បុរសជាជនជាតិវៀតណាមម្នាក់ត្រូវបានគេប្រទះឃើញស្លាប់នៅកាស៊ីណូ ក្នុងទីក្រុងបាវិត ខេត្តស្វាយរៀង មួយកន្លែង គ្រប់គ្រងដោយបុគ្គលមួយរូបដែលត្រូវបានគេស្គាល់ថាមានទំនាក់ទំនងជាមួយលោក ហ៊ុន តូ ខណៈជនជាតិឥណ្ឌូនេស៊ី ២២នាក់ផ្សេងទៀត ក៏ត្រូវបានជួយសង្គ្រោះចេញពីទីតាំងមួយចំនួនក្នុងតំបន់នោះផងដែរ។ នេះបើតាមការឱ្យដឹងពីសមត្ថកិច្ច។
លោក អែម សុវណ្ណារិទ្ធ អធិការនគរបាលក្រុងបាវិត ថ្លែងថា ករណីប្រទះឃើញបុរសម្នាក់ស្លាប់ដោយចងកកាលពីថ្ងៃសុក្របន្ទាប់ពីធ្វើការនៅទីនោះបានតែមួយថ្ងៃ កើតឡើងនៅទីតាំងកាស៊ីណូយីហោ ហេងហ៊ី (Heng He) ឬ ហេងហេង។
លោកបន្តថា បុរសជាជនជាតិវៀតណាមដែលមានឈ្មោះ ត្រាន់ វ៉ាន់បាន អាយុ២៨ឆ្នាំ ត្រូវបានរកឃើញដោយសមត្ថកិច្ចថាមានវិបត្តិផ្លូវចិត្ត ទើបឈានដល់ការសម្លាប់ខ្លួនឯងតែម្ដង។
ទោះជាយ៉ាងណា អធិការនគរបាលក្រុងបាវិតដដែលបានឱ្យដឹងទៀតថា រូបលោកមិនដឹងថាជនរងគ្រោះធ្វើការងារអ្វីឡើយនៅទីក្រុងបាវិត។
លោកថា៖ «ហេតុការណ៍បែបនេះមិនដែលកើតឡើងពីមុននោះទេ ហើយនេះជាករណីទីមួយផងដែរ»។
គួរបញ្ជាក់ថា ក្រុមហ៊ុន ហេងហ៊ី បាវិត អចលនទ្រព្យ (Heng He Bavet Property) ដែលរួមមានកាស៊ីណូយីហោ «ហេងហ៊ី» ផងដែរនោះ ត្រូវបានគេស្គាល់ថាជាកម្មសិទ្ធិរបស់លោក Chen Al Len ដែលបច្ចុប្បន្នដឹកនាំក្រុមហ៊ុនចំនួនបីផ្សេងទៀត ជាមួយក្មួយប្រុសបង្កើតរបស់លោកនាយករដ្ឋមន្ត្រី ហ៊ុន សែន គឺលោកឧកញ៉ា ហ៊ុន តូ។
លោក Chen Al Len ក៏ត្រូវបានគេស្គាល់ថាជាម្ចាស់ទីតាំងអាគារ Kaibo (KB) ក្នុងខេត្តព្រះសីហនុ ដែលជាប់ពាក់ព័ន្ធនឹងប្រតិបត្តិការឆបោកតាមប្រព័ន្ធអនឡាញផងដែរ។
យោងតាមនាយរងប៉ុស្តិ៍នគរបាលសង្កាត់បាវិត លោក ពុទ្ធា នុតសិទ្ធ បានឱ្យដឹងថា សមត្ថកិច្ចមិនអាចចូលទៅកាន់បរិវេណកាស៊ីណូ ហេងហ៊ី បានឡើយ។
លោកថា៖ «សម្រាប់ទីតាំងនេះ ខ្ញុំមិនដែលចូលឡើយ ដោយសារតែវាពិបាកចេញចូលខ្លាំងណាស់»។
ជាមួយគ្នានេះ ចៅសង្កាត់បាវិតរង លោក កៅ សារ៉ាន់ បន្ថែមថា៖ «យើងមិនដឹងពីចំនួនមនុស្សសរុបនៅក្នុងទីតាំងនោះឡើយ ហើយពួកគេក៏មិនដែលទាក់ទងអ្វីមកកាន់យើងផងដែរ»។
កាលពីខែមុន បុរសជាជនជាតិវៀតណាមមួយរូបក៏ធ្លាប់បានប្រទះឃើញស្លាប់ផងដែរ បន្ទាប់ពីធ្លាក់ពីលើជាន់ទី៨ នៃកាស៊ីណូក្នុងក្រុងបាវិតមួយកន្លែង ដែលត្រូវបានគេស្គាល់ថាជាកម្មសិទ្ធិរបស់សមាជិកព្រឹទ្ធសភាមកពីគណបក្សប្រជាជនកម្ពុជា។
យោងតាមលោក អែម សុវណ្ណារិទ្ធ សមត្ថកិច្ចនៅក្នុងខែនេះ ក៏បានជួយសង្រ្គោះជនជាតិឥណ្ឌូនេស៊ីចំនួន២២នាក់ចេញពីទីតាំងមួយចំនួនក្នុងទីក្រុងបាវិតផងដែរ។
លោកបន្ថែមថា៖ «ខាងខេត្តបានមកជួយសង្គ្រោះពួកគេទាំងនេះចេញពីទីតាំងពីរទៅបីទីតាំងដែលពួកគេធ្វើការ»។
ទាក់ទិនករណីនេះ អ្នកនាំពាក្យអគ្គនាយកដ្ឋានអន្តោប្រវេសន៍កម្ពុជា លោក កែវ វ៉ាន់ថន បានលើកឡើងថា ប្រតិបត្តិការជួយសង្គ្រោះនេះត្រូវបានធ្វើឡើងកាលពីថ្ងៃទី២ ខែមិថុនា ដោយថា អ្នកដែលត្រូវបានជួយសង្រ្គោះទាំងអស់មានវិវាទការងារ។
លោកថា៖ «នៅពេលដែលមានការរាយការណ៍មកថា ពួកគេត្រូវបានគេឃុំខ្លួនដោយខុសច្បាប់ ដែលពេលខ្លះកើតឡើងដោយសារតែជម្លោះ ការទទួលបានប្រាក់ខែខុសពីការសន្យា ឬការមិនមានសេរីភាពជាដើមនោះ គឺយើងអាចចាត់ទុកករណីនេះបានថាជាវិវាទការងារ»។
លោកបន្ថែមថា៖ «យើងក៏ត្រូវពិនិត្យមើលថាតើពួកគេឆ្លងកាត់ព្រំដែនដោយខុសច្បាប់ឬអត់ផងដែរ។ ពេលពួកគេមកត្រូវតែស្របច្បាប់ មានទិដ្ឋាការ លិខិតឆ្លងដែនដែលមានសុពលភាព និងមានឯកសារការងារគ្រប់គាន់។ យើងមិនបានដាក់ទោសទណ្ឌអ្វីលើពួកគេឡើយ»៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Death at Casino, 22 Indonesians Rescued in Bavet