្ងៃ ហើយទៅបោះឆ្នោតមួយថ្ងៃ យើងត្រលប់មកវិញមួយថ្ងៃ អាហ្នឹងយើងគ្រប់គ្រាន់ហើយ»។
ក្រៅពីការជូនដំណឹងពីការឈប់សម្រាកសម្រាប់ទៅបោះឆ្នោតនេះ ក្រសួងការងារ និងបណ្តុះបណ្តាលវិជ្ជាជីវៈ ក៏បានចេញសេចក្ដីជូនដំណឹងមួយនៅថ្ងៃទី២៤ ខែឧសភានេះ ដោយបានរម្លឹកដល់ម្ចាស់រោងចក្រសហគ្រាស ត្រូវបើកប្រាក់ឈ្នួលជូនកម្មករនយោជិតឱ្យបានមុនថ្ងៃបោះឆ្នោត ហើយក្នុងករណីគ្មានលទ្ធភាពបើកប្រាក់ឈ្នួលឱ្យកម្មករទាន់ពេលទេ ត្រូវអនុញ្ញាតឱ្យកម្មករខ្ចីប្រាក់ឈ្នួលមួយភាគជាមុនសិន។
ក្រសួងការងារបានបញ្ជាក់ទៀតថា ការឈប់សម្រាករបស់កម្មករនិយោជិតនេះ គឺពុំតម្រូវឱ្យបង្ហាញឯកសារពាក់ព័ន្ធផ្សេងៗពេលត្រឡប់ចូលធ្វើការងារវិញឡើយ ប៉ុន្តែបើកម្មករនិយោជិតឈប់លើសពីការកំណត់នេះ ត្រូវអនុវត្តតាមបទបញ្ជាផ្ទៃក្នុងរបស់រោងចក្រសហគ្រាស៕