គណបក្សប្រជាជនកម្ពុជា គ្រោងធ្វើសន្និបាតវិសាមញ្ញរបស់គណៈកម្មាធិការកណ្ដាលគណបក្ស ដើម្បីលើកទិសដៅសម្រាប់យកឈ្នះការបោះឆ្នោតជ្រើសតាំងតំណាងរាស្ត្រនៅឆ្នាំ២០២៣ ក្រោយពីឆ្លងកាត់បទពិសោធន៍នៃការបោះឆ្នោតជ្រើសរើសសមាជិកក្រុមប្រឹក្សាឃុំ-សង្កាត់ អាណត្តិទី៥រួច។
ក្នុងសេចក្ដីជូនដំណឹងចុះថ្ងៃទី៨ ខែមិថុនា ឆ្នាំ២០២២ របស់គណបក្សប្រជាជនកម្ពុជា បានឱ្យដឹងថា គណបក្សសម្រេចលើកពេលសន្និបាតវិសាមញ្ញរបស់គណៈកម្មាធិការកណ្ដាលរបស់គណបក្សប្រជាជនកម្ពុជា ដែលគ្រោងនឹងធ្វើឡើងនៅថ្ងៃទី៩-១០ ខែកក្កដា ទៅធ្វើនៅថ្ងៃទី១៦-១៧ ខែកក្កដា ឆ្នាំ២០២២វិញ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ប្រាប់វីអូឌីនៅថ្ងៃពុធនេះថា ការធ្វើសន្និបាតវិសាមញ្ញនៅខែកក្កដាខាងមុន អាចលើកយកប្រធានបទពាក់ព័ន្ធការបោះឆ្នោតនាពេលថ្មីៗនេះ ក្រោយពីឆ្លងកាត់បទពិសោធន៍នៃការបោះឆ្នោតជ្រើសរើសសមាជិកក្រុមប្រឹក្សាឃុំ-សង្កាត់ ដែលនាំឱ្យគណបក្សប្រជាជនកម្ពុជាទទួលអាសនៈច្រើនលើសលប់។
លោកថា៖ «យើងលើកចំណុចខ្លាំងចំណុចខ្សោយដែលយើងទទួលបានជោគជ័យដ៏ត្រចះត្រចង់ហ្នឹងហើយ យើងដាក់ទិសដៅ ដើម្បីទៅដណ្ដើមយកជ័យជម្នះក្នុងការបោះឆ្នោតថ្នាក់ជាតិទៀត គឺជ្រើសរើសតាំងតំណាងរាស្រ្ត និងព្រឹទ្ធសភា ខាងមុខ។ ការឈ្នះ ដោយសារសំឡេងគាំទ្រវាច្រើន អ៊ីចឹងតាមតួលេខ។ អ៊ីចឹងរដ្ឋសភា យើងក៏ទទួលបានចំនួនច្រើនលើសលប់ ហើយព្រឹទ្ធសភាក៏យើងទទួលបានសំឡេងលើសលប់ដែរ»។
វីអូឌី នៅមិនទាន់អាចសុំការឆ្លើយតបពីអ្នកនាំពាក្យគណបក្សភ្លើងទៀន លោក ថាច់ សេដ្ឋា និងអនុប្រធានបក្សនេះ គឺលោក សុន ឆ័យ បានទេ នៅថ្ងៃពុធនេះ។
សាស្រ្តាចារ្យវិទ្យាសាស្ត្រនយោបាយ លោក ឯម សុវណ្ណរ៉ា មើលឃើញថា គណបក្សប្រជាជនកម្ពុជាបានរៀបចំនិងមានទិសដៅច្បាស់លាស់ជាងគណបក្សផ្សេងៗទៀត។ លោកបន្តថា បើសិនជាគណបក្សកាន់អំណាចមានយុទ្ធសាស្ត្រល្អ និងរៀបចំឱ្យមានអ្នកគាំទ្រច្រើននោះ គណបក្សផ្សេងៗទៀតគួរតែសិក្សាអំពីចំណុចខ្វះខាតរបស់ខ្លួនកន្លងមកឡើងវិញ ដែលនាំឱ្យខ្លួនមិនអាចប្រកួតប្រជែងជាមួយបក្សកាន់អំណាច។
លោកថា៖ «ខ្ញុំគ្រាន់តែចាប់អារម្មណ៍ថា គណបក្សកាន់អំណាចគេមានយន្តការ គេមានអ្នកបន្តវេនឬយុទ្ធសាស្រ្ត សម្រាប់រយៈពេលវែង ហើយគេធ្វើក្នុងក្របខណ្ឌមួយចង្អៀត មិនផ្សព្វផ្សាយទូលំទូលាយ បើយើងនិយាយមែនទែន របៀបរបបគណបក្សនៅរក្សានូវរចនាសម្ព័ន្ធឬទម្រង់តាមបែបកុម្មុយនីស្តច្រើន។ យើងមើលមិនសូវបើកចំហ និងការចូលរួមទូលំទូលាយនូវកិច្ចការមួយចំនួនទេ»។
លោក ឯម សុវណ្ណរ៉ា បន្តថា បើសិនជាមិនមានឥទ្ធិពលពីសហគមន៍អន្តរជាតិទេ ការរៀបចំយុទ្ធសាស្ត្ររបស់គណបក្សប្រជាជនកម្ពុជានឹងប្រព្រឹត្តទៅរលូន ហើយគោលបំណងនៃការយកអ្នកគាំទ្រ ដើម្បីឈ្នះការបោះឆ្នោតឆ្នាំ២០២៣ ក៏មិនប្រែប្រួលដែរ លើកលែងតែបើកឱ្យមានលំហសេរីភាព និងការជួយអន្តរាគមន៍ពីអន្តរជាតិ ទើបការប្រកួតប្រជែងដោយស្មើភាពនិងយុត្តិធម៌នៅកម្ពុជាកើតមានឡើងច្រើន។
លោកថា៖ «យុទ្ធសាស្ត្រសំខាន់ បើយើងមើលនិងដឹងទាំងអស់គ្នា សមាជប៉ុន្មានសារនេះ គឺអ្នកបន្តវេន គឺអ្នកជំនាន់ថ្មី ឈាមថ្មីអ៊ីចឹង វាត្រូវការការលូតលាស់ និងការគាំទ្រពីប្រជាពលរដ្ឋ»។
ឃុំ-សង្កាត់នៅទូទាំងប្រទេសមានចំនួន១ ៦៥២ ក្នុងនោះ បើតាមលទ្ធផលបោះឆ្នោតបឋមដែលប្រកាសដោយគណៈកម្មាធិការជាតិរៀបចំការបោះឆ្នោត (គ.ជ.ប) គណបក្សភ្លើងទៀនទួលបានតំណែងមេឃុំចំនួន៤នៅទូទាំងប្រទេស និងអាសនៈឃុំ-សង្កាត់ចំនួនជាង២ ០០០នាក់ ក្រៅពីនេះបក្សកាន់អំណាចទទួលបានតំណែងមេឃុំចៅសង្កាត់ទាំងអស់ ហើយអាសនៈឃុំ-សង្កាត់ក៏បក្សនេះយកបានស្ទើរតែទាំងអស់ដែរ៕