ពលរដ្ឋមួយចំនួននៅឃុំព្រៃផ្គាំ ស្រុកអង្គរបូរី ខេត្តតាកែវ ចោទអាជ្ញាធរស្រុកថាបានគប់គិតគ្នាឱ្យឈ្មួញប្រើគ្រឿងចក្រលុបដីប្រឡាយចំនួន២ ធ្វើឱ្យប៉ះពាល់ទៅដល់ផលប្រយោជន៍របស់ពួកគេ។
លោក ញឹក ឈាវ ដែលអះអាងថាជាតំណាងពលរដ្ឋនៅឃុំព្រៃផ្គាំ ប្រាប់ វីអូឌី នៅថ្ងៃពុធនេះថា មេឃុំ និងអភិបាលស្រុកអង្គរបូរី បានគប់គិតគ្នាឱ្យឈ្មួញដីឈ្មោះ ម៉ុន ថា ចាក់ដីលុបប្រឡាយអូរអណ្ដែង និងប្រឡាយភ្លឺភ្លោះ ដើម្បីធ្វើជាកម្មសិទ្ធិផ្ទាល់ខ្លួន។
តំណាងពលរដ្ឋរូបនេះ ឱ្យដឹងថា បុគ្គលឈ្មោះ ម៉ុន ថា បានចាក់លុបប្រឡាយនោះប្រហែល៥០ម៉ែត្រ ធ្វើឱ្យប៉ះពាល់ដល់ការអាស្រ័យផល និងការធ្វើស្រែរបស់ពលរដ្ឋមួយចំនួននៅក្នុងឃុំ។ លោកថា ពេលដែលឈ្មួញបានចាក់ដីលុបប្រឡាយទាំងនោះ បានធ្វើឱ្យទឹកជន់លិចដីស្រែពលរដ្ឋប្រមាណ៥០គ្រួសារ និងដីស្រែប្រហែល១០ហិកតា។
លោកបន្ថែមថា៖ «ខាងអភិបាលស្រុក និងមេឃុំហ្នឹង គេត្រូវគ្នាជាមួយអាម្ចាស់ដីហ្នឹង ដោយសារគេបានលុយបានកាក់ពីម្ចាស់ដី។ អ៊ីចឹងប្រជាជនគេមិនព្រម! ពួកខ្ញុំទាមទារយកតែផ្លូវទឹកដដែលហ្នឹងវិញទេ វាបានប្រើប្រាស់ទាំងអស់គ្នា បានទាំងខ្ញុំ និងបានប្រជាជនទាំងអស់គ្នា»។
វីអូឌី មិនអាចសុំការឆ្លើយតបពីបុគ្គលឈ្មោះ ម៉ុន ថា ដែលពលរដ្ឋប្រាប់ថាជាឈ្មួញដី និងមេឃុំព្រៃផ្គាំ បានទេ ពាក់ព័ន្ធករណីនេះ។
ចំណែក ក្រុមប្រឹក្សាឃុំព្រៃផ្គាំ លោក ឈួង គឿន មានប្រសាសន៍ថា ពិតជាមានការចាក់ដីលុបប្រឡាយរបស់រដ្ឋពិតមែន ប៉ុន្តែអ្នកចាក់លុបនោះបានសុំច្បាប់ត្រឹមត្រូវពីមន្ត្រីជំនាញ និងបានដាក់លូឱ្យវិញទំហំ១ម៉ែត្រ។ លោកថា ការលុបប្រឡាយដោយការដាក់លូត្រឹម១ម៉ែត្រនេះ ត្រូវបានអ្នកភូមិផ្ទុះការតវ៉ា ក្រោយពីទឹកហូរមិនទាន់ ធ្វើឱ្យលិចស្រែរបស់ពួកគេ ហើយថាសំណុំរឿងនេះបានបញ្ជូនទៅអាជ្ញាធរស្រុកដោះស្រាយបន្តហើយ។
លោកបន្ថែមថា៖ «រឿងនេះ ប្រជាពលរដ្ឋបានដាក់ពាក្យបណ្ដឹងដល់ស្រុកហើយ ប៉ុន្តែខាងស្រុកគាត់អត់ទាន់ឃើញដោះស្រាយម៉េចសោះ។ អ្នកចាក់លុបហ្នឹង គាត់កាយរួច គាត់ដាក់លូ ហើយគេបានធ្វើច្បាប់ជាមួយមន្ត្រីជំនាញហ្នឹងដែរ ប៉ុន្តែដល់ពេលគាត់ដាក់លូតូចពេក បង្ហូរចេញមិនទាន់»។
អភិបាលស្រុកអង្គរបូរី លោក ឌឹម គឹមសាន បានច្រានចោលការចោទរបស់ពលរដ្ឋ ដែលថា អាជ្ញាធរស្រុកគប់គិតគ្នាឱ្យឈ្មួញលុបប្រឡាយនោះ។ លោកថា ករណីនេះ លោកបានដោះស្រាយចប់មួយខែហើយ ដោយឱ្យអ្នកចាក់ដីលុបប្រឡាយនោះបញ្ឈប់សកម្មភាព។
លោកបន្ថែមថា៖ «រឿងនេះអត់មានអីជាប់ពាក់ព័ន្ធជាមួយខ្ញុំផង។ រឿងហ្នឹង យើងបានទប់ស្កាត់និងដោះស្រាយរួចតាំងពី១ខែហើយតើ! បើគាត់[ឈ្មួញដី]ចង់ធ្វើទៀត ខ្ញុំឱ្យដាក់ស្នើសុំទៅខាងខេត្តបន្តទៀតតើ!»
កាលពីថ្ងៃទី៦ ខែមេសា ឆ្នាំ២០២២ ពលរដ្ឋជាង៦០គ្រួសារ នៅភូមិទ្រង់ភូមិ និងភូមិព្រៃផ្គាំ នៃឃុំព្រៃផ្គាំ ស្រុកអង្គរបូរី ខេត្តតាកែវ បាននាំគ្នាផ្តិតមេដៃដាក់សំណើសុំអន្តរាគមន៍ពីរដ្ឋបាលស្រុកឱ្យជួយដោះស្រាយ ករណីបុគ្គលឈ្មោះ ម៉ុន ថា បានដាក់គ្រឿងចក្រឈូសឆាយកាយលុបប្រឡាយអូរអណ្តែង និងប្រឡាយភ្លឺភ្លោះ ដោយមិនបានពិគ្រោះយោបល់និងមានការឯកភាពពីប្រជាពលរដ្ឋធ្វើស្រែនោះឡើយ។
កាលពីសប្ដាហ៍មុននេះ អ្នកភូមិជាច្រើននាក់បាននាំគ្នាតវ៉ានៅទីតាំងមានជម្លោះ ដោយប្រឆាំងមិនឱ្យគ្រឿងចក្ររបស់ឈ្មួញដីធ្វើសកម្មភាពឈូសឆាយ និងលុបប្រឡាយ ដើម្បីរង់ចាំការដោះស្រាយពីអាជ្ញាធរពាក់ព័ន្ធសិន៕