គណៈកម្មាធិការជាតិរៀបចំការបោះឆ្នោត (គ.ជ.ប) អះអាងថា ការិយាល័យបោះឆ្នោតជាង២ម៉ឺនទីតាំងនៅទូទាំងប្រទេសបានបើកដំណើរការសម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥ ឆ្នាំ២០២២នេះ។
សេចក្តីប្រកាសព័ត៌មានរបស់ គ.ជ.ប នៅថ្ងៃទី០៥ ខែមិថុនា ឆ្នាំ២០២២ លើកឡើងថា ការិយាល័យបោះឆ្នោតទាំង២៣ ៦០២ នៅ២៥រាជធានី-ខេត្ត បានបើកដំណើរការស្របតាមការកំណត់ សម្រាប់ឱ្យប្រជាពលរដ្ឋខ្មែរដែលមានឈ្មោះក្នុងបញ្ជីបោះឆ្នោតផ្លូវការ ធ្វើការបោះឆ្នោតគាំទ្រគណបក្សនយោបាយដែលខ្លួនពេញចិត្ត ដើម្បីជ្រើសរើសក្រុមប្រឹក្សាឃុំសង្កាត់ សម្រាប់អាណត្តិទី៥នេះ។
គ.ជ.ប បន្ថែមថា ការបោះឆ្នោតជ្រើសរើសក្រុមប្រឹក្សាឃុំសង្កាត់ ជាការបោះឆ្នោតសកល ដែលមានការចូលរួមបោះឆ្នោតពីសំណាក់ប្រជាពលរដ្ឋខ្មែរទូទៅដែលមានអាយុចាប់ពី១៨ឆ្នាំឡើង និងមានឈ្មោះក្នុងបញ្ជីបោះឆ្នោតផ្លូវការនៃឃុំសង្កាត់ដែលសាម៉ីខ្លួនត្រូវបោះឆ្នោត ក្នុងនោះ អ្នកបោះឆ្នោតត្រូវយកមកជាមួយនូវអត្តសញ្ញាណបណ្ណសញ្ជាតិខ្មែរដែលមានសុពលភាព ឬឯកសារបញ្ជាក់អត្តសញ្ញាណបម្រើឱ្យការបោះឆ្នោត ប្រសិនបើអ្នកបោះឆ្នោតពុំមានអត្តសញ្ញាណបណ្ណ។
ក្រៅពីនោះ គ.ជ.ប ថាអ្នកបោះឆ្នោត គឺតម្រូវឱ្យឈរបន្តគ្នាជាជួរនៅខាងមុខការិយាល័យដើម្បីចូលទៅបោះឆ្នោតតាមលំដាប់។ ដោយឡែក ព្រះសង្ឃ មនុស្សចាស់ជរា ស្រ្តីមានផ្ទៃពោះ ស្រ្តីមានកូនតូច ជនមានពិការភាព និងអ្នកមានជំងឺ ត្រូវបានផ្ដល់អាទិភាព។
គ.ជ.ប ថា៖ «ការបោះឆ្នោតនឹងត្រូវបិទបញ្ចប់ត្រឹមម៉ោង៣និង០០នាទីរសៀលថ្ងៃនេះ ប៉ុន្តែប្រសិនបើនៅតែមានអ្នកបោះឆ្នោតស្ថិតក្នុងការិយាល័យបោះឆ្នោត ឬឈរតម្រង់ជួរ ឬស្ថិតក្នុងបរិវេណខាងក្នុងការិយាល័យបោះឆ្នោតទៀត អ្នកបោះឆ្នោតទាំងនោះត្រូវតែបានអនុញ្ញាតឱ្យបោះឆ្នោត»។
យ៉ាងណា គ.ជ.ប ថាប្រធានការិយាល័យបោះឆ្នោតអាចប្រកាសបិទបញ្ចប់ការបោះឆ្នោតនៅការិយាល័យរបស់ខ្លួននៅមុនម៉ោង៣និង០០នាទីរសៀលបាន ប្រសិនបើអ្នកបោះឆ្នោតដែលមានឈ្មោះក្នុងបញ្ជីបោះឆ្នោតនៃការិយាល័យបោះឆ្នោតនោះបានបោះឆ្នោតគ្រប់គ្នាអស់ហើយ។
តាមបញ្ជីបោះឆ្នោតផ្លូវការ ឆ្នាំ២០២១ សម្រាប់បម្រើឱ្យការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥ ឆ្នាំ២០២២ ប្រជាពលរដ្ឋមានឈ្មោះបោះឆ្នោត គឺមានចំនួនសរុប៩ ២០៥ ៦៨១នាក់ ខណៈការិយាល័យបោះឆ្នោតសរុបទូទាំងប្រទេសមានចំនួន២៣ ៦០២ការិយាល័យ៕
