សហជីពមួយគ្រោងប្ដឹងទៅអ្នកបញ្ជាទិញ ករណីថៅកែរោងចក្រកាត់ដេរសម្លៀកបំពាក់ «អេសវ៉ាយអេចជេ ហ្គាម៉ិន» មិនទទួលយកកម្មករចូលធ្វើការងារវិញតាមសេចក្ដីបង្គាប់របស់ក្រសួងការងារ។
ថៅកែរោងចក្រកាត់ដេរសម្លៀកបំពាក់ «អេសវ៉ាយអេចជេ ហ្គាម៉ិន» ស្ថិតនៅឃុំបែកចាន ស្រុកអង្គស្នួល ខេត្តកណ្ដាល បានបញ្ឈប់ថ្នាក់ដឹកនាំសហជីពឯករាជ្យប្រចាំរោងចក្រនេះចំនួន៣នាក់ពីការងារ ក្នុងនោះមានអ្នកស្រី ប្រាក់ តុលា លោក នី តុលា និងអ្នកស្រី ហ៊ុល សុឃីម ក្រោយពួកគេបង្កើតសហជីពក្នុងរោងចក្រ។
កាលពីថ្ងៃទី៤ ខែឧសភា ឆ្នាំ២០២២ នាយកដ្ឋានវិវាទការងារ បានចេញសេចក្ដីបង្គាប់មួយឱ្យថៅកែរោងចក្រ «អេសវ៉ាយអេចជេ ហ្គាមិន» ទទួលយកថ្នាក់ដឹកនាំសហជីពឯករាជ្យប្រចាំរោងចក្រនេះចំនួន២នាក់ឱ្យចូលធ្វើការវិញ ក្នុងនោះមានអ្នកស្រី ប្រាក់ តុលា និងលោក នី តុលា ហើយបន្ទាប់មក នៅថ្ងៃទី១៧ ខែឧសភានេះ ក្រសួងបានចេញសេចក្តីបង្គាប់ឱ្យថៅកែទទួលយកអ្នកស្រី ហ៊ុល សុឃីម ចូលធ្វើការងារវិញផងដែរ ក្រោយពីរកឃើញថា ការបញ្ឈប់នោះធ្វើឡើងដោយខុសច្បាប់។
ប្រធានផ្នែកវេចខ្ចប់ និងជាប្រធានសហជីពឯករាជ្យប្រចាំរោងចក្រ អេសវ៉ាយអេចជេ ហ្គាមិន អ្នកស្រី ហ៊ុល សុឃីម ប្រាប់ វីអូឌី នៅថ្ងៃអង្គារនេះថា រហូតមកដល់ពេលនេះ ថៅកែរោងចក្រមិនទាន់ឱ្យពួកគាត់ទាំង៣នាក់ចូលធ្វើការងារវិញនៅឡើយទេ។
អ្នកស្រីថា៖ «ក្រុមហ៊ុនគេថា គេអត់ទទួលយកទេ គេថាប្ដឹងទៅដល់ណាប្ដឹងទៅ! សំខាន់គេអត់ទទួលយក! គេថាប្ដឹងទៅដល់ណាប្ដឹងទៅ គេអត់ខ្វល់»។
ប្រធានសហព័ន្ធសហជីពឯករាជ្យ លោក រី សិទ្ធីណែត បានលើកឡើងថា សហជីពរបស់លោកកំពុងស្រាវជ្រាវរកអ្នកបញ្ជាទិញទំនិញពីរោងចក្រនេះ ដើម្បីដាក់បណ្ដឹងសុំឱ្យជួយអន្តរាគមន៍ទៅភាគីរោងចក្រ ដើម្បីឱ្យកម្មករទាំង៣នាក់នោះបានចូលធ្វើការងារវិញ។
លោកបន្ថែមថា៖ «យើងនឹងរៀបចំឯកសារប្ដឹងទៅម្ចាស់ខោអាវដែលរោងចក្រ អេសវ៉ាយអេចជេ កំពុងដេរឱ្យ។ យើងស្រាវជ្រាវ ពេលដែលពួកគាត់ផ្ដល់ស្លាកហ្នឹងដល់ពួកខ្ញុំហើយ។ អ៊ីចឹងពួកខ្ញុំកំពុងស្រាវជ្រាវថា រោងចក្រហ្នឹងដេរយកទៅលក់នៅប្រទេសណា! Brand របស់ម៉ាកអី! អ៊ីចឹងការងារបន្តរបស់ពួកយើង គឺដាក់បណ្ដឹងទៅភ្ញៀវ»។
ជំនួយការអគ្គនាយកក្រុមហ៊ុន អេសវ៉ាយអេចជេ លោក ព្រំ កុសល ប្រាប់វីអូឌីតាមប្រព័ន្ធតេឡេក្រាមថា រោងចក្រមិនអាចទទួលយកកម្មករទាំងនោះចូលធ្វើការវិញបាន ដោយសារពួកគេធ្វើការងារមានបញ្ហាកំហុសធ្ងន់ និងមានកំហុសច្រើនដងពាក់ព័ន្ធបទបញ្ជាផ្ទៃក្នុងរបស់ក្រុមហ៊ុន ព្រមទាំងបានធ្វើឱ្យខូចខាតទ្រព្យសម្បត្តិរបស់ក្រុមហ៊ុនរាប់ពាន់ដុល្លារថែមទៀត។
លោកបន្ថែមថា៖ «ចង់សហជីពប្ដឹងអីប្ដឹងទៅ ជាសិទ្ធិរបស់គាត់។ ក្នុងពេលនេះ ខណៈនេះ គឺក្រុមហ៊ុនអត់មានជាប់ពាក់ព័ន្ធជាមួយសហជីពទេ។ សូមផ្ដាំទៅគាត់វិញថា មុននឹងគាត់ប្ដឹងហ្នឹង សុំឱ្យគាត់មើលពីច្បាប់មាត្រាទីប៉ុន្មាន កឋាខណ្ឌទីប៉ុន្មាន ដែលអាចប្ដឹងទៅភ្ញៀវ ដែលប្ដឹងទៅឱ្យច្បាប់ជួយបុគ្គលម្នាក់ហ្នឹង។ សួរថាគាត់ចេះច្បាប់ឬគាត់មិនចេះច្បាប់ អាហ្នឹងគាត់ដឹងខ្លួនឯងហើយ»។
ក្នុងសេចក្ដីបង្គាប់របស់នាយកដ្ឋានវិវាទការងារ នៃក្រសួងការងារ និងបណ្តុះបណ្តាលវិជ្ជាជីវៈ កាលពីថ្ងៃទី១៧ ខែឧសភា ឆ្នាំ២០២២ បានឱ្យដឹងថា ក្រោយពីពិនិត្យអង្គហេតុ និងអង្គច្បាប់លើសំណុំរឿងបញ្ឈប់កម្មករនេះ ខាងថៅកែរោងចក្រ អេសវ៉ាយអេចជេ អនុវត្តពុំត្រឹមត្រូវតាមស្មារតីច្បាប់ស្តីពីសហជីព ត្រង់មាត្រា៤៣ និងមាត្រា៦៧។
នាយកដ្ឋានវិវាទការងារ បានតម្រូវឱ្យថៅកែរោងចក្រទទួលយកកម្មករដែលបានបញ្ឈប់ឱ្យចូលធ្វើការងារធម្មតាវិញ ព្រមទាំងរម្លឹកពីប្រាក់ឈ្នួលផងដែរ ដោយគិតចាប់តាំងពីថ្ងៃដែលក្រុមហ៊ុនបញ្ឈប់ពួកគេពីការងាររហូតដល់ថ្ងៃទទួលចូលធ្វើការងារវិញ។
យ៉ាងណា នាយកដ្ឋានវិវាទការងារ បានបញ្ជាក់ថា ក្រោយទទួលបានសេចក្តីសម្រេចនេះ និយោជក និងកម្មករដែលត្រូវបានបញ្ឈប់ពីការងារ ឬសហជីពរបស់កម្មករនោះ មានរយៈពេល២ខែ ដើម្បីធ្វើការតវ៉ាទៅរដ្ឋមន្ត្រីក្រសួងការងារ ហើយរដ្ឋមន្ត្រីអាចលុបចោលឬកែសម្រួលសេចក្ដីសម្រេចនេះបាន។
កាលពីថ្ងៃទី១២ ខែឧសភា តំណាងសហជីព និងកម្មករមួយចំនួនបានជំរុញទៅក្រសួងការងារឱ្យមានចំណាត់ការចំពោះថៅកែរោងចក្រដែលមិនព្រមទទួលយកកម្មករឱ្យចូលធ្វើការងារវិញ ដោយចាត់ទុកករណីនេះថា ជាការរើសអើងសហជីព។
អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ មិនបានឆ្លើយតបជុំវិញករណីនេះទេ នៅថ្ងៃអង្គារនេះ។
កាលពីថ្ងៃទី៤ ខែមេសា ឆ្នាំ២០២២ សម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (CCAWDU) បានឱ្យដឹងថា មានរោងចក្រចំនួន២៣ទីតាំង ដែលមានកម្មករសរុប១ ៤០៨នាក់ បានរងគ្រោះដោយការបញ្ឈប់ពីការងារ បន្ទាប់ពួកគេប្រើប្រាស់សិទ្ធិក្នុងការបង្កើតសហជីពក្នុងសហគ្រាស និងគ្រឹះស្ថានដែលពួកគេកំពុងធ្វើការ ខណៈរោងចក្រខ្លះទៀតត្រូវបានបិទទ្វារ ដោយសារថៅកែមិនបានទូទាត់ប្រាក់ជូនកម្មករតាមច្បាប់ស្តីពីការងារ។
មួយទៀតនោះ សហជីពថា សំណុំរឿងមួយចំនួនដែលក្រុមប្រឹក្សាអាជ្ញាកណ្ដាលបានដោះស្រាយនិងសម្រេចឱ្យកម្មករឈ្នះហើយ គឺមិនត្រូវបានថៅកែឬនិយោជកអនុវត្តតាមសេចក្ដីបង្គាប់របស់ក្រុមប្រឹក្សាអាជ្ញាកណ្ដាលឡើយ ដែលករណីនេះ សហជីពចាត់ទុកថា ជាការរំលោភសិទ្ធិមនុស្សធ្ងន់ធ្ងរ និងជាការកេងប្រវ័ញ្ចកម្លាំងពលកម្មកម្មករ ដែលត្រូវបានហាមឃាត់ដោយច្បាប់ផងនោះ៕