លោកនាយករដ្ឋមន្រ្តី ហ៊ុន សែន សម្រេចឱ្យក្រសួងការពារជាតិជ្រើសរើសពលទាហានថ្មីចំនួន៦០០នាក់ ដើម្បីបំពេញក្របខណ្ឌឱ្យ៣កងវរសេនាតូចទើបបង្កើតថ្មីទៀត បន្ទាប់ពីមានសំណើរបស់រដ្ឋមន្ត្រីក្រសួងការពារជាតិ។
ក្នុងសេចក្ដីសម្រេចចុះថ្ងៃទី២ ខែមិថុនា ឆ្នាំ២០២២ ដែលវីអូឌីទើបទទួលបាន ឱ្យដឹងថា ការអនុញ្ញាតឱ្យក្រសួងការពារជាតិជ្រើសរើសពលទាហានថ្មីនេះ ដើម្បីបំពេញក្របខណ្ឌឱ្យ «៣កងវរសេនាតូច» ដែលទើបបង្កើតថ្មី ចំណុះឱ្យបញ្ជាការដ្ឋានកាំភ្លើងធំ នៃអគ្គបញ្ជាការដ្ឋាន។
សេចក្ដីសម្រេចបញ្ជាក់ថា រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី រដ្ឋមន្ត្រីក្រសួងការពារជាតិ រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ អគ្គមេបញ្ជាការនៃកងយោធពលខេមរភូមិន្ទ រដ្ឋមន្ត្រី រដ្ឋលេខាធិការ គ្រប់ក្រសួងស្ថាប័នដែលពាក់ព័ន្ធ ត្រូវអនុវត្តតាមសេចក្ដីសម្រេចចាប់ពីថ្ងៃចុះហត្ថលេខានេះតទៅ។
វីអូឌី មិនអាចសុំការឆ្លើយតបបន្ថែមជុំវិញបញ្ហានេះពីរដ្ឋមន្ត្រីក្រសួងការពារជាតិ លោក ទៀ បាញ់ និងអ្នកនាំពាក្យក្រសួងមួយនេះ លោក ឈុំ សុជាតិ បានទេ នៅថ្ងៃនេះ។ រីឯអ្នកនាំពាក្យកងទ័ពជើងគោក លោក ម៉ៅ ផល្លា សុំមិនបកស្រាយរឿងនេះឡើយ ដោយថាមិនមែនជាភារកិច្ចរបស់ខ្លួន។
នាយកប្រតិបត្តិអង្គការតម្លាភាពកម្ពុជា លោក ប៉ិច ពិសី យល់ថា ការជ្រើសរើសកងកម្លាំងនេះ វាជាអាទិភាពមួយសម្រាប់ប្រទេសកម្ពុជាក្នុងការការពារជាតិ និងបូរណភាពទឹកដី ប៉ុន្តែលោកជំរុញឱ្យការជ្រើសរើសកងកម្លាំងនេះប្រកបដោយតម្លាភាព ដើម្បីផ្ដល់ឱកាសដល់យុវជននិងប្រជាពលរដ្ឋអាចចូលធ្វើការក្នុងវិស័យប៉ូលិសទាហាន។
លោកបន្តថា ដើម្បីធានាការជ្រើសរើសនេះមានតម្លាភាព សុចរិតភាព គ្មានអំពើពុករលួយនោះ លោកស្នើឱ្យមានការចូលរួមឃ្លាំមើលពីភាគីពាក់ព័ន្ធ ជាពិសេសអង្គភាពប្រឆាំងអំពើពុករលួយ។
លោកថា៖ «បើសិនជាវិស័យការពារជាតិយើង ជោគជាំដោយបញ្ហាផ្សេងៗ ឧទាហរណ៍ យើងជ្រើសអ្នកដែលចូលធ្វើការហ្នឹងមិនផ្អែកទៅលើគោលការណ៍សមត្ថភាព គោលការណ៍បទពិសោធន៍ ហើយនិងសុភវិនិច្ឆយដែលយើងមានទេ យើងអាចបានកម្លាំងនិងធនធានការពារជាតិដែលខ្សោយ។ ដល់ពេលខ្សោយ ហើយមានអំពើពុករលួយ ឧទាហរណ៍ គាត់ជាប់ដោយគាត់បង់លុយគេ អ៊ីចឹងយើងអាចបានធនធានមួយជោគជាំដោយបញ្ហាហើយ។ វិស័យការពារជាតិ ជាវិស័យសំខាន់ណាស់ បើសិនជាវិស័យហ្នឹងមានបញ្ហា ពុករលួយជាដើម ប្រហែលជាសមត្ថកិច្ចនៃការផ្ដល់សេវាមានបញ្ហាហើយ»។
ចំណែកនាយកប្រតិបត្តិអង្គការអភិវឌ្ឍន៍ផ្នត់គំនិត លោក សេក សុជាតិ ចាត់ទុកការជ្រើសរើសជារឿងល្អ បើសិនជាជ្រើសរើសនេះមាននៅក្នុងផែនការដែលកម្ពុជាខ្វះកងកម្លាំងប្រដាប់អាវុធផ្នែកជំនាញ និងបច្ចេកទេស ប៉ុន្តែបើសិនការជ្រើសរើសទាហានថ្មីនេះក្នុងគោលដៅមួយមិនឆ្លើយតបនឹងការពារជាតិនិងទឹកដីទេ លោកថា ក្រសួងគួរតែពិចារណាឱ្យច្បាស់លាស់។
មួយវិញទៀត លោកថា រដ្ឋាភិបាលត្រូវបង្ហាញទៅប្រជាពលរដ្ឋ ឬសាធារណជនឱ្យបានច្បាស់អំពីមូលហេតុនៃការជ្រើសរើស និងការបញ្ជាក់អំពីសមត្ថភាព ជាដើម ដើម្បីផ្ដល់ឱកាសដល់យុវជននិងប្រជាពលរដ្ឋដាក់ពាក្យចូលបម្រើការងារក្នុងវិស័យមួយនេះ បើសិនពួកគេចង់ចូលរួមក្នុងការបំពេញកាតព្វកិច្ចជាពលរដ្ឋខ្មែរការពារបូរណភាពទឹកដី។
លោកបញ្ជាក់ថា បើសិនជាការជ្រើសរើសមន្ត្រីរាជការនិងពលទាហានថ្មីមានអំពើពុករលួយនោះ លោកបារម្ភថា ពួកគេអាចនឹងមិនការពារផលប្រយោជន៍ជាតិនិងប្រជាពលរដ្ឋហើយ រួមទាំងប្រើប្រាស់តួនាទីខុសក្រមសីលធម៌និងវិន័យ ដើម្បីបម្រើផលប្រយោជន៍ផ្ទាល់និងបក្ខពួកទៅវិញ។
លោកថា៖ «កងយោធពលខេមរភូមិន្ទជាកម្លាំងរបស់ជាតិ គឺជាអ្នកការពារជាតិ ការពារទឹកដី ហើយជាអ្នកការពារនូវភាពអយុត្តិធម៌ទាំងឡាយ ប៉ុន្តែបើសិនពួកគាត់បោះបង់ចោលកាតព្វកិច្ចនិងតួនាទី ក្នុងនាមជាអ្នកការពារទឹកដី និងការពារជាតិ ការពារប្រជាពលរដ្ឋ ហើយគាត់ប្រើប្រាស់ឥទ្ធិពលនិងអំណាចគាត់ទៅតាមផ្លូវផ្សេង អ៊ីចឹងវាធ្វើឱ្យប៉ះពាល់ទៅដល់ផលប្រយោជន៍សង្គមនិងប៉ះពាល់ដល់នីតិរដ្ឋ ហើយសង្គមនឹងមានភាពច្របូកច្របល់ ក៏ដូចជាធ្វើឱ្យមានថ្នាំងថ្នាក់ និងការមិនពេញចិត្តពីប្រជាពលរដ្ឋចំពោះកងយោធពលខេមរភូមិន្ទទាំងមូល ហើយធ្វើឱ្យប៉ះពាល់សង្គមរបស់យើង ធ្វើឱ្យមានការរិះគន់ពីសហគមន៍ជាតិនិងអន្តរជាតិកាន់តែធ្ងន់ធ្ងរបន្ថែមទៀត ពាក់ព័ន្ធនឹងមន្ត្រីកងយោធពលខេមរភូមិន្ទមិនបានគោរតាមតួនាទី បែរជាយកតួនាទីដើម្បីបម្រើផលប្រយោជន៍ឬលាភសក្ការៈរបស់ខ្លួននិងក្រុមបក្ខពួក»៕
