កម្មករ-កម្មការិនីនៅរោងចក្រ ឃែនធើរេន អីភែរឹល ខេមបូឌា (CANTERAN APPAREL Cambodia co.,ltd) បាននាំគ្នាប្ដូរទៅបោះតង់លើចិញ្ចើមផ្លូវនៅខាងមុខរោងចក្រ ដោយអះអាងថា ម្ចាស់ទីតាំងដែលជួលដីនិងអគារឱ្យរោងចក្រ ឃែនធើរេន បានដេញពួកគេមិនឱ្យស្នាក់នៅនិងដេកយាមក្នុងបរិវេណរោងចក្រនេះទៀត។
កម្មករ-កម្មការិនីធ្វើការនៅរោងចក្រ ឃែនធើរេន ស្ថិតនៅសង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ បាននាំគ្នាតវ៉ានិងដាក់វេនគ្នាដេកយាមមុខរោងចក្រជិត២ខែមកហើយ ដើម្បីការពារមិនឱ្យមានការដឹកសម្ភារផ្សេងៗចេញពីរោងចក្រ និងទាមទារឱ្យថៅកែចេញមុខដោះស្រាយសំណងជូនពួកគេតាមផ្លូវច្បាប់ ក្រោយពីថៅកែរោងចក្រនេះបិទទ្វាររត់ចោលកម្មករ។
ប្រធានសហជីពចលនាកម្មករប្រចាំរោងចក្រ ឃែនធើរេន អ្នកស្រី សាន់ សុផា ប្រាប់វីអូឌីនៅថ្ងៃពុធនេះថា កាលពីថ្ងៃចន្ទដើមសប្តាហ៍នេះ ម្ចាស់ទីតាំងដែលរោងចក្រ ឃែនធើរេន បានជួល បានដេញក្រុមកម្មករមិនឱ្យស្នាក់នៅនិងដេកយាមក្នុងបរិវេណរោងចក្រទៀតឡើយ។ ប្រធានសហជីពរូបនេះ បន្តថា បច្ចុប្បន្ន កម្មករបាននាំគ្នាបោះតង់នៅខាងក្រៅរោងចក្រជាប់ចិញ្ចើមផ្លូវវេងស្រេងវិញ ដើម្បីយាមកុំឱ្យមានការដឹកសម្ភារចេញ និងរង់ចាំដំណោះស្រាយពីអាជ្ញាធរពាក់ព័ន្ធ។
អ្នកស្រីបន្ថែមថា៖ «អ៊ីចឹងខ្ញុំសូមអំពាវនាវដល់ប្រមុខរដ្ឋាភិបាល គាត់ត្រូវរកដំណោះស្រាយបញ្ហានេះ កុំឱ្យមានសម្រែកតវ៉ា សម្រែកទាមទារភាពស្រែកឃ្លាន សម្រែកទាមទាររកភាពយុត្តិធម៌ វាខ្មាសប្រទេសគេនៅជិតខាងផង ដែលគេអភិវឌ្ឍបានល្អ មិនមានការរំលោភសិទ្ធិកម្មករ»។
កម្មការិនីម្នាក់ទៀត អ្នកស្រី ជួន ផាន អាយុ៥៦ឆ្នាំ ដែលបានធ្វើការនៅរោងចក្រ ឃែនធើរេន រយៈ១៤ឆ្នាំមកហើយ បាននិយាយថា អំឡុងពេលតវ៉ារយៈពេលកន្លងមក កម្មករបានដាក់បណ្ដឹងរកកិច្ចអន្តរាគមន៍ពីអាជ្ញាធរខណ្ឌពោធិ៍សែនជ័យ ក្រសួងកាងារ និងស្ថានទូតអាមេរិកប្រចាំនៅកម្ពុជា ជាដើម ប៉ុន្តែរហូតពេលនេះ នៅពុំមានដំណោះស្រាយណាមួយសម្រាប់កម្មករឡើយ។
កម្មការិនីដែលមានលំនៅនៅខេត្តកណ្ដាលនេះ បន្តថា អ្នកស្រីត្រូវជិះរថយន្តឈ្នួលមកធ្វើការងារនៅរាជធានីភ្នំពេញ ដោយក្នុងមួយខែត្រូវចំណាយអស់១០ម៉ឺនរៀល ខណៈអ្នកស្រីត្រូវចំណាយលើការសិក្សារបស់កូន និងការចំណាយផ្សេងៗក្នុងគ្រួសារ ព្រមទាំងត្រូវបង់សងបំណុលធនាគារ ជាដើម។ អ្នកស្រីថា ការពន្យារពេលមិនដោះស្រាយនេះបានធ្វើឱ្យអ្នកស្រី និងកម្មករផ្សេងទៀត ជួបការលំបាកជាខ្លាំងលើការចំណាយប្រចាំថ្ងៃ។
អ្នកស្រីបន្ថែមថា៖ «ខ្ញុំមានផលលំបាកក្នុងការចិញ្ចឹមកូន ដោយគ្រួសារខ្ញុំមានជីវភាពខ្វះមុខខ្វះក្រោយ ព្រោះខ្ញុំរកស៊ីចិញ្ចឹមកូន៥នាក់ ប្ដីខ្ញុំគាត់បានស្លាប់ហើយ។ ដល់ពេលក្រុមហ៊ុនធ្វើអ៊ីចឹងដាក់ពួកខ្ញុំ ដូច្នេះខ្ញុំត្រូវពិបាកវេទនា។ ឥលូវនេះ មកបិទច្រកមិនឱ្យពួកខ្ញុំចូលជ្រកក្នុងរោងចក្រទៀត មកចងតង់ដេកលើចិញ្ចើមផ្លូវ។ អ៊ីចឹងសូមសម្តេច ហ៊ុន សែន ជួយដល់ពួកខ្ញុំផង»។
លោក តាំង ឆាំងស្រ៊ុន ជាតំណាងម្ចាស់ទីតាំងនិងអគារដែលរោងចក្រ ឃែនធើរេន បានជួល ប្រាប់វីអូឌីយ៉ាងខ្លីថា ម្ចាស់ទីតាំងមិនបានដេញកម្មករឱ្យចេញពីបរិវេណដូចការលើកឡើងរបស់ក្រុមកម្មករឡើយ។
មន្ត្រីសម្ព័ន្ធសហជីពចលនាកម្មករ លោក ស៊ុត ចិត្រ ដែលតាមឃ្លាំមើលការតវ៉ារបស់ក្រុមកម្មករ បានដាក់ការសង្ស័យថា ការអូសបន្លាយមិនមានដំណោះស្រាយករណីថៅកែរត់ចោលកម្មករនេះ អាចមានការគប់គិតគ្នាជាប្រព័ន្ធរវាងម្ចាស់ទីតាំង ភាគីថៅកែ និងអាជ្ញាធរពាក់ព័ន្ធ។ លោកជឿថា ថៅកែមិនទាន់គេចចេញដីកម្ពុជានៅឡើយ គឺនៅរោងចក្រសាខាផ្សេង ប៉ុន្តែអាជ្ញាធរមិនមានចំណាត់ការ។
លោកបន្ថែមថា៖ «ខ្ញុំគិតថា ការរកថៅកែមកទទួលខុសត្រូវ វាមិនពិបាកនោះទេ ព្រោះគាត់នៅក្នុងស្រុកខ្មែរនៅឡើយ ហើយគាត់មានអត្តសញ្ញាណច្បាស់លាស់។ ប៉ុន្តែខ្ញុំមិនដឹងថាមានអ្វីនៅពីក្រោយខ្នង បានជាអាជ្ញាធរពាក់ព័ន្ធគាត់មិនអាចចាប់ថៅកែមកជជែក ពេលដែលគាត់មានបញ្ហារត់ចោលកម្មករ»។
អគ្គលេខាធិការរងគណៈកម្មការដោះស្រាយកូដកម្មបាតុកម្មគ្រប់មុខសញ្ញា នៃក្រសួងការងារ និងបណ្តុះបណ្តាលវិជ្ជាជីវៈ លោក វង្ស សុវណ្ណ មិនអាចបញ្ជាក់បានទេ ថាតើថៅកែរោងចក្រ ឃែនធើរេន បិទទ្វាររត់ចោលកម្មករឬយ៉ាងណានោះ ប៉ុន្តែលោកថា ក្រសួងការងារនៅតែបន្តស្វែងរកថៅកែឱ្យមកទទួលខុសត្រូវករណីនេះ។
ប្រធានសហភាពចលនាកម្មករកម្ពុជា លោក ប៉ាវ ស៊ីណា លើកឡើងថា ករណីថៅកែបិទទ្វាររោងចក្ររត់ចោលដោយមិនបើកប្រាក់ឈ្នួលនិងទូទាត់អត្ថប្រយោជន៍ផ្សេងៗជូនកម្មករតាមផ្លូវច្បាប់នេះ មិនមែនជាលើកទី១នោះទេ ហើយអាជ្ញាធរកម្ពុជាក៏មិនដែលមានវិធានការទៅថៅកែ ដែលធ្វើឱ្យកម្មករមិនទទួលបានការដោះស្រាយដោយត្រឹមត្រូវ។
មេសហជីពរូបនេះបន្តថា ប្រសិនបើរដ្ឋាភិបាលមិនបង្កើតគោលនយោបាយឬយន្តការណាមួយ ដើម្បីទប់ស្កាត់និងដោះស្រាយបញ្ហានេះជូនកម្មករទេ នោះនឹងលើកទឹកចិត្តកាន់ខ្លាំងដល់ថៅកែផ្សេងៗទៀតយកគំរូតាម និងបន្តគេចវេះពីការទទួលខុសត្រូវក្នុងការទូទាត់ប្រាក់ឈ្នួលនិងផលប្រយោជន៍ផ្សេងៗដល់កម្មករ ហើយកម្មករខ្មែរនឹងបន្តរងការកេងប្រវ័ញ្ចកម្លាំងពលកម្ម និងជួបទុក្ខលំបាក រងភាពអយុត្តិធម៌ និងភាពឈឺចាប់។
លោកបន្ថែមថា៖ «ហើយទិដ្ឋភាពនៃសម្រែកតវ៉ាតាមដងផ្លូវ ហាលភ្លៀង ហាលខ្យល់ ការដេកយាមក្នុងរោងចក្រ ដោយប្រថុយប្រថាន ដើម្បីការពារសម្ភារកាកសំណល់ដែលនៅសេសសល់តិចតួច ព្រោះវាជាស្បៀងចុងក្រោយបង្អស់របស់ពួកគាត់ ដូច្នេះហើយ បើរដ្ឋមិនបង្កើតគោលនយោបាយ ឬយន្តការណាមួយដើម្បីដោះស្រាយករណីនេះទេ វានឹងធ្វើឱ្យកម្មករកាន់តែរងនូវការកេងប្រវ័ញ្ច ភាពអយុត្តិធម៌ និងភាពឈឺចាប់»។
កាលពីថ្ងៃទី៣ ខែមិថុនា ឆ្នាំ២០២២ កម្មករ-កម្មការិនីបាននាំគ្នាដាក់ញត្តិនៅស្ថានទូតសហរដ្ឋអាមេរិកប្រចាំនៅកម្ពុជា ដើម្បីស្នើឱ្យមន្ត្រីទូតជួយអន្តរាគមន៍ទៅកាន់ក្រុមហ៊ុនបញ្ជាទិញ Walmart និងក្រុមហ៊ុន Primark ទទួលខុសត្រូវក្នុងការទូទាត់ប្រាក់ឈ្នួល និងអត្ថប្រយោជន៍ផ្សេងៗជូនកម្មករតាមផ្លូវច្បាប់ ក្រោយថៅកែរោងចក្របិទទ្វាររត់ចោលកម្មករដោយពុំមានការជូនដំណឹងជាមុន។ កម្មករអះអាងថា ក្រុមហ៊ុនបញ្ជាទិញ Walmart និងក្រុមហ៊ុន Primark ជាក្រុមហ៊ុនរបស់អាមេរិក ដែលរោងចក្រ ឃែនធើរេន បានផលិតទំនិញឱ្យជាង២០ឆ្នាំមកហើយ៕
