សាលាដំបូងរាជធានីភ្នំពេញ កាលពីរសៀលថ្ងៃចន្ទម្សិលមិញនេះ បានសម្រេចឱ្យចាងហ្វាងកាសែត ខ្មែរថាមស៍ រួចផុតពីបទ «រុកកួនខាងផ្លូវភេទ» ក្នុងសំណុំរឿងទាក់ទងនឹងការចោទប្រកាន់ថា ព្យាយាមលួងលោមអតីតបុគ្គលិកស្រីម្នាក់ដើម្បីសុំរួមភេទ។
ការសម្រេចឱ្យរួចផុតពីបទចោទនេះ ត្រូវបានប្រកាសដោយចៅក្រម កូយ សៅ បន្ទាប់ពីលោកបានធ្វើការពិចារណាយ៉ាងល្អិតល្អន់លើសេចក្ដីសន្និដ្ឋានរបស់មេធាវីដើមបណ្ដឹង និងព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ។
គួរបញ្ជាក់ថា សាលាដំបូងរាជធានីភ្នំពេញ កាលពីសប្ដាហ៍មុន បានបើកសវនាការជំនុំជម្រះកំបាំងមុខលើសំណុំរឿង «រុកកួនខាងផ្លូវភេទ» របស់ចាងហ្វាងកាសែត ខ្មែរថាមស៍ ខណៈទាំងលោក T. Mohan ជាជនជាប់ចោទ និងមេធាវីការពារក្ដី ពុំបានបង្ហាញខ្លួនក្នុងសវនាការឡើយ។
ករណីខាងលើនេះទាក់ទងនឹងការចោទប្រកាន់ដែលត្រូវបានធ្វើឡើងក្នុងឆ្នាំ២០១៩កន្លងទៅ ដោយអតីតបុគ្គលិកស្រីម្នាក់ អ្នកនាង April Reposar ធ្លាប់បានលើកឡើងថា ខ្លួនបានសម្រេចដាក់ពាក្យសុំលាឈប់ពីការងារ ហើយត្រលប់ទៅប្រទេសកំណើតរបស់ខ្លួនវិញ ដើម្បីគេចពីការស្នើសុំផ្ដល់ប្រាក់ជាថ្នូរនឹងការចង់រួមភេទជាមួយនាង ហើយក្នុងនោះ ដើមបណ្ដឹងក៏បានទាមទារសំណងជាទឹកប្រាក់ចំនួន១០ម៉ឺនដុល្លារផងដែរ។
លោក ហំ ភា ជាមេធាវីរបស់ដើមបណ្ដឹង បានឱ្យដឹងថា ខ្លួននឹងពិភាក្សាជាមួយកូនក្ដី អ្នកនាង April Reposar ដើម្បីសម្រេចថានឹងត្រូវធ្វើអ្វីបន្ទាប់ទៀត។
លោកបន្ថែមថា៖ «ខ្ញុំគិតថា [សាលក្រម] មិនអាចទទួលយកបាននោះទេ ព្រោះយើងក៏បានដាក់ភស្តុតាងមួយចំនួនក្នុងសំណុំរឿងនេះផងដែរ។ ទោះជាយ៉ាងណា កូនក្តីមានសិទ្ធិក្នុងការប្តឹងឧទ្ធរណ៍»។
ទាក់ទិននឹងករណីនេះ អ្នកនាង April Reposar បានឱ្យដឹងតាមរយៈអ៊ីមែលមួយកាលពីថ្ងៃចន្ទថា អ្នកនាងមិនមានការភ្ញាក់ផ្អើលជាមួយនឹងសាលក្រមនេះឡើយ ដោយសារអ្នកនាងដឹងថា លោក T. Mohan មានទំនាក់ទំនងច្រើន ។
អ្នកនាងបន្ថែមថា លោក T. Mohan ពុំបានដាក់មេធាវីការពារក្តីឡើយ។
អ្នកនាងថា៖ «ច្បាស់ណាស់ ប្រព័ន្ធយុត្តិធម៌ប្រាកដជាគ្មានឯករាជ្យ»។
លោក T. Mohan មិនបានឆ្លើយតបនឹងសំណួរដែលផ្ញើតាមរយៈអ៊ីមែលឡើយ។
ទោះជាយ៉ាងណា លោកធ្លាប់បានបដិសេធកាលពីពេលកន្លងទៅ នូវការចោទប្រកាន់របស់អ្នកនាង April Reposar ដោយបានហៅការចោទប្រកាន់ពីសំណាក់អតីតបុគ្គលិករបស់លោកថាជារឿងប្រតិដ្ឋ និងចង់បង្ខូចកិត្តិយសលោកតែប៉ុណ្ណោះ៕
រាយការណ៍បន្ថែមដោយលោក Michael Dickinson
បកប្រែចេញពីអត្ថបទដើមជាភាសាអង់គ្លេស៖ Khmer Times Publisher Acquitted of Sexual Harassment Charge
