ថ្នាក់ដឹកនាំសហជីពអះអាងថា ស្ថានទូតអាមេរិកប្រចាំកម្ពុជាបានសន្យាយកសំណើរបស់រោងចក្រ ឃែនធើរេន អីភែរឹល ខេមបូឌា (CANTERAN APPAREL Cambodia co.,ltd) ទៅជជែកជាមួយក្រុមហ៊ុនបញ្ជាទិញចំនួន២ ដើម្បីស្វែងរកដំណោះស្រាយវិវាទការងារជូនកម្មករ។
កម្មករ-កម្មការិនីជិត១០០នាក់ បម្រើការងារនៅរោងចក្រកាត់ដេរសម្លៀកបំពាក់ ឃែនធើរេន ស្ថិតនៅសង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ នៅថ្ងៃទី៣ ខែមិថុនា ឆ្នាំ២០២២នេះ បាននាំគ្នាដាក់ញត្តិនៅស្ថានទូតសហរដ្ឋអាមេរិកប្រចាំនៅកម្ពុជា ដើម្បីស្នើឱ្យមន្ត្រីទូតជួយអន្តរាគមន៍ទៅកាន់ក្រុមហ៊ុនបញ្ជាទិញ Walmart និងក្រុមហ៊ុន Primark ទទួលខុសត្រូវក្នុងការទូទាត់ប្រាក់ឈ្នួលនិងអត្ថប្រយោជន៍ផ្សេងៗជូនកម្មករតាមផ្លូវច្បាប់ ក្រោយថៅកែរោងចក្របិទទ្វាររត់ចោលកម្មករដោយពុំមានការជូនដំណឹងជាមុន។
ប្រធានសហភាពចលនាកម្មករកម្ពុជា លោក ប៉ាវ ស៊ីណា ដែលឃ្លាំមើលនិងបានយកញត្តិទៅដាក់ដល់ក្នុងស្ថានទូតអាមេរិក ប្រាប់វីអូឌីថា មន្ត្រីស្ថានទូតអាមេរិកប្រចាំកម្ពុជា ទទួលបន្ទុកផ្នែកការងារ និងសិទ្ធិកម្មករ បានទទួលយកញត្តិ និងបានសន្យាយកសំណើរបស់កម្មករទៅជជែកជាមួយក្រុមហ៊ុនបញ្ជាទិញ Walmart និងក្រុមហ៊ុន Primark ដើម្បីស្វែងរកដំណោះស្រាយជូនកម្មករ។
លោកបន្តថា ក្រុមហ៊ុនបញ្ជាទិញ Walmart និងក្រុមហ៊ុន Primark ជាក្រុមហ៊ុនរបស់អាមេរិកដែលរោងចក្រ ឃែនធើរេន បានផលិតទំនិញឱ្យជាង២០ឆ្នាំហើយ។ លោកថា សហរដ្ឋអាមេរិកជាប្រទេសដែលប្រកាន់គោលការណ៍លទ្ធិប្រជាធិបតេយ្យ និងគោរពសិទ្ធិមនុស្ស ត្រូវជំរុញទៅក្រុមហ៊ុនបញ្ជាទិញទាំង២នេះ ចូលរួមចំណែកចំពោះការបាត់បង់ផលប្រយោជន៍របស់កម្មករដោយសារថៅកែរោងចក្រ ឃែនធើរេន។
លោកបន្ថែមថា៖ «អាមេរិកជាប្រទេសមានអំណាចលើពិភពលោក ហើយជាប្រទេសប្រកាន់គោលការណ៍ប្រជាធិបតេយ្យ គោរពសិទ្ធិមនុស្ស ហើយគេគាំទ្រចំពោះបងប្អូនកម្មករប្រើប្រាស់សិទ្ធិរបស់ខ្លួនក្នុងការតវ៉ាដោយសន្តិវិធី ក៏ដូចជាការជំរុញឱ្យក្រុមហ៊ុនវិនិយោគគោរពច្បាប់និងបញ្ឈប់ការកេងប្រវ័ញ្ចកម្លាំងញើសឈាម និងយកបញ្ហានេះទៅជជែក ដើម្បីរកដំណោះស្រាយជូនបងប្អូនកម្មករ ធ្វើម៉េចឱ្យក្រុមហ៊ុនបញ្ជាទិញទាំង២ហ្នឹងមានការទទួលខុសត្រូវទៅនឹងក្រមសីលធម៌របស់ខ្លួន និងកាតព្វកិច្ចទទួលខុសត្រូវផ្នែកសង្គម»។
លោក ប៉ាវ ស៊ីណា បន្ថែមថា សហជីពរបស់លោកនឹងរកកិច្ចអន្តរាគមន៍ជាមួយដៃគូអន្តរជាតិជាច្រើនទៀតនៅលើពិភពលោក ដើម្បីដាក់សម្ពាធទៅលើក្រុមហ៊ុនបញ្ជាទិញទាំងអស់នោះឱ្យមកទទួលខុសត្រូវចំពោះទង្វើរបស់ក្រុមហ៊ុនផ្គត់ផ្គង់របស់ខ្លួន ឬរោងចក្រ ឃែនធើរេន ដែលកេងប្រវ័ញ្ចនិងរំលោភសិទ្ធិរបស់កម្មករ។
បើតាមលោក ប៉ាវ ស៊ីណា ករណីថៅកែបិទទ្វាររោងចក្ររត់ចោលកម្មករនេះ មិនមែនជាលើកទីមួយនោះទេ ហើយកម្មករមិនដែលទទួលបានការដោះស្រាយដោយត្រឹមត្រូវនិងយុត្តិធម៌ឡើយ។
មេសហជីពរូបនេះបន្តថា ប្រសិនបើរដ្ឋាភិបាលមិនបង្កើតគោលនយោបាយឬយន្តការណាមួយ ដើម្បីទប់ស្កាត់និងដោះស្រាយបញ្ហានេះជូនកម្មករទេ នោះនឹងលើកទឹកចិត្តកាន់ខ្លាំងដល់ថៅកែផ្សេងៗទៀតបន្តគេចវេះពីការទទួលខុសត្រូវក្នុងការទូទាត់ប្រាក់ឈ្នួលនិងផលប្រយោជន៍ផ្សេងៗដល់កម្មករ ហើយកម្មករខ្មែរនឹងបន្តរងការកេងប្រវ័ញ្ចកម្លាំងពលកម្ម និងជួបទុក្ខលំបាក រងភាពអយុត្តិធម៌ និងភាពឈឺចាប់។
អ្នកស្រី ជួន ផាន់ បម្រើការងារនៅរោងចក្រ ឃែនធើរេន រយៈពេល១៤ឆ្នាំ ឱ្យដឹងថា ក្រោយរោងចក្របិទទ្វារ ក្រុមកម្មករបាននាំគ្នាតវ៉ា និងប្តឹងទៅក្រសួងការងារ និងអាជ្ញាធរខណ្ឌពោធិ៍សែនជ័យ ឱ្យជួយដោះស្រាយដែរ ប៉ុន្តែរហូតមកដល់ពេលនេះ ពុំទាន់មានដំណោះស្រាយណាមួយសម្រាប់កម្មករនៅឡើយ។
ស្ត្រីអាយុ៥៦ឆ្នាំរូបនេះបន្តថា ក្រុមកម្មករបានដាក់វេនគ្នាដេកយាមមុខរោងចក្រ កុំឱ្យមានការដឹកទំនិញចេញ និងនាំគ្នាដើរតវ៉ាជិត២ខែហើយ ដោយកម្មករខ្លះជួបការលំបាក ខ្វះលុយសម្រាប់បង់ទឹកភ្លើង ចំណាយប្រចាំថ្ងៃ និងគ្មានលុយបង់សងធនាគារ ជាដើម។
អ្នកស្រីបន្ថែមថា៖ «ខ្ញុំអត់មានលុយកាក់ចិញ្ចឹមកូនទេ អ៊ីចឹងខ្ញុំសុំឱ្យសម្តេច ហ៊ុន សែន ជួយអន្តរាគមន៍ដោះស្រាយឱ្យពួកខ្ញុំផង ព្រោះពួកខ្ញុំកំសត់ណាស់ ហើយពួកខ្ញុំជាអ្នកក្រីក្រទៀត គ្មានស្រែគ្មានភ្លឺសម្រាប់ធ្វើទេ ទីពឹងលើប្រាក់ខែ ឥលូវប្រាក់ខែហ្នឹងត្រូវបានថៅកែរត់ចោលហើយ អ៊ីចឹងសុំឱ្យសម្តេចជួយផង»។
វីអូឌី មិនអាចសុំការបញ្ជាក់បន្ថែមពីតំំណាងស្ថានទូតអាមេរិកប្រចាំនៅកម្ពុជាបានទេ នៅថ្ងៃសុក្រនេះ។
អគ្គលេខាធិការរងគណៈកម្មការដោះស្រាយកូដកម្មបាតុកម្មគ្រប់មុខសញ្ញា នៃក្រសួងការងារ និងបណ្តុះបណ្តាលវិជ្ជាជីវៈ លោក វង្ស សុវណ្ណ ប្រាប់វីអូឌីកាលពីថ្ងៃទី៣១ ខែឧសភា ថាលោកមិនអាចបញ្ជាក់បានទេ ថាតើថៅកែរោងចក្រ ឃែនធើរេន បិទទ្វាររត់ចោលកម្មករឬយ៉ាងណានោះទេ។
លោកបន្តថា ការដែលកម្មករសម្រេចទៅរកកិច្ចអន្តរាគមន៍ពីស្ថាប័នណាបន្តទៀតនោះជាសិទ្ធិរបស់ពួកគេ ប៉ុន្តែសម្រាប់ក្រសួងការងារនៅតែបន្តស្វែងរកថៅកែឱ្យមកទទួលខុសត្រូវករណីនេះ។
ក្នុងញត្តិដាក់ទៅក្រសួងការងារ កាលពីថ្ងៃទី២៣ ខែឧសភានេះ ក្រុមកម្មករអះអាងថា រោងចក្រ ឃែនធើរេន អីភែរឹល ខេមបូឌា (CANTERAN APPAREL Cambodia co.,ltd) និងរោងចក្រ ខ្វលីធី តេក្សស្ទីល (QUALITY TEXTILES) មានថៅកែតែមួយ ជាជនជាតិម៉ាឡេស៊ីឈ្មោះ CHHOONG WEIPIAU ខណៈរោងចក្រ ខ្វលីធី បច្ចុប្បន្នបើកដំណើរការអាជីវកម្មធម្មតា។
មន្ត្រីសម្ព័ន្ធសហជីពចលនាកម្មករ លោក ស៊ុត ចិត្រ អះអាងថា ករណីថៅកែបិទអាជីវកម្មដោយមិនបានជូនដំណឹងត្រឹមត្រូវដល់កម្មករនេះ គឺជារឿងខុសច្បាប់ ដែលថៅកែត្រូវដោះស្រាយសំណងជូនកម្មករចំនួន៥ចំណុច រួមមាន ប្រាក់ឈ្នួលចុងក្រោយ ប្រាក់ជូនដំណឹង ប្រាក់ជំងឺចិត្ត ប្រាក់អតីតភាពការងារ និងប្រាក់ដំណាច់ឆ្នាំដែលនៅសល់។
បើតាមកម្មករ ដើមឡើយ រោងចក្រនេះមានកម្មករសរុបចំនួនជាង១ ០០០នាក់ ប៉ុន្តែបច្ចុប្បន្ននៅសល់ជាង៣០០នាក់ប៉ុណ្ណោះ ដោយភាគច្រើនពួកគាត់មានវ័យចំណាស់ និងមានអតីតភាពការងារចន្លោះពី១០ឆ្នាំទៅ២០ឆ្នាំ៕