កម្មករ-កម្មការិនីប្រមាណ៨ ០០០នាក់ ធ្វើការនៅក្រុមហ៊ុន ខេនស្ព័តស៊ូ ស្ថិតនៅស្រុកសាមគ្គីមានជ័យ ខេត្តកំពង់ឆ្នាំង បានតវ៉ាបិទកំណាត់ផ្លូវជាតិលេខ៥ នៅព្រឹកថ្ងៃអង្គារនេះ ដើម្បីទាមទារឱ្យថៅកែដោះស្រាយបញ្ហាចំនួន៣៥ចំណុច។
កម្មការិនីធ្វើការនៅរោងចក្រ ខេនស្ព័តស៊ូ អ្នកស្រី នូ ស៊ីតូច បានអះអាងថា កម្មករ-កម្មការិនីប្រមាណ៨ ០០០នាក់ បានតវ៉ាបិទកំណាត់ផ្លូវជាតិលេខ៥ ប្រមាណ១ម៉ោង ដើម្បីទាមទារឱ្យថៅកែរោងចក្រគោរពលក្ខខណ្ឌការងារ ដោះស្រាយបញ្ហាចំនួន៣៥ចំណុច និងអនុវត្តតាមការបង្គាប់របស់ក្រុមប្រឹក្សាអាជ្ញាកណ្ដាលដែលបានដាក់ចេញនាពេលកន្លងមក។
អ្នកស្រីព្រមានថា បើសិនជាថៅកែរោងចក្រមិនដោះស្រាយបញ្ហាតាមអ្វីដែលកម្មករទាមទារនោះទេ នោះពួកគាត់នឹងបន្តការតវ៉ាជាថ្មីទៀតនៅថ្ងៃស្អែក។
អ្នកស្រីនិយាយថា៖ «តវ៉ារឿងបើកលុយប្រាក់ដំណាច់ឆ្នាំ និងទាមទារឱ្យមានការលក់ដូរនៅក្នុងវិញ ព្រោះអីពេលគាត់ចេញហូបអី គាត់មិនសូវមានចំណីអីហូបគ្រប់គ្រាន់ ច្រើនតែគាត់ចេញក្រៅអីអ៊ីចឹង វាឆ្ងាយ»។
យោងតាមសេចក្ដីជូនដំណឹងរបស់កម្មករ-កម្មការិនីនិយោជិតនៃក្រុមហ៊ុន ខេនស្ពតស៊ូ កាលថ្ងៃទី២១ ខែឧសភា ឆ្នាំ២០២២ បានឱ្យដឹងថា ពួកគាត់ទាមទារ និងចូលរួមយ៉ាងមុតមាំក្នុងការធ្វើកូដកម្មដើម្បីទាមទារលក្ខខណ្ឌការងារនៅក្នុងក្រុមហ៊ុននេះ ក្នុងគោលដៅបង្កើតទំនាក់ទំនងវិជ្ជាជីវៈ និងដើម្បីលើកកម្ពស់លក្ខខណ្ឌការងារឱ្យបានល្អប្រសើរនៅក្នុងក្រុមហ៊ុន។
សេចក្តីជូនដំណឹងដដែលបន្តថា ពួកគេមានការខកចិត្តខ្លាំង និងមិនអាចទទួលយកបានទេចំពោះការបដិសេធរបស់ក្រុមហ៊ុន ដែលបានជំទាស់សេចក្ដីបង្គាប់របស់ក្រុមប្រឹក្សាអាជ្ញាកណ្ដាល គ្រប់សំណុំរឿងទាំងអស់។ ពួកគេចាត់ទុកការមិនអនុវត្តរបស់ថៅកែក្រុមហ៊ុន បង្ហាញឱ្យឃើញថាគ្មានឆន្ទៈដោះស្រាយ និងមិនគោរពច្បាប់កម្ពុជា ដែលករណីនេះ ក៏ជាទង្វើមួយមិនគោរពសិទ្ធិមនុស្ស ផងដែរ។
សេចក្តីជូនដំណឹងរបស់ក្រុមកម្មករទាំងនោះក៏បានលើកឡើងនូវបញ្ហាផ្សេងទៀត ដែលពួកគេទាមទារឱ្យមានដំណោះស្រាយផងដែរ ក្នុងនោះ ទាមទារឱ្យក្រុមហ៊ុនបើកប្រាក់ជូនកម្មករ-កម្មការិនីណាដែលប្រើប្រាស់ដំណាច់ឆ្នាំនៅសល់ គិតត្រឹមចុងខែធ្នូ និងកុំបញ្ឈប់កម្មករដែលមិនអាចធ្វើការថែមម៉ោងបាន និងត្រូវបើកប្រាក់ឈ្នួលដល់កម្មករដែលខាងក្រុមហ៊ុនបានជំពាក់២ខែនោះផងដែរ។ ក្រៅពីនោះ ក្រុមកម្មករបានទាមទារឱ្យក្រុមហ៊ុនដកប្រធានផ្នែកនៅអគារ SIPCA4 ចេញពីក្រុមហ៊ុន ដោយសារតែប្រធានផ្នែករូបនេះបានបង្ខំឱ្យកម្មករធ្វើការថែមម៉ោង ទោះបីជាកម្មករឈឺឬរវល់យ៉ាងណាក៏ដោយ។
ក្នុងអំឡុងពេលកម្មករធ្វើកូដកម្មនេះ សហជីពប្រចាំរោងចក្រនេះចំនួន៣នាក់ ក៏ត្រូវបានសមត្ថកិច្ចឃាត់ខ្លួនយកទៅសួរនាំរយៈពេលជាច្រើនម៉ោង ពាក់ព័ន្ធនឹងការធ្វើកូដកម្មរបស់កម្មករនេះ។
ប្រធានសហជីពកម្ពុជាប្រចាំនៅរោងចក្រ ខេនស្ព័តស៊ូ លោក នឹម សុខឿន លើកឡើងថា ការឃាត់ខ្លួនរូបលោក និងសមាជិកសហជីព២នាក់ទៀតនោះ ដោយសមត្ថកិច្ចចោទថា ពួកគាត់ជាអ្នកដឹកនាំកម្មករធ្វើកូដកម្មខុសច្បាប់។ ប៉ុន្តែលោកអះអាងថា ការតវ៉ារបស់កម្មករនាថ្ងៃនេះ ដោយសារតែកម្មករទ្រាំលែងបានចំពោះការគាបសង្កត់ និងកេងប្រវ័ញកម្លាំងពលកម្មពីសំណាក់ថៅកែក្រុមហ៊ុនទៅវិញទេ។
លោកថា៖ «រោងចក្រនេះ ពីមុនអត់អីប៉ុន្មានទេ ប៉ុន្តែមួយរយៈក្រោយនេះ មានការកេងប្រវ័ញ្ចលើកម្មករខ្លាំងពេក ដោយបញ្ហាហ្នឹង ដែលធ្វើឱ្យកម្មករទ្រាំអត់បានខ្លួនឯង។ ពួកខ្ញុំអត់មានសិទ្ធិទេ ប៉ុន្មាននាក់នេះ! គ្រាន់តែភាពជាតំណាងពួកគាត់ឱ្យសិទ្ធិអីពួកគាត់ហ្នឹង»។
ចំណែក ស្នងការរងនៃស្នងការដ្ឋាននគរបាលខេត្តកំពង់ឆ្នាំង លោក អៀ ប៊ុនធឿន អះអាងថា សហជីពទាំង៣នាក់នោះ ត្រូវបានសមត្ថកិច្ចដោះលែងវិញហើយ បន្ទាប់ពីបានសួរនាំ និងឱ្យបំពេញបែបបទមួយចំនួនរួចនោះ។ លោកព្រមានថា បើសិនជាកម្មករធ្វើកូដកម្មដោយមិនបានសុំច្បាប់អនុញ្ញាត និងបិទផ្លូវទៀតនោះ សមត្ថកិច្ចនឹងចាត់វិធានការច្បាប់ ដោយសារការបិទផ្លូវនេះធ្វើឱ្យប៉ះពាល់ដល់សណ្ដាប់ធ្នាប់សាធារណៈ។
លោកថា៖ «លែងគាត់ថ្ងៃត្រង់! យើងធ្វើបែបបទ បើប្រជាពលរដ្ឋទាមទារប្រយោជន៍ លោកមានលិខិតស្នាមអីទៅ កុំឱ្យមានអ្នកញុះញង់នាំឱ្យធ្វើបាតុកម្ម មិនឱ្យចូលធ្វើការអីអ៊ីចឹង។ វាខាតផលប្រយោជន៍ច្រើន ទី១ សណ្ដាប់ធ្នាប់សាធារណៈ គាត់ធ្វើបាតុកម្ម គាត់បិទតែផ្លូវ ហើយដឹងហើយ ផ្លូវជាតិលេខ៥ ជាផ្លូវលំហូរចរាចរណ៍មមាញឹកណាស់ បិទតែ១៥នាទី ស្ទះរាប់រយគីឡូ។ និយាយទៅ ពួកគាត់តែធ្វើបាតុកម្មបិទផ្លូវហ្នឹង»។
វីអូឌី មិនអាចសុំការបញ្ជាក់ពីប្រធានមន្ទីរការងារ និងបណ្តុះបណ្តាលវិជ្ជាជីវៈខេត្តកំពង់ឆ្នាំង លោក ពៅ ស៊ីថា បានទេ។
ប្រធានសហព័ន្ធសហជីពកម្ពុជា អ្នកស្រី យ៉ាង សុភ័ណ្ឌ លើកឡើងថា មូលហេតុដែលកម្មករតវ៉ា ដើម្បីជំរុញឱ្យថៅកែក្រុមហ៊ុនអនុវត្តតាមសេចក្ដីបង្គាប់របស់ក្រុមប្រឹក្សាអាជ្ញាកណ្តាល ដែលបានចេញតាំងពីអំឡុងឆ្នាំ២០០១ និងដោះស្រាយបញ្ហាផ្សេងទៀតដែរ។
ទោះយ៉ាងណា អ្នកស្រីបានជំរុញដល់ថៅកែរោងចក្រពន្លឿនការដោះស្រាយដើម្បីបញ្ចប់វិវាទការងារនេះ៕