កម្មករ-កម្មការិនីជាច្រើននាក់បម្រើការងារនៅរោងចក្រកាត់ដេរសម្លៀកបំពាក់ ឃែនធើរេន អីភែរឹល ខេមបូឌា (CANTERAN APPAREL Cambodia co.,ltd) នៅថ្ងៃសុក្រនេះ បាននាំគ្នាដាក់ញត្តិនៅស្ថានទូតសហរដ្ឋអាមេរិកប្រចាំនៅកម្ពុជា ដើម្បីស្នើឱ្យមន្ត្រីទូតជួយអន្តរាគមន៍ទៅកាន់ក្រុមហ៊ុនបញ្ជាទិញ Walmart និងក្រុមហ៊ុន Primark ទទួលខុសត្រូវក្នុងការទូទាត់ប្រាក់ឈ្នួលនិងអត្ថប្រយោជន៍ផ្សេងៗជូនកម្មករ។
កម្មករ-កម្មការិនីប្រមាណ២០០នាក់ ធ្វើការនៅរោងចក្រ ឃែនធើរេន ស្ថិតនៅសង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ បាននាំគ្នាតវ៉ា និងដាក់វេនគ្នាដេកយាមមុខរោងចក្រ ជិត២ខែមកហើយ ដើម្បីការពារមិនឱ្យមានការដឹកសម្ភារផ្សេងៗចេញពីរោងចក្រ និងទាមទារឱ្យថៅកែចេញមុខដោះស្រាយសំណងជូនកម្មករតាមផ្លូវច្បាប់ ក្រោយរោងចក្រនេះបិទទ្វាររត់ចោលកម្មករដោយពុំមានការជូនដំណឹងជាមុន។
ប្រធានសហជីពចលនាកម្មករប្រចាំរោងចក្រ ឃែនធើរេន អ្នកស្រី សាន់ សុផា ឱ្យដឹងថា ក្រុមកម្មករទៅរកកិច្ចអន្តរាគមន៍ពីស្ថានទូតអាមេរិកជួយដោះស្រាយ ដោយសារក្រុមហ៊ុន Walmart និង Primark ដែលជាក្រុមជាក្រុមហ៊ុនរបស់អាមេរិក និងម្យាងអស់ជំនឿលើការដោះស្រាយរបស់អាជ្ញាធរពាក់ព័ន្ធ។
អ្នកស្រីបន្តថា ក្រោយរោងចក្របិទទ្វារ ក្រុមកម្មករបាននាំគ្នាតវ៉ា និងប្តឹងទៅក្រសួងការងារ និងអាជ្ញាធរខណ្ឌឱ្យជួយដោះស្រាយដែរ ប៉ុន្តែរហូតមកដល់ពេលនេះ ពុំទាន់មានដំណោះស្រាយណាមួយសម្រាប់កម្មករនៅឡើយ។
ក្នុងញត្តិដាក់ទៅក្រសួងការងារ កាលពីថ្ងៃទី២៣ ខែឧសភានេះ ក្រុមកម្មករអះអាងថា រោងចក្រ ឃែនធើរេន អីភែរឹល ខេមបូឌា (CANTERAN APPAREL Cambodia co.,ltd) និងរោងចក្រ ខ្វលីធី តេក្សស្ទីល (QUALITY TEXTILES) មានថៅកែតែមួយ ជាជនជាតិម៉ាឡេស៊ីឈ្មោះ CHHOONG WEIPIAU ខណៈរោងចក្រ ខ្វលីធី បច្ចុប្បន្នបើកដំណើរការអាជីវកម្មធម្មតា។
មន្ត្រីសម្ព័ន្ធសហជីពចលនាកម្មករ លោក ស៊ុត ចិត្រ អះអាងថា ករណីថៅកែបិទអាជីវកម្មដោយមិនបានជូនដំណឹងត្រឹមត្រូវដល់កម្មករនេះ គឺជារឿងខុសច្បាប់ ដែលថៅកែត្រូវដោះស្រាយសំណងជូនកម្មករចំនួន៥ចំណុច រួមមាន ប្រាក់ឈ្នួលចុងក្រោយ ប្រាក់ជូនដំណឹង ប្រាក់ជំងឺចិត្ត ប្រាក់អតីតភាពការងារ និងប្រាក់ដំណាច់ឆ្នាំដែលនៅសល់។
បើតាមកម្មករ ដើមឡើយ រោងចក្រនេះមានកម្មករសរុបចំនួនជាង១ ០០០នាក់ ប៉ុន្តែបច្ចុប្បន្ននៅសល់ជាង៣០០នាក់ប៉ុណ្ណោះ ដោយភាគច្រើនពួកគាត់មានវ័យចំណាស់ និងមានអតីតភាពការងារច្រើនឆ្នាំ៕
