សហជីពអះអាងថា តាមការគណនាបឋម គឺថៅកែរោងចក្រ ឃែនធើរេន អីភែរឹល ខេមបូឌា (CANTERAN APPAREL Cambodia co.,ltd) ជំពាក់បំណុលក្រុមកម្មករខ្ទង់៨០ម៉ឺនដុល្លារ ខណៈថៅកែរោងចក្រនេះបានបិទរោងចក្ររត់ចោលកម្មករជាង៣០០នាក់។
កម្មករ-កម្មការិនីជិត៥០នាក់ធ្វើការនៅរោងចក្រ ឃែនធើរេន នៅថ្ងៃព្រហស្បតិ៍នេះ បានប្រមូលផ្ដុំគ្នាដាក់ញត្តិនៅស្ថានទូតម៉ាឡេស៊ីប្រចាំកម្ពុជា ដើម្បីស្នើស្ថានទូតជួយជំរុញទៅថៅកែរោងចក្រដែលជាជនជាតិម៉ាឡេស៊ី ចេញមកដោះស្រាយវិវាទការងារ ដោយទូទាត់ប្រាក់ឈ្នួលនិងអត្ថប្រយោជន៍ផ្សេងៗដល់កម្មករតាមផ្លូវច្បាប់ ក្រោយរោងចក្រនេះបិទទ្វារលែងដំណើរការអាជីវកម្ម។
មន្ត្រីសម្ព័ន្ធសហជីពចលនាកម្មករ លោក ស៊ុត ចិត្រ ប្រាប់ វីអូឌី នៅមុខស្ថានទូតថា តាមការគណនារបស់ក្រុមសហជីពបានរកឃើញថា ថៅកែរោងចក្រ ឃែនធើរេន ជំពាក់បំណុលកម្មករសរុបខ្ទង់៨០ម៉ឺនដុល្លារ។
លោកបន្តថា ថៅកែបានបិទអាជីវកម្មរបស់ខ្លួនដោយមិនបានជូនដំណឹងត្រឹមត្រូវតាមផ្លូវច្បាប់ដល់កម្មករនោះទេ ខណៈកម្មករត្រូវទទួលបានប្រាក់សំណងចំនួន៥ចំណុច រួមមាន ប្រាក់ឈ្នួលចុងក្រោយ ប្រាក់ជូនដំណឹង ប្រាក់ជំងឺចិត្ត ប្រាក់អតីភាពការងារ និងប្រាក់ដំណាច់ឆ្នាំដែលនៅសស់ជាដើម។
លោកបន្ថែមថា៖ «អ្វីដែលយើងរំពឹងទុក មិនមែនថាយើងទាមទារឱ្យបានទាំងស្រុងទេ។ យើងនឹងធ្វើការសម្របសម្រួល ធ្វើយ៉ាងណាឱ្យភាគីកម្មករ ថៅកែ និងភាគីពាក់ព័ន្ធផ្សេងទៀត ទទួលយកបានដូចគ្នា។ ខ្ញុំសូមសំណូមពរដល់សម្តេច ហ៊ុន សែន និងភាគីពាក់ព័ន្ធ មានក្រសួងការងារ ស្ថានទូតអាមេរិក ស្ថានទូតម៉ាឡេស៊ី ជួយជំរុញយ៉ាងណា រួមគ្នាជំរុញឱ្យមានការជជែកគ្នា ដើម្បីដោះស្រាយបញ្ចប់វិវាទការនៅរោងចក្រ ឃែនធើរេន ដើម្បីកុំឱ្យកម្មករបន្តរងទុក្ខលំបាកទៀត»។
អ្នកស្រី ហឹន ជឿន អាយុ៥៨ឆ្នាំ ធ្វើការងារនៅរោងចក្រ ឃែនធើរេន រយៈពេល១៤ឆ្នាំ និយាយថា ពេលដែលថៅកែបិទទ្វាររោងចក្ររត់ចោលកម្មករនោះ ខាងរោងចក្រមិនបានបើកប្រាក់ឈ្នួលចុងក្រោយ ប្រាក់អតីតភាពការងារ និងអត្ថប្រយោជន៍ផ្សេងៗទៀតជូនពួកគាត់ឡើយ។
អ្នកស្រីបន្ថែមថា៖ «ថៅកែរត់ចោលហ្នឹង វាមានរយៈពេល២ខែហើយ មិនមានអាជ្ញាធរណាដោះស្រាយជូនពួកយើងទេ។ ពួកយើងគ្មានលុយសម្រាប់ចំណាយលើថ្ងៃទឹកភ្លើង ថ្លៃហូបចុកប្រចាំថ្ងៃ។ យើងធ្វើការរាល់ថ្ងៃ ដើម្បីផ្គត់ផ្គង់ជីវភាពប្រចាំថ្ងៃ ដល់ពេលថៅកែគាត់ទៅចោលដោយមិនបានប្រាប់ ធ្វើឱ្យពួកយើងជួបការលំបាកជីវភាពកាន់តែខ្លាំង»។
ប្រធានសមាគមអភិវឌ្ឍន៍ជីវភាពពលរដ្ឋកម្ពុជា លោក ព្រុំ ប៊ុនថន ដែលឃ្លាំមើលការតវ៉ារបស់កម្មករ និងបានយកញត្តិទៅដាក់ស្ថានទូតម៉ាឡេស៊ីប្រចាំនៅកម្ពុជា បានឱ្យដឹងថា មន្ត្រីទូតមិនចេញមកទទួលញត្តិរបស់កម្មករនោះទេ ដោយឱ្យផ្ញើនៅកន្លែងសន្តិសុខយាមនៅខាងមុខទ្វារស្ថានទូត។
ប្រធានសមាគមរូបនេះបន្តថា ក្រុមកម្មករសម្រេចមករកកិច្ចអន្តរាគមន៍ពីស្ថានទូតម៉ាឡេស៊ី ដោយសារថៅកែរោងចក្រ ឃែនធើរេន ជាជនជាតិម៉ាឡេស៊ី។
លោកបន្ថែមថា៖ «អ៊ីចឹងរដ្ឋាភិបាលម៉ាឡេស៊ី ត្រូវចាត់វិធានការទៅលើថៅកែជាជនជាតិម៉ាឡេស៊ី ដែលមករកស៊ីខិលខូច ធ្វើបាបកម្មករខ្មែរ មិនគោរពសិទ្ធិកម្មករ និងច្បាប់របស់កម្ពុជា ឱ្យចេញមុខមកដោះស្រាយនិងទូទាត់អត្ថប្រយោជន៍ផ្សេងៗជូនកម្មករតាមផ្លូវច្បាប់»។
វីអូឌី មិនអាចសុំការបញ្ជាក់បន្ថែមពីតំណាងស្ថានទូតម៉ាឡេស៊ីប្រចាំកម្ពុជាបានទេ នៅថ្ងៃព្រហស្បតិ៍នេះ។
ក្នុងញត្តិរបស់សម្ព័ន្ធសហជីពចលនាកម្មករដែលដាក់ជូនឯកអគ្គរាជទូតម៉ាឡេស៊ីប្រចាំនៅកម្ពុជា បានលើកឡើងថា រោងចក្រ ឃែនធើរេន អីភែរឹល ខេមបូឌា (CANTERAN APPAREL Cambodia co.,ltd) ដែលមានទីតាំងនៅសង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ជាក្រុមហ៊ុនកាត់ដេរសម្លៀកបំពាក់ បានបើកដំណើរការតាំងពីឆ្នាំ១៩៩៧ ដែលមានថៅកែធំឈ្មោះ YAP FUNG KONG សញ្ជាតិម៉ាឡេស៊ី និងមានកម្មករបម្រើការងារចំនួន៣២០នាក់។
ញត្តិដដែលបន្តថា រោងចក្រនេះបានបិទទ្វារលែងដំណើរការ និងបានដឹកសម្ភារខ្លះចេញពីរោងចក្រ ក្នុងអំឡុងពេលបុណ្យចូលឆ្នាំខ្មែរ កាលពីខែមេសា ដោយពុំបានទូទាត់ប្រាក់ឈ្នួល និងអត្ថប្រយោជន៍ផ្សេងៗជូនកម្មករនិយោជិតឡើយ។
គួរបញ្ជាក់ថា កម្មករ-កម្មការិនីនៅរោងចក្រ ឃែនធើរេន បាននាំគ្នាតវ៉ា និងដាក់វេនគ្នាដេកយាមមុខរោងចក្រជិត២ខែមកហើយ ដើម្បីការពារមិនឱ្យមានការដឹកសម្ភារផ្សេងៗចេញពីរោងចក្រ និងទាមទារឱ្យថៅកែចេញមុខដោះស្រាយសំណងជូនពួកគេតាមផ្លូវច្បាប់។
បើតាមសហជីពកន្លងមក ពួកគេធ្លាប់ដាក់ញត្តិទៅអាជ្ញាធរខណ្ឌពោធិ៍សែនជ័យ ក្រសួងការងារ និងស្ថានទូតអាមេរិកប្រចាំកម្ពុជា ដើម្បីសុំអន្តរាគមន៍ឱ្យមានដំណោះស្រាយវិវាទការងារនេះ ប៉ុន្តែរហូតពេលនេះនៅតែពុំមានដំណោះស្រាយណាមួយឡើយ ហើយពួកគេកំពុងពិភាក្សាជាមួយមេធាវី ដើម្បីប្តឹងករណីនេះទៅតុលាការបន្ថែមទៀត៕